Angaʻofa ʻi he Polokalama ʻa e Palaimelí

Fai ʻe Marissa Widdison

ʻŪ Makasini ʻa e Siasí

(Makatuʻunga ʻi ha talanoa moʻoni)

Naʻe lue ʻa Paula mo ʻene ongomātuʻá ki he lotú. Naʻe ongoʻi fiefia ʻa Paula. Ko e ʻaho ʻeni ʻo e polokalama ʻa e Palaimeli! Naʻe ʻamanaki ke hivaʻi kotoa ʻe he fānaú ha ngaahi hiva mo vahevahe e folofolá lolotonga e lotú. Ko e fuofua taimi ia ke kau atu ai ʻa Paula ki he polokalamá.

ʻI heʻenau aʻu ki he lotú, naʻe sio ʻa Paula ki he kau faifekaú. Kuó na akoʻi e fāmili ʻo Paulá ki he ongoongoleleí.

“Maau?” Ko e fehuʻi atu ia ʻa Sisitā Uoká.

Naʻe kamo pē ʻa Paula. Kuó ne ako ha potufolofola. Naʻe fekauʻaki ia mo e founga hono kole mai ʻe Sīsū ke tau ʻofa ʻi he tokotaha kotoa pē. Naʻe mateuteu ʻa Paula ke vahevahe ia!

Naʻa nau hū kotoa ki loto ʻo tangutu hifo. Ne ʻikai ke fuoloa mei ai kuo kole atu ʻe he pīsopé ki he fānaú ke nau omi ki muʻa ʻi he falelotú. Naʻe tuʻu ʻa Paula mo hono ngaahi kaungāmeʻa foʻoú. Naʻá ne fuʻu malimali lahi. Naʻá ne lava ʻo sio ki he malimali ʻene fineʻeikí mo e tangataʻeikí. Ne kamata leva e hivá.

“Kapau naʻe ʻi hoku tafaʻakí ʻa e Fakamoʻuí, te u fai nai ʻa e ngaahi meʻa ʻoku ou faí?” Naʻe feinga ʻa Paula ke hivaʻi ʻa e foʻi lea kotoa pē ke mahino. Naʻá ne fakakaukau pē ʻoku fanongo mai ʻa Sīsū.

ʻI he vaeuaʻanga ʻo e foʻi hivá, naʻe sio ʻa Paula ki ha taha ʻokú ne fakaava mai ʻa e matapā ʻi mui ʻi he falelotú. Naʻe hū mai ha kiʻi tamasiʻi ko Maʻake. Naʻá ne ʻi ai mo hono fāmilí. Naʻe sio ʻa Maʻake ki he hiva ʻa e fānau kehé. Naʻá ne mataʻi loto-mamahí.

Ne fakakaukau ʻa Paula mahalo pē ʻokú ne loto mamahi ʻi heʻene tōmui maí,. Naʻe kamata ke lue māmālie hake ʻa Maʻake ki he tuʻunga malangá.

Naʻe manatuʻi ʻe Paula ʻa e fuofua taimi naʻá ne haʻu ai ki he Palaimelí. Naʻá ne fiefia ʻi he tangutu ʻa e kakai kehé ʻi hono tafaʻakí pea naʻa nau angalelei.

Naʻe loto ʻa Paula ke tokoni kia Maʻake. Naʻá ne taʻataʻalo kia Maʻake ke haʻu kiate ia. “Haʻu ki heni!” Naʻe fafanaʻi atu pē ʻe Paula.

Naʻe lue fakavave hake ʻa Maʻake ki he tuʻunga malangá. Naʻe fakaʻatā ʻe Paula ha feituʻu maʻa Maʻake.

Naʻá ne fāʻofua kia Maʻake. Naʻe fanafana ange ʻa Paula, “Fakamālō atu ʻi hoʻo haʻú.”

Naʻe malimali ange ʻa Maʻake kia Paula.

Ne vave pē e ʻosi ʻa e foʻi hivá. Naʻe tangutu fakataha hifo ʻa Paula mo Maʻake. Naʻe fiefia ʻa Paula ʻi heʻene lava ʻo tokoniʻi hano kaumeʻa ke ne ongoʻi ʻoku ʻofaʻi mo talitali lelei ia.