Ngaahi ʻEkitivitī ki he Haʻu, ʻo Muimui ʻIate Aú
Ki he efiafi ʻi ʻapí, ako folofolá, pe ke maʻu ai e fiefiá!
Langa ha Tāpanekale
Ki he ʻEkesōtosi 35–40; Levitiko 1; 16; 19
Talanoa: Naʻe kole ʻe he ʻEikí kia Mōsese mo hono kakaí ke nau langa ha tāpanekale. ʻOku hangē ʻa e tāpanekalé ko ha temipalé. Naʻe fakahā ange ʻe he ʻEikí ke nau langa ia ʻo hangē ha tēnití koeʻuhí ke nau ʻave ia mo kinautolu ʻi heʻenau fononga ki he fonua ʻo e talaʻofá. Te ke lava ʻo lau ia ʻi he ʻEkesōtosi 39:33–43.
Hiva: “Fie Siofia Ha Temipale” (Tohi Hiva ʻa e Fānaú, 99)
ʻEkitivitī: Langa ha tēniti ʻo hangē ko e tāpanekalé. Te ke lava ʻo fakaʻaongaʻi ha ngaahi sipi kafu, taueli, mo ha toe meʻa kehe pē ʻi hoʻo ʻapí. Hili ia peá ke tangutu ʻi hoʻo tēnití ʻo talanoa ki he ʻuhinga ʻoku mahuʻinga ai ʻa e ngaahi temipalé. Pe te ke lava ʻo faʻu ha kiʻi tāpanekale siʻisiʻi ʻaki ha ʻū poloka pe ngaahi meʻa kehe.
Vaʻinga Houngaʻiá
Ki he Nōmipa 11–14; 20–24
Talanoa: Taimi ʻe niʻihi naʻe ngalo ʻi he kau ʻIsilelí ʻa e founga naʻe tokoniʻi ai kinautolu ʻe he ʻEikí. ʻOku finangalo ʻa e ʻOtuá ke tau manatuʻi ke tau houngaʻia. ʻOkú ne ʻai ke tau fiefia ange foki!
Hiva: “ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16–17)
ʻEkitivitī: Fai ha kiʻi vaʻinga houngaʻia! Fakaʻilongaʻi ha ngaahi vaʻakau ʻe niʻihi ʻaki ha taha ʻo e ngaahi lanu ʻe tolú. Hili iá pea taufetongi ʻi hono fili ha vaʻakaú. ʻI he lanu ʻe taha, fakahingoa ha tokotaha ʻokú ke houngaʻia ai. ʻI he lanu ʻe tahá, lea ʻaki ha feituʻu ʻokú ke houngaʻia ai. ʻI he lanu hono tolú, lea ʻaki ha meʻa ʻokú ke houngaʻia ai.
Pāsolo ki hono Tānaki ʻo ʻIsilelí
Ki he Teutalōnome 6–8; 15; 18; 29–30; 34
Talanoa: ‘Oku ‘ofa ‘a e ‘Otuá ‘i Heʻene fānau kotoa pē. ʻOkú Ne finangalo ke tānaki fakataha kinautolu ʻi Hono Siasí. Ko e konga ʻo hono tānaki ʻo ʻIsilelí ko hono fakafoki mai e fānau ʻa e ʻOtuá kiate Iá (vakai, Teutalōnome 30:3).
Hiva: “ʻIsileli, ʻIsileli, ʻOku Ui ʻa e ʻOtuá,” (Ngaahi Himi, fika 7)
ʻEkitivitī: Kosi ʻo toʻo ʻa e ngaahi kongokonga pāsoló ʻi he peesi 27. Hili iá pea ʻai ha taha ke ne fūfuuʻi takai ʻa e ngaahi kongá ʻi he lokí. ʻAi ke kumi ʻe he taha kotoa ʻa e ngaahi kongá. Hili hono fakatahatahaʻi kotoa ʻo e ngaahi kongokongá, fokotuʻutuʻu fakataha leva ʻa e pāsoló. Ko e hā e ʻuhinga ʻoku finangalo ai e ʻOtuá ke foki kotoa ange ʻEne fānaú kiate Iá?
Ngaahi Foʻi Maka Fakamanatú
Ki he Sōsiua 1–8; 23–24
Talanoa: Naʻe tokoniʻi ʻe he ʻOtuá ʻa Sosiua ke vaeuaʻi e Vaitafe Soataní kae lava ʻa e kakaí ʻo kolosi ʻi he kelekele mōmoá. Naʻe kole leva ʻe he ʻOtuá kia Sosiua mo hono kakaí ke nau tānaki ha ngaahi foʻi maka mei he vaitafé ke nau manatuʻi e founga naʻe tokoniʻi ai kinautolu ʻe he ʻOtuá (vakai, Sōsiua 4:5–7).
Hiva: “Feituʻu ʻoku ʻI ai ʻa e ʻOfá” (Tohi Hiva ʻa e Fānaú, 76)
ʻEkitivitī: Kumi ha ngaahi foʻi maka ke vali pe valivali. Tohiʻi ʻa e foʻi lea manatuʻi ʻia kinautolu. Lolotonga hoʻo teuteuʻi kinautolú, talanoa ki he ngaahi founga kuo tokoniʻi ai koe ʻe he ʻOtuá.
Ngaahi tā fakatātā ʻa Katy Dockrill