Ngaahi Kaungāmeʻa Foʻou
ʻOku nofo ʻa e tokotaha naʻá ne faʻú ʻi ʻIutā, USA.
ʻOku ʻikai ke poto ʻa Pilīsita he lea faka-Sipēnisí. ʻE anga fēfē haʻane fetaulaki mo ha taha?
“Ko e muli au, pea naʻa mou fakaafeʻi au” (Mātiu 25:35)
Naʻe sio fakamamaʻu ʻa Pilīsita ki tuʻa ʻi he matapā sioʻata ʻo e kaá ʻi he lele atu hono fāmilí ʻi he ngaahi hala fāsiʻi ʻo Kalakasi, Venesuelá. Naʻe fakaʻofoʻofa e ngaahi ʻapí pea lau maʻuiʻui e ʻotu moʻungá. Ko ha feituʻu fakaʻofoʻofa ia. Naʻe pehē ʻe Mami mo Teti ko ha moʻui foʻou ʻa ʻenau nofo ʻi aí.
Ka naʻe kei ongoʻi hohaʻa pē ʻa Pilīsita. Ko e fuofua taimi ʻeni ke nau ʻalu ai ki he lotú ʻi honau fonua foʻoú.
Naʻe tafoki hake ʻa Mami kia Pilīsita. Naʻá ne fehuʻi ange “ʻOkú ke sai pē?” “Hangē pē ʻokú ke mata mamahí.”
Naʻe ʻʻāākituʻa pē ʻa Pilīsita. “ʻOku ou ilifia. ‘Oku ʻikai ke u lava ʻo lea faka-Sipēnisi. ʻE fēfē hano maʻu haku ngaahi kaungāmeʻa?”
Naʻe ala atu e Fineʻeikí ʻo puke e nima ʻo Pilīsitā. “ʻOku ou ʻiloʻi pē ʻokú ke hohaʻa. Ka ʻe lelei e meʻa kotoa. Kiʻi mihi fakamānavaloloa.”
Naʻe hila hifo ʻa Pilīsita ki hono ongo nimá. Ne mokoʻīʻī neongo naʻe māfana ʻa tuʻa. Naʻe vave ange e tā hono mafú, pea naʻe ongoʻi kete kovi ʻi he afe atu ʻa e kaá ki he tauʻanga meʻalele ʻa e siasí. ʻE fēfē nai ʻa e lotú? ʻE mahino nai kiate ia ha meʻa?
Naʻe ongoʻi ʻe Pilīsita ko ha sola ia ʻi heʻene hū atu ki he falelotú. Naʻá ne sio takai holo ʻi he ngaahi fāmili kehé, ʻoku nau lea faka-Sipēnisi kotoa. Naʻá ne fakatokangaʻi ha ongo tamaiki fefine ʻoku nau toʻu.
ʻI he fakatokangaʻi pē ʻe he ongo tamaiki fefiné ʻa Pilīsitá, naʻa na fakatovave atu ki ai. Naʻe vave ʻena leá mo leʻo fiefia, mo malimali lahi.
Ka naʻe ʻikai mahino kiate ia e meʻa naʻá na lea ʻakí. Naʻá ne fakakaukau pe te na mavahe ʻi haʻana ʻilo ʻoku ʻikai ke u poto he lea faka-Sipēnisí?.
Naʻe mihi fakamānava loloa ʻa Pilīsita. Naʻá ne pehē atu mo kalokalo pē hono ʻulú No hablo español,. “‘Oku ʻikai ke u lava ʻo lea faka-Sipēnisi.” Naʻe kamata ke ne fakatō loʻimata.
Naʻe mahiki e uma ʻo e ongo tamaiki fefiné mo toe mamali lahi ange. Naʻe tuhu e taʻahine ʻe tahá kiate ia ʻo pehē ange, “Taiana.” Naʻá ne tuhu leva ki he taʻahine ʻe tahá ʻo pehē ange, “ʻAnitulia.”
Naʻe kamata ke mole atu e loto hohaʻa ʻa Pilīsitá. Naʻá ne malimali ki he ongo tamaiki fefiné peá ne tuhu kiate ia. “Pilīsitá.”
Naʻe tangutu hifo ʻa Taiana mo ʻAnitulia ʻi he tafaʻaki ʻo Pilīsitá. Naʻá na akoʻi ia ki hono lea ʻaki e “folofolá” ʻi he lea faka-Sipēnisí mo ha ngaahi foʻi lea kehe. ʻI he kamata ʻa e houalotu sākalamēnití, naʻe ongoʻi māfana mo nonga ʻa Pilīsita.
ʻI he tuku ʻa e Palaimelí, naʻe tangutu ʻa Pilīsita mo hono ongo kaungāmeʻa foʻoú ʻi he musie ʻi tuʻa ʻi he ʻapi siasí kae pōtalanoa ʻenau ongomātuʻá. Naʻe akoʻi ʻe Taiana mo ʻAnitulia kia Pilīsita ha ngaahi lea faka-Sipēnisi lahi ange. Naʻe tuhu ʻa Taiana ki ha fuʻu ʻakau peá ne fehuʻi ange, “Inglés?”
Naʻe malimali ʻa Pilīsita mo tuhu foki mo ia ki ai. Naʻá ne pehē ange, “Fuʻu ʻakau.” Naʻá ne fiefia mo tuhu ki ha ngaahi meʻa kehe, ʻo ne lea ʻaki e ngaahi lea faka-Pilitāniá. Naʻe angimui mai leva ʻa Taiana mo ʻAnitulia ki he ngaahi foʻi lea faka-Pilitāniá. Naʻá na akoʻi leva kia Pilīsita ʻa e anga hono puʻaki kinautolu ʻi he lea faka-Sipēnisí. Naʻe ako ʻe Pilīsita ʻa e ngaahi foʻi lea kotoa pē ʻoku ʻaongá, hangē ko e libro (tohi), casa (fale), mo e coche (kā). Ka ko e foʻi lea lelei taha naʻá na akoʻi kiate ia ʻa e anga hono lea ʻaki e amigos (ngaahi kaungāmeʻa).
Naʻe vave pē taimi ke nau foki ai ki ʻapí. Naʻe taʻataʻalo fakamāvae atu ʻa Pilīsita kia Taiana mo ʻAnitulia.
“Naʻe fēfē ho fuofua ʻaho ʻi he lotú ʻi Venesuelá?” Ko e fehuʻi ange ia ʻa e Tangataʻeikí.
Naʻe malimali ʻa Pilīsita. “Naʻe fakafiefia! Naʻe maʻu haku ngaahi kaungāmeʻa. Naʻá na akoʻi au ki he lea faka-Sipēnisí!”
Fakaʻofoʻofa ʻaupto ia! ʻOku ou fiefia lahi ne ke maʻu ha ʻaho lelei.
Naʻe fakakaukau ʻa Pilīsita ki he anga hono talitali lelei ia ʻe Taiana mo ʻAnituliá. Naʻe ʻikai ke ne toe ongoʻi ko ha muli ia. Naʻá ne ʻiloʻi naʻe tokoniʻi ia ʻe he Tamai Hēvaní ke ne maʻu ha ngaahi kaungāmeʻa. Naʻe ʻikai ke ne faʻa tatali ke ʻilo e meʻa te ne ʻausia ʻi heʻene nofo ʻi Kalakasí!
Ngaahi tā fakatātā ʻa Julia Castaño