Tohi ʻe Koe
Feinga ke Tokoni ʻo Hangē ko Sīsuú
ʻEmelī T., taʻu 11, Sutilani Tokelau, Tenimaʻake
ʻOku pehē ʻe he palōfitá ʻoku ʻofa ʻa e ʻEikí ʻi he ngāué, ko ia ʻoku ou feinga ke hangē ko Sīsuú ʻaki ʻeku tokoni ʻi he taimi ʻoku ou ʻiloʻi ai ha fie maʻú. ʻI heʻemau ʻi ʻapi lolotonga e kolonitiní, naʻá ku tokoni ki heʻeku faʻeé ke ʻai ha kiʻi ako maʻa hoku ongo tuongaʻane siʻisiʻi tahá, ʻokú na moʻua he ʻatamai tuaí. Naʻá ku ʻoange ha fanga kiʻi ngāue iiki mo tokoniʻi kinaua.
ʻOku ou muimui kia Sīsū ʻaki ʻeku ʻalu ki he lotú mo fai e ngaahi meʻa ʻoku ou ako ʻi he Palaimelí mo e efiafi fakafāmili ʻi ʻapí. ʻOku ou feinga ke angalelei ki he niʻihi kehé, neongo ʻoku faingataʻa he taimi ʻe niʻihi. Ko ha faʻifaʻitakiʻanga lelei au ki hoku ngaahi kaungāmeʻa ʻi he akó he ʻoku ʻikai ke u kapekape. ʻOku ou feinga ke ako mei heʻeku ngaahi fehalaakí. ʻOku ou lotua ha faʻahinga ueʻi fakalaumālie mo ha mālohi ʻoku ou fie maʻú. ʻOku ou ʻilo ko e taimi ʻoku ou lotu aí, te u maʻu ha tali pea ʻe fakapapauʻi ia ʻe he Laumālie Māʻoniʻoní ʻaki ʻene ʻai ke u ongoʻi māfana ʻi hoku lotó.
Ko e lotú ko ha founga lelei ia ki hono tokoniʻi ʻo e niʻihi kehé. ʻI he taimi naʻe ʻi falemahaki ai ʻeku kui tangatá pea ʻikai ke mau ʻilo pe ko e hā hono puké, naʻá ku lotua ia. Naʻe maʻu heʻeku tangataʻeikí ha telefoni ʻo talamai ʻe sai pē ʻeku kui tangatá. Naʻá ku fiefia ʻaupito, pea naʻe lava ke ongoʻi ʻe heʻeku kuitangatá naʻá ku lotua ia. ʻOku ʻikai vave maʻu pē ʻetau maʻu e talí, ka ʻoku ou ʻilo ʻe tokoniʻi kitautolu ʻe he ʻOtuá ke tau nonga lolotonga ʻetau tatalí.
Ngaahi tā fakatātā ʻa Augusto Zambonato