Ko e Sivi Ngāué
Pau pē ʻoku fehalaaki ʻeni!
“Ko e hā e faʻahinga ngāue ʻokú ke fie fakahoko ʻi hoʻo fuʻu lahí?” Ko e fehuʻi ange ia ʻa Mrs. Liu ki he kalasí.
Na‘e faingofua ke tali ʻeni! Naʻá ku fie hoko ko ha tokotaha saienisi. Naʻá ku fakakaukauloto ʻoku ou tui ha kote leepi mo fai ha ngaahi fakatotolo fakaofo.
Naʻe pehē ʻe Mrs. Liu, “Te mou takitaha sivi he komipiutá he ʻahó ni ke talaatu ʻa e ngaahi ngāue te mou ala fiefia ai ʻi ha ʻahó.”
Ne ʻikai fuoloa kuó u ʻi he komipiutá, ʻo fai ʻeku siví. Naʻá ku tali kotoa e ngaahi fehuʻí peá u mihiʻi ʻeku mānavá ʻi heʻeku aʻu ki he meʻalomi “ʻosí.”
Tokotaha saienisi! Tokotaha ʻaati! Tokotaha puna vaka vavā! Naʻá ku fakakaukau pehē ʻi hono load hake ʻa e ngaahi olá. ʻE fakaofo e ngaahi ngāue ko iá.
Ka naʻe ʻikai ʻasi ʻi he ngaahi olá ha taha ʻo e ngaahi ngāue ko iá. Naʻá ku sio ki he lisí. Naʻe ongo ngali fakalata ʻa e tokotaha fokotuʻutuʻu ʻo e ʻū ʻatá. Naʻe ʻikai ke u fuʻu fakapapauʻi fekauʻaki mo e tangata taʻó. Pe tokotaha palani ʻo e ngaahi meʻa ʻoku hokó.
Ko e meʻa fakaʻohovale tahá ʻa e ola māʻolunga tahá. Naʻá ne talamai te u fiefia taha ʻi heʻeku … ko ha tokotaha fakatau matalaʻiʻakau.
Ko e hā?! Ko ha taha ʻokú ne fokotuʻutuʻu e matalaʻiʻakaú? Naʻá ku fakakaukau. Pau pē ʻoku fehalaaki ʻeni!
Ka naʻá ku ʻiloʻi ne u ʻosi tali totonu ʻa e fehuʻi takitaha. Naʻe ongoʻi mafana hoku matá. Naʻe ʻikai ke u loto ke sio hoku ngaahi kaungāmeʻá ki heʻeku ngaahi olá, ko ia naʻá ku fakavavevave leva ʻo tāpuniʻi ʻa e komipiutá.
Naʻe pehē mai ʻe hoku kaungāmeʻa lelei taha ko Tení, “Tōatu! Ko ʻeku ola māʻolunga tahá ko e tokotaha fokotuʻutuʻu uepisaití!”
Ne u pehē ange, “Fakalata ia. Ka ʻokú ke pehē ʻoku tonu ʻaupito e sivi ko ʻení fekauʻaki mo e ngāue ʻoku totonu ke tau faí?”
Naʻe pehē ange ʻe Teni, “Ko ha sivi pē ia. Ko e hā hoʻo ngāue māʻolunga tahá?”
Naʻá ku manavasiʻi. “Mahalo ʻoku hala ia. Ka naʻá ne talamai ʻoku totonu ke u hoko ko ha tokotaha fakatau matalaʻiʻakau.”
Naʻe hoko ʻo moʻoni ʻeku ngaahi manavasiʻi kovi tahá. Naʻe kamata ke kata ʻa Teni.
“Naʻá ku ʻilo pē te ke fie fili matalaʻiʻakau ʻi haʻo ngāue! Naʻá ke saiʻia maʻu pē ʻi he ngaahi meʻa faikehe peheé,” ko e fakakata atu ia ʻa Tení.
“ʻIkai ʻAupito!” Naʻá ku tali fakaʻita atu. “ʻOku ʻikai ke u saiʻia au he matalaʻiʻakaú.”
Naʻe malimali ʻa Teni peá ne tafoki ki heʻene komipiutá. Naʻe kamata ke mamahi hoku keté. Naʻá ku fuʻu mā ʻaupito. Naʻe moʻoni nai e siví? Naʻe moʻoni nai ʻa Teni?
ʻI heʻeku lue ki ʻapi mei he akó, naʻá ku kei ongoʻi mā pē ʻi he ngaahi ola ʻo ʻeku siví. Naʻá ku fakakaukau ki he ngaahi meʻa kotoa naʻá ku manako hono fakahokó, hangē ko e ngaohi e meʻa fakaʻātí mo e tā pianó. Naʻe kehe ʻaupito ia mei he ngaahi meʻa naʻe saiʻia ai ha niʻihi ʻo e tamaiki tangata kehe ʻi heʻeku kalasí.
Naʻá ku fakakaukau, mahalo pē ʻoku ou faikehe. Ne loʻimataʻia hoku matá ʻi heʻeku hū atu ki lotó.
“Ko e hā e meʻa ʻoku hokó, Sefi?” Ko e fehuʻi mai ia ʻa Tetí. “Naʻe hoko ha meʻa ʻi he akó?”
Naʻá ku tangutu hifo ʻo fakamatala ange fekauʻaki mo e sivi ngāué mo ʻeku ongoʻi faikehekehe mei he tokolahi ʻo e tamaiki tangata kehé.
Naʻá ne pehē mai, “Sefi, ʻokú ke ʻilo, naʻe foaki atu ʻe he Tamai Hēvaní hoʻo ngaahi talēniti. ʻOkú Ne ʻofa ʻiate koe mo finangalo ke ke fakatupulaki kinautolu. Pea ʻoku ou ʻofa ʻiate koe foki! ʻOku ʻikai ke ke faikehe ʻi hoʻo saiʻia ʻi he ngaahi meʻa kehe mei hoʻo ngaahi kaungāmeʻá.”
“Moʻoni?” Naʻá ku fehuʻi ange.
Ne kamokamo mai ʻa Teti. “ʻOku totonu ke tau kehekehe kotoa pē. ʻOku ou fie maʻu ke ke ʻofa ʻiate koe pē ʻi he tuʻunga ʻokú ke ʻi aí. Pea manatuʻi, ko e siví ke ʻoatu pē ha ngaahi fakakaukau ki he meʻa ʻe ala ke ke fie faí. ʻOku ʻikai ʻuhinga ia ʻe pau ke ke iku ki ha taha ʻo e ngaahi ngāue ko iá. ʻOkú ke fai pē ʻe koe hoʻo ngaahi filí. Ka ʻo kapau ʻe ʻi ai ha ʻaho te ke fili ai ke hoko ko ha tokotaha fakatau matalaʻiʻakau, ʻoku ou tui te ke sai ʻaupito ai!”
“Mālō, Teti.” Naʻá ku fāʻofua atu kiate ia. Naʻe ʻikai ke toe ongoʻi mamahi hoku keté.
ʻI he ʻaho hono hokó ʻi he akó, naʻe tangutu ʻa Teni ʻi hoku tafaʻakí he maʻu meʻatokoni hoʻataá. Naʻá ne pehē mai, “Hei, Sefi. Fakamolemole atu ʻi heʻeku kataʻi koé. ʻOku ou tui te ke tōatu ʻi ha faʻahinga ngāue pē te ke fakahokó!”
Naʻá ku pehē ange, “Mālō, Teni. Ko hai ʻokú ne ʻilo—mahalo pē ʻe ʻi ai haʻaku falekoloa matalaʻiʻakau pea te ke faʻu e uepisaiti maʻa ʻeku falekoloá!”
Naʻe malimali pē ʻa Teni mo pehē ange, “ʻE pau ia. Mahalo pē foki te u hoko ko e fuofua tokotaha ke fakataú!”
Tā fakatātā ʻa Mark Robison