Ko e Fili ʻi he ʻAkapulú
Naʻe fie vaʻinga ʻakapulu ʻa Samu, ka naʻá ne toe fie maʻu foki ke tauhi e ʻaho Sāpaté ke māʻoniʻoni.
Naʻe siofi ʻe Samu ʻa e foʻi pulu kulokulá ʻi heʻene haʻu kiate iá. Naʻá ne hapo ia ʻo hangē pē ko ʻene akoako mo Tetí. Ko hono ʻuluaki ʻaho ia ʻi he ako vaʻinga ʻakapulú pea mo e fuofua taʻu ke ne vaʻinga ai ʻi ha timi.
ʻI he fakaʻosinga ʻo e ako vaʻingá, naʻe taʻataʻalo ʻa Samu ki heʻene kaungā vaʻingá.
Naʻe pehē ange ʻe ha taha ʻo kinautolu, “Tau toki fetaulaki he uike kahaʻú!”
Naʻe kaka hake ʻa Samu ki he kā ʻa Mamí ke foki ki ʻapi.
Naʻe pehē ange ʻe Mami, “Ne u toki ʻiloʻi ko e ngaahi vaʻinga ki hoʻomou timi ʻakapulú ʻoku fai ia he ngaahi ʻaho Sāpaté. ʻOkú ke pehē ko e hā e meʻa ʻoku totonu ke ta faí?”
Naʻe fakalongolongo ʻa Samu. Kapau ʻe ʻalu ki he lotú he Sāpaté, he ʻikai ke ne toe vaʻinga ʻakapulu mo ʻene timí. Ka ʻo kapau te ne ʻalu ki heʻene ngaahi vaʻingá, mahalo he ʻikai ke ne lava ʻo aʻu ki he lotú. Naʻá ne fie maʻu ke fakahoko fakatouʻosi kinaua! Naʻá ne fehuʻi ange, “ʻE lava ke tau ō ki he ngaahi vaʻinga ʻoku fai kimuʻa he lotú?”
Naʻe pehē ange ʻe Mami, “ʻOku houa ʻe taha ke fakaʻuli ki he lotú. ʻIkai ngata aí, ʻoku tau fie maʻu ha taimi ke teuteu ai kimuʻa pea tau ʻalú.”
Naʻe ʻiloʻi ʻe Samu naʻe moʻoni ʻa Mami. Naʻe ʻi ai hono kiʻi tuofefine mo e tokoua siʻisiʻi. Ne taimi lōloa maʻu pē hono teuteuʻi e tokotaha kotoa ki he lotú.
Naʻe pehē ʻe Mami, “Ka ko e meʻa mahuʻinga tahá ʻa ʻetau fie fai ha ngaahi meʻa ʻi he Sāpaté ʻokú ne fakamanatu mai kiate kitautolu ʻa Sīsū Kalaisi mo e Tamai Hēvaní.” Hili ha miniti ʻe taha naʻá ne toe pehē ange, “Mahalo te ke lava ʻo ʻalu ki he ako ʻakapulú ʻi he ngaahi ʻaho Tuʻapulelulú pea ʻalu ki he lotú he ngaahi ʻaho Sāpaté.”
Naʻe sio ʻa Samu ki tuʻa ʻi he matapā sioʻatá. Naʻá ne saiʻia he ʻalu ki he lotú mo ako kau kia Sīsū ʻi he ngaahi ʻaho Sāpaté. Naʻá ne ʻilo ko e founga ʻe taha ke hangē ai ko Sīsū Kalaisí ko hono tauhi e ʻaho Sāpaté ke māʻoniʻoni. Ka te ne loto-mamahi ke liʻaki ʻene ngaahi vaʻinga ʻakapulú.
Naʻe ʻikai ʻilo ʻe Samu e meʻa ke faí. Fakafokifā kuó ne maʻu ha foʻi fakakaukau.
Naʻe talaange ʻe Samu, “Ta lotu ki ai. Te u fai ha lotu lolotonga hoʻo fakaʻulí.” Naʻá ne kūnima mo kuikui hono matá. Naʻe kiʻi ongo faikehe ke lotu ʻi he kaá. Ka naʻá ne ʻiloʻi te ne lava ʻo lotu ʻi ha feituʻu pē. ʻI heʻene lotú, naʻá ne fakamatalaʻi ai ki he Tamai Hēvaní ʻa e meʻa naʻe hokó.
Naʻá ne pehē, “Kātaki ʻo tokoni mai ke u fai ʻa e fili totonú.” ʻI heʻene ʻosí, naʻá ne pehē ʻēmeni. Naʻe pehē foki ʻe Mami ʻēmeni.
Naʻe ongoʻi ʻe Samu ha ongo māfana ʻi hono lotó. Naʻá ne ʻiloʻi ʻa e meʻa ke faí.
“Ko e hā hoʻo fakakaukaú?” Ko e fehuʻi ange ia ʻa Mamí.
“ʻOku ou fie ʻalu ʻo ako vaʻinga ʻi he Tuʻapulelulú pea lotu ʻi he Sāpaté.” Naʻe malimali ʻa Samu. “ʻOku ou ʻilo ʻoku mahuʻinga ke tauhi ʻa e Sāpaté ke makehe.”
Naʻe pehē ange ʻe Mami, “ʻOku ngali fakaʻofoʻofa ʻa e palani ko iá”
ʻI he uike ko iá, naʻe ʻalu ʻa Samu ki he ako ʻakapulú ʻi he ʻaho Tuʻapulelulú. Naʻá ne ʻalu ki he lotú he Sāpaté. Naʻá ne ako lahi ange ʻo kau kia Sīsū. Naʻe fiefia ʻa Samu ʻi he lava ke ne ʻalu ki he lotú mo e ʻakapulú fakatouʻosi, neongo ne ʻikai ke ne lava ʻo kau ʻi he ngaahi vaʻingá. Ne fakafiefia ke tauhi ʻa e ʻaho Sāpaté ke māʻoniʻoni.
Ngaahi tā fakatātā ʻa Ruth Bennett