Ko e Lēsoni ʻo e Fakamalu Tevoló
ʻOku nofo ʻa e tokotaha naʻá ne faʻu e talanoá ʻi Pevalia, Siamane.
Naʻe palōmesi ʻa ʻEni mo e niʻihi kehé te nau hoko ko ha kau fanongo lelei.
“Pea ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē” (Molonai 10:5)
Ne fiefia ʻaupito ʻa ʻEni. Naʻe ʻamanaki ke ʻalu ʻa Mami ʻo toli fakamalu tēvolo vao mo hono kaumeʻa ko Misi Malia. Pea naʻá ne pehē ʻe lava foki ke ʻalu mo ʻEni! Naʻe kau atu ki ai mo e tokotolu hono tokouá mo e tuongaʻane kuo motuʻa feʻungá.
Ki muʻa pea nau mavahé naʻe talaange ʻe he Fineʻeikí ʻoku “lelei.” “ʻOku ou fakangofua ke mou haʻú koeʻuhi ʻoku ou ʻiloʻi ʻoku mou lava ke hoko ko e kau fanongo lelei moʻoni. ʻOku mahuʻinga ʻaupito ia lolotonga ʻetau kumi e fakamalu tēvoló. ʻOku ifo ha ngaahi fakamalu tevolo vaó ʻe niʻihi. Ka ʻoku ʻi ai ha ngaahi fakamalu tēvolo ʻoku kona ʻaupito. Te nau ʻai koe ke ke puke. Ko ia ai ʻe lava ke mou palōmesi kotoa ke fai ʻa e meʻa ʻoku lea ʻaki ʻe Misi Maliá?”
“ʻIo!” Ko e kaila ia ʻa ʻEni mo hono ngaahi tokouá mo e tuongaʻané. Naʻe toʻo ʻe ʻEni, ʻŌtomu, Kitione, mo ʻAtelaite ʻenau ngaahi kató pea lue ki he vaotaá ke feʻiloaki mo Misi Malia.
Ko Misi Maliá ko ha mataotao ia ʻi he fakamalu tēvoló. Naʻʻá ne ʻosi ako ki he founga ke maʻu ai ha fakamalu tēvolo ʻoku sai ke kai ʻi he Vaotā Pevalia ʻi Siamané.
“ʻEi, kau leka!” Ko e lea ange ia ʻa Misi Maliá. “Ko hai ʻoku mateuteu ke kumi ha fakamalu tēvolo?”
Naʻe kaila fiefia ʻa ʻEni mo hono ngaahi tokouá mo e tuongaʻané. “ʻKo au! Ko au!”
“Sai ʻaupito!” Ko e lea ange ia ʻa Misi Maliá. “Manatuʻi, te ke lava pē ʻo ala pe fili ʻa e fakamalu tēvolo ʻoku ou tala atu ʻoku ʻikai koná.”
Naʻe toe palōmesi ʻa ʻEni mo e niʻihi kehé te nau hoko ko ha kau fanongo lelei. Pea naʻa nau muimui leva ʻia Misi Malia ki he vaotaá.
Naʻe ulo lahi e laʻá ʻi heʻenau lue atu he feituʻu hauhau ai e kelekelé. Naʻe fonu fakamalu tēvoló e feituʻú kotoa! Naʻe ʻi ai ha fakamalu tēvolo lanu moli, hinehina, kulokula, mo e melomelo. Naʻe lalahi ha niʻihi. Naʻe iiki ha niʻihi.
Ko e fakamalu tēvolo lanu kulokula tapa hinehiná naʻe saʻia taha ai ʻa ʻEní. Naʻa nau fakamanatu kiate ia ʻa e ngaahi fanangá. Ka naʻá ne fakafanongo ʻi he taimi naʻe talaange ai ʻe Misi Malia ke ʻoua naʻá ne ala kiate kinautolú. Naʻe fakaʻofoʻofa e ngaahi fakamalu tēvolo ko iá ka naʻa nau fuʻu kona ʻaupito!
Naʻe tataki fakalelei kinautolu ʻe Misi Malia. Naʻe fanongo fakalelei ʻa ʻEni mo hono ngaahi tokouá mo e tuongaʻané, ʻo hangē pē ko ʻenau palōmesí.
Naʻa nau tokoni foki ʻi ha ngaahi founga kehe. Naʻe faitaaʻi ʻe ʻŌtomu e ngaahi fakamalu tēvoló. ʻI he taimi naʻe maʻu ai ʻe Misi Malia ha ngaahi fakamalu tēvolo ʻoku feʻunga ke kaí, naʻe tuʻusi fakalelei leva ʻe Kitione ʻa e kaú. Naʻe faʻo leva ia ʻe ʻEni mo ʻAtelaite ʻi ha ngaahi kato.
Ne hoko leva e taimi ke nau foki ai ki ʻapí. Naʻe fakamanatu ange ʻe Misi Malia ke fufulu honau nimá ʻaki ha koa mo ha vai ʻi he taimi pē te nau aʻu ai ki ʻapí.
Naʻe lea ange ʻa ʻEni, “Fakamālō atu ʻi hoʻo tataki kimautolu ʻi he vaotaá mo tokoniʻi kimautolu he fakamalu tēvoló.”
Ne malimali ʻa Misi Malia. “Fakamālō atu kiate kimoutolu ʻi hoʻo mou hoko ko e kau fanongo leleí!”
ʻI he maʻu meʻatokoni efiafi ʻi he pō ko iá, naʻe haka ʻe Teti ʻa e pateta, sōsisi, mo e fuaʻimoa mo ha meʻakai makehe ʻaupito. Ko e fakamalu tēvolo!
Naʻe kai pē ʻa ʻEni mo pehē ange, “Ifo atu.” “ʻOku ifo ʻaupito ʻeni!”
Naʻe tala ange ʻe Mami, “Ko ha meʻa lelei hono ʻiloʻi ʻe Misi Malia e fakamalu-tēvolo ʻoku sai ke kaí.”
Naʻe tala ange ʻŌtomu, “Ko e meʻa lelei ʻemau fanongo ki he meʻa naʻe talamai ʻe Misi Maliá!”.
Naʻe kiʻi fakakaukau taimi nounou ʻa ʻEni. “ʻIkai nai ʻoku tatau ʻeni mo e founga ʻoku fie maʻu ai ke tau fanongo ki he Laumālie Māʻoniʻoní?” Naʻe teuteu ʻa ʻEni ke fakahoko hono papitaisó mo e hilifakinimá. Naʻá ne ako ki he ʻuhinga ʻo hono maʻu e meʻafoaki ʻo e Laumālie Māʻoniʻoní.
Naʻe kamo atu e Fineʻeikí. “Ko ia! ʻE lava ke tokoniʻi kitautolu ʻe he Laumālie Māʻoniʻoní ke tau ʻiloʻi ʻa e meʻa ʻoku totonu mo leleí. ʻO hangē pē ko e founga naʻe tokoniʻi ai kimautolu ʻe Misi Malia ke mau ʻiloʻi e fakamalu tēvolo ʻoku lelei ke kaí.”
Naʻe pehē ʻe he Tangataʻeikí, “ʻOku mahuʻinga ke fanongo fakalelei ki he Laumālie Māʻoniʻoní.”
Naʻe pehē ange e Fineʻeikí, “Ko ia kotoa.”
Naʻe pehē ʻe ʻEni, “ʻOku ou fiefia ʻe lava e Laumālie Māʻoniʻoní ʻo tokoni ke tau hao.” Hili iá, naʻá ne malimali mo kai lahi e fakamalu tēvoló he naʻe ifo.
Tā fakatātā ʻa Simini Blocker