Ko e Kau Paionia ʻi he Fonua Kotoa Pē
Kimi Ho Siki
Fuofua Mēmipa ʻo e Siasí mei Kōlea
Naʻe ʻomi ia ʻe he ʻOtuá ki ai ʻi ha ʻuhinga makehe.
Naʻe mihi fakamānava loloa ʻa Kimi Ho Siki. Ko hono fuofua ʻaho ia ke ako mo faiako ai ʻi ha ʻunivēsiti ʻi he ʻIunaiteti Siteití.
Naʻe mahuʻinga ʻa e akó kia Ho Siki. Naʻá ne loto ke ako ki he lahi taha te ne malavá fekauʻaki mo e meʻatokoni fakatupu moʻui leleí. Pea te ne lava ʻo ʻai ke lelei ange e moʻuí maʻá e kakai ʻi Kōlea Tongá, ʻa ia naʻe haʻu mei aí.
Naʻe fua hake ʻe Ho Siki ha puha tohi ʻo kaka ʻi he sitepú ki hono ʻōfisi foʻoú.
Naʻe fakalea mai ha tangata mei he ʻōfisi hoko maí, “Mālō e lelei.” “Ko ʻŌlivā au. ʻOku ou ako foki mo au heni.”
Naʻe tali atu ʻe Ho Siki, “ʻOku fakafiefia ke feʻiloaki mo koe.”
Naʻe ʻosi atu ha ngaahi uike. Naʻe hoko ʻa ʻŌliva mo Ho Siki ko ha ongo kaungāmeʻa. Naʻá na talanoa fekauʻaki mo e meʻa ne na akó. Naʻe fakatokangaʻi ʻe Ho Siki naʻe ʻikai ke teitei inu kava mālohi pe ifi tapaka ʻa ʻŌliva. Naʻe ʻikai foki ke ne ngāue ʻi he Sāpaté. Naʻe fakakaukau ʻa Ho Sikipe ko e hā hono ʻuhingá,.
ʻI ha ʻaho ʻe taha naʻe ʻoange ai ʻe ʻŌliva ha tohi kia Ho Siki. Naʻe fekauʻaki ia mo e Ngaahi Tefito ʻo e Tuí. Naʻe talaange ʻe ʻŌliva, “ʻOku fakamatalaʻi ʻe he tohí ni ʻa e meʻa ʻoku ou tui ki aí.” “ʻTalamai ke u ʻilo kapau ʻokú ke fie ako lahi ange.”
Naʻe lau ʻe Ho Siki ʻa e tohí ʻo ʻosi pē ʻi loto ʻi ha uike ʻe taha. Naʻe ʻoange ʻe ʻŌliva kiate ia ha tohi ʻe taha naʻe ui ko e Tohi ʻa Molomoná. Naʻe vave hono lau ia ʻe Ho Siki. Naʻe kamata ke ne ʻalu mo ʻŌliva ki he lotú. Ka naʻe ʻikai ke ne fakapapauʻi pe ʻokú ne fie papitaiso pe ʻikai.
Naʻe vave ʻene aʻu ki he ʻaho fakaʻosi ʻo ʻŌliva ʻi he ʻunivēsití. Naʻe sio ʻa Ho Siki kiate ia ʻi he holó. Naʻe pehē ange ʻa ʻŌliva, “ʻOku ou tui naʻe ʻomi koe ʻe he ʻOtuá ki heni ʻi ha ʻuhinga makehe.” “ʻOku ʻikai ko hoʻo lava pē ʻo akoʻi ho kakaí ki he meʻakai moʻui leleí. ʻOku fie maʻu ke ke akoʻi foki kiate kinautolu e ongoongoleleí.”
Naʻe fakakaukau fuoloa ʻa Ho Siki ki he ngaahi lea ʻa ʻŌlivá. Ne faifai peá ne fili ke papitaiso. Naʻe papitaiso ia ʻi he vaitafe tatau pē naʻe papitaiso ai ʻa Siosefa Sāmitá ʻi he taʻu ʻe 122 kimuʻá!
ʻI he ʻosi e ako ʻa Ho Sikí, naʻá ne foki ki hono fonuá ki Kōlea Tonga. Naʻá ne vekeveke ke vahevahe ʻa e ongoongoleleí ki hono fāmilí. Naʻá ne akoʻi foki mo e niʻihi tokolahi kehe fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe hoko ʻa Ho Siki ko ha taki. Naʻá ne maʻu ha ngaahi ngāue mahuʻinga ʻi he akó mo e puleʻangá. Naʻá ne tokoniʻi e kakai ʻi hono fonuá ke nau maʻu ha meʻatokoni fakatupu moʻui lelei ange. Naʻá ne fakahoko ha meʻa makehe ʻi heʻenau moʻuí.
Ka naʻe fie maʻu ʻe Ho Siki ke ne fai ha meʻa makehe lahi ange. Naʻe ʻikai ngofua ke fai ha akoʻi ʻa e kau faifekaú ʻi Kōlea. Naʻe loto ʻa Ho Siki ke liliu ia. Naʻá ne ʻiloʻi kapau te ne kole ki he puleʻangá ke tuku ke lava e kau faifekaú ʻo faiako, te ne fepaki mo ha faingataʻa. Ka naʻá ne ʻiloʻi ʻoku mahuʻinga ke fai ia. Te ne tukuange ʻa e meʻa kotoa pē ke ʻomi ʻa e ongoongoleleí ki Kōlea.
Naʻe kole ʻe Ho Siki ki he puleʻangá ke tuku ke faiako e kau faifekaú ʻi Kōlea Tonga. Naʻe loto ki ai e puleʻangá! Ne vave hono tuku mai e kau faifekaú, pea tokoni ʻa Ho Siki ke nau akoʻi ha kakai tokolahi ange.
Naʻe ʻiloʻi ʻe Ho Siki naʻe moʻoni ʻa ʻŌliva. Naʻe ʻave ia ki he ʻunivēsití ke ne lava ʻo ako fekauʻaki mo e ongoongoleleí. Naʻá ne houngaʻia ʻi hono tāpuekina ia ʻe he ʻOtuá ʻaki ʻa e ongoongoleleí mo e faingamālie ke vahevahe ia.
Ko Kōlea Tongá ko ha fonua ia ʻi ʻĒsia Hahake.
ʻI he ʻaho ní, ʻoku laka hake he kāingalotu ʻe toko 88,000 ʻo e Siasí ʻi Kōlea Tonga.
ʻOku ʻi ai foki mo ha temipale ʻi he kolomuʻá ko Soulu.
Naʻe hoko ʻa Kimi Ho Siki ko ha mataotao ʻi he mahuʻinga ʻo e meʻakai fakatupu moʻui lelei ʻo e soiapiiní.
Naʻe kau e fānau ʻa Ho Sikí ʻi he niʻihi ʻo e fuofua kakai ke papitaiso ki he Siasí ʻi Kōleá.
Naʻe liliu ʻe Ho Siki ʻa e Ngaahi Tefito ʻo e Tuí ki he lea faka-Kōleá.
Tā fakatātaaʻi ʻe Alyssa Tallent