Ko ha Pōpoaki Konifelenisi mei he Palōfitá
Ko Hono Ma‘u ha Nonga ‘i Ho Lotó
Fai ʻe Palesiteni Russell M. Nelson
Toʻo mei he “Ko Hono Malanga ʻAki ʻo e Ongoongolelei ʻo e Melinó” mo e “Ko e Mālohi ʻo e Ivi Fakalaumālié,” Liahona, Mē 2022.
ʻOku ou ʻofa mo lotua kimoutolu ʻi he ʻaho kotoa pē. ʻOku lahi ha ngaahi faingataʻa ʻi he māmaní. Kuo uesia ʻe he fekeʻikeʻí mo e mahaki fakaʻauhá ha kakai tokolahi. ʻOku fie maʻu tokoni ʻa e māmaní.
Ko Sīsū Kalaisi ʻa e Pilinisi ʻo e Melinó Ko ʻEne ongoongoleleí ʻa e founga tuʻuloa pē ʻe taha ke maʻu ai ʻa e nongá. ʻOku tau fie maʻu ʻi he taimí ni ʻo lahi ange ʻi ha toe taimi, ʻa e melino ko Ia toko taha pē te Ne lava ʻo ʻomí.
ʻOku totonu ke fokotuʻu ʻe he kau muimui ʻo Sīsū Kalaisí ʻa e sīpinga ke muimui kotoa ki ai ʻa e māmaní. Te tau ʻamanaki fēfē ke maʻu ʻa e melinó ʻi he māmaní kae ʻoua kuo tau fekumi ki he melinó ʻi heʻetau moʻui pē ʻatautolú? He ʻikai lava ʻe ha taha ʻo puleʻi ʻa e tōʻonga ʻa e niʻihi kehé. Ka te tau lava ʻo mapuleʻi pē kitautolu takitaha.
Kātaki ʻo fai ʻa e meʻa kotoa pē te ke lavá ke fakangata ʻa e ngaahi fepakipaki ʻi hoʻo moʻuí. Ke ke loto-fakatōkilalo, loto-toʻa, mo mālohi. ʻE tokoni ia ke ke fakamolemoleʻi ai ʻa e niʻihi kehé pea fekumi ki ha fakamolemole ʻi he taimi naʻá ke fai ai ha meʻa halá. Kole ha mālohi meia Sīsū Kalaisi mo ʻEne Fakaleleí ke tokoniʻi koe.
Ko e Kalaisí ʻa Sīsū! ʻOkú Ne moʻui! ʻOkú Ne ʻofa ʻiate koe pea te Ne tokoniʻi koe.
Faka‘osi ‘a e Talanoá
Ko e hā ʻokú ke fai ʻi he taimi ʻoku hoko ai ha fekeʻikeʻi mo ha tokoua, tuofefine/tuongaʻane, pe kaungāmeʻa? Fili ha taha ʻo e ngaahi fakatātā ʻi laló. Hili iá pea tā ha fakatātā pe tohi fekauʻaki mo e founga te ke lava ai ʻo maʻu ʻa e melinó.