Ko Hono Maluʻi ʻo Lūfasí
Naʻe kai ʻe ʻEsitela ʻene konga ʻenisilata fakaʻosi ne ngaohi ʻe Mamá pea naʻá ne tekeʻi ke mavahe hono seá mei he tēpile ʻo e fakafaletoló. Ko ha pō māfana lelei ia ʻo e faʻahitaʻu māfaná—ʻa ia naʻe lelei ki he maʻu meʻatokoni ʻi tuʻá. Pea fakaʻofoʻofa ki he vaʻingá! Naʻe ʻikai ke ne faʻa tatali ke vaʻinga mo ʻene kulī, ko Lūfasí.
Ka ne pau ke ne ʻuluaki fakaʻataʻatā e tēpilé. Naʻá ne fokotuʻutuʻu e ʻū peletí ki ha fokotuʻunga māʻolunga. Naʻá ne ʻiloʻi naʻe fakaʻau ke sēlue ʻa e ʻū peleti ne fokotuʻú. Ka naʻe ʻikai ke ne fie toutou fefokiʻaki ki loto.
Naʻe fakapalanisi ʻe ʻEsitela ʻa e ʻū peletí ʻi he nima ʻe taha pea fakaava fakalelei ʻa e matapaá ʻaki e nima ʻe tahá. Ka naʻe kamata ke kiʻi tō ʻa e fokotuʻunga peletí. Mafahi! Naʻe mafahi ha ongo peleti ʻe ua ki he fakafaletoló, ʻi muʻa tonu pē ʻi he matapaá. Naʻe lele atu ʻa e Teti ki tuʻa ke sio pe ko e hā e meʻa naʻe hokó pea ʻalu ke ʻomi ha taufale tafi fale. Naʻe sio atu ʻa ʻEsitela kia Lūfasi. Naʻá ne lele fakahangatonu atu ki he matapaá.
“Lūfasi! ʻOua naʻá ke tuʻu ʻi he ngaahi kongokonga peleti mafahifahí!” Naʻá ne lele takai ʻi he tēpilé ʻo puna ʻi muʻa ʻiate ia. “ʻIkai! Lūfasi, nofo maʻu!”
Ka naʻe ʻikai tuʻu maʻu ʻa Lūfasi. Naʻá ne feinga ke takai hake ʻi ai. Naʻe punou hifo ʻa ʻEsitela ʻo hiki hake hono ongo nimá ʻi muʻa ʻiate ia [ke taʻofi ia].
Naʻá ne pehē ange, “Lūfasi, ʻoku ou feinga ke maluʻi koe. ʻOku māsila ʻa e ngaahi kongokongá. Te nau fakalaveaʻi ho ngaahi vaʻé.”
Fakafokifā kuo maʻu ʻe ʻEsitela ha foʻi fakakaukau. “Ko e fē hoʻo foʻi pulú? ʻOkú ke fie vaʻinga?” Naʻe tafoki atu ʻa Lūfasi ke fakasio ʻene foʻi pulú. Kuó ne malu leva he taimí ni!
ʻI he taimi naʻá ne tafiʻi ai mo Teti ʻa e ʻū peleti kuo mafahifahí, naʻe fakakaukau ʻa ʻEsitela ki he ʻuhinga naʻá ne talaange ai kia Lūfasi ʻikaí. Kapau naʻá ne tuʻu ʻi he ngaahi kongokongá, naʻá ne mei lavea. He ʻikai ke ne lava ʻo fai e meʻa naʻá ne saiʻia ke faí—hangē ko e vaʻingá.
Naʻe pehē maʻu pē ʻe Teti ʻoku ʻomi ʻe he Tamai Hēvaní ʻa e ngaahi fekaú ke tau fiefia mo malu ai. Ka naʻe faʻa fakakaukau ʻa ʻEsitela he taimi ʻe niʻihi naʻe hangē ange ʻa e ngaahi fekaú ia ha ngaahi tuʻutuʻuni ke taʻofi ia mei hono fai e meʻa naʻá ne fie maʻú.
Naʻe sio hifo ʻa ʻEsitela ki he ngaahi kongokonga kuo mafahifahí. Naʻá ne fakakaukauʻ o pehē, Mahalo pē ʻoku ʻikai mai ʻa e Tamai Hēvaní ki ha ngaahi meʻa ʻe niʻihi koeʻuhí ʻokú Ne feinga ke maluʻi mo au foki.
Naʻe lele ʻa Lūfasi kia ʻEsitela ʻo lī ʻa e foʻi pulú ʻi hono vaʻé. Naʻá ne vaku hono ongo telingá. Naʻá ne lī leva ʻa e foʻi pulú peá ne kata ʻi he lele ʻa Lūfasi ke tulimui aí.
Naʻe malu ‘a Lūfasi. Pea naʻá ne fiefia! Naʻe fie hokohoko atu ʻe ʻEsitela ʻene muimui ki he ngaahi fekau ʻa e Tamai Hēvaní ke nofo fiefia mo malu foki.
Ngaahi tā fakatātā ʻa Kelly Smith