Ngaahi Kaungāmeʻa Kemí
ʻI he kamataʻangá, naʻe ongoʻi ʻe ʻEtisoni naʻe ʻikai ke ne lata.
Naʻe ʻakahi ʻe ʻEtisoni ʻa e kelekelé. Naʻe talanoa kotoa e tamaiki tangatá mo fokotuʻu ha ngaahi tēniti. Ka naʻe ʻikai ke ne ʻiloʻi ha taha.
Naʻe ʻikai toe ʻalu e fāmili ʻo ʻEtisoní ki he lotú hili pē ha taimi nounou mei heʻenau hiki ki Sipeiní. Ka naʻe haʻu e tamaiki tangata mei he uōtí ʻo fakaafeʻi ia ke haʻu ki he polokalama kemí. Naʻe ongo fakafiefia ʻa e nofo kemí, ka kuo ʻikai fakapapauʻi ʻe ʻEtisoni ʻokú ne fie ʻi heni. Naʻá ne ongoʻi hangē naʻe ʻikai ke ne latá.
Naʻe lue atu ha ongo tamaiki tangata ko Teiko mo Sione kia ʻEtisoni. Naʻe ʻeke ange ʻe Teiko, “ʻOkú ke fie nofo mo kimaua ʻi homa tēnití?”
Naʻe kiʻi mānava ʻa ʻEtisoni peá ne malimali. “ʻIo.”
Naʻe pehē ange ʻe Sione, “Fakalata!” “Pea tau toki ō leva ʻo kakau.”
Naʻe fokotuʻu ʻe he tamaiki tangatá ʻa honau tēnití pea nau lele leva ki he vaitafé. ʻI he fuʻu fiefia ʻa ʻEtisoní, naʻe ʻikai ke ne fakatokangaʻi ʻa e momoko e vaí. Hili e maʻu meʻatokoni hoʻataá, naʻe lue lalo e tamaiki tangatá mo e kau takí. Naʻa nau foki mai ʻi he kamata ke tō ʻa e laʻaá, ko ia naʻa nau tokoni ke fokotuʻu ha tafuʻanga afi.
Naʻe ʻeke ange ʻe Sione, “ʻOku fēfē ho fāmilí?”
Naʻe lī ʻe ʻEtisoni ha fokotuʻunga vaʻakau ʻi he veʻe afí. “ʻOku sai ʻaupito ʻeku ongomātuʻá. Pea ko hoku tuofefiné ʻa hoku kaumeʻa lelei tahá. Ne mau hiki mai mei ʻEkuatoa.”
Naʻe fesiofaki fiefia ʻa Teiko mo Sione mo na mamali.
Naʻe pehē ange ʻe Sione, “ʻOkú ma haʻu mo kimaua mei ʻEkuatoa!”
Naʻe vete ʻe Teiko hono sāketí ke fakaʻaliʻali ange hono falaní. Naʻe ʻi ai ʻa e fakaʻilonga ʻa e timi soka ʻa ʻEkuatoá!
“Mālie.” Ko e lea ange ia ʻa ʻEtisoní. “Ko e hā leva e meʻa ʻokú ke manatu lahi taha ki ai fekauʻaki mo ʻEkuatoá?”
Naʻe kakata ʻa Teiko mo Sione. Naʻá na kaila, “Ko e meʻakaí!”.
Naʻe toutou talanoa ʻa e ongo tamaiki tangatá fekauʻaki mo e meʻa kuó na fakaʻamua kau ki ʻEkuatoá pea mo e meʻa naʻá na saiʻia ai ʻi he nofo ʻi Sipeiní. Naʻe saiʻia ʻa ʻEtisoni he faingofua ko ia ke talanoa kia Teiko mo Sioné.
Naʻe tuʻu hake leva ha taha ʻo e kau takí ko Brother Sisinelo. “Mālō hoʻomou lelei! ʻOku mau fie fakaʻosi e poó ʻaki ha houalotu fakamoʻoni.”
Naʻe tuʻu taha taha hake ʻa e fānau tangatá mo e kau takí ʻo vahevahe ʻenau fakamoʻoní. Naʻe ʻai ʻe heʻenau ngaahi leá ke ongoʻi ʻe he loto ʻo ʻEtisoní ʻoku hangē ʻoku takatakai ʻaki ia ha sipi kafu māfana.
Ne tuʻu hake ʻa Teiko. “ʻOku ou ʻilo ʻoku moʻoni ʻa e Siasí. ʻOku ou ʻilo ko e ʻOtuá ʻa ʻeku Tamaí pea ko Sīsū Kalaisi ʻa hoku Fakamoʻuí.”
Naʻe fakaʻau ke mālohi ange ʻa e ongo māfaná. Naʻe fakakaukau ʻa ʻEtisoni, ʻOku ou fie ʻiloʻi foki kau ki ai.
ʻI he aʻu ʻa ʻEtisoni ki ʻapi mei he kemí, naʻe nofo pē ʻa e ngaahi lea ʻa Teikó ʻi heʻene fakakaukaú. Naʻá ne fakaʻamu ke ʻalu ki he lotú pea ako fakataha mo Teiko mo Sione kia Sīsū.
ʻI he maʻu meʻatokoni efiafi ʻi he pō ko iá, naʻe fehuʻi ange ʻe Papa, “Naʻe hā ʻa e kemí?”
Naʻe talaange ʻe ʻEtisoni, “Naʻe fakafiefia!” “Naʻa mau kakau mo lue mo tafu ha afi. Naʻá ku maʻu foki mo ha ongo kaungāmeʻa mei ʻEkuatoa!”
“ʻOku fakafiefia ia! Naʻe talaange ʻe Mama, “Kuo pau ke tau fakaafeʻi mai kinaua.”
Naʻe kiʻi longo ʻa ʻEtisoni. “ʻE lava nai ke tau toe kamata ʻalu ki he lotú?”
Naʻe fakalongolongo ʻa Mama mo Papa ʻi ha kiʻi taimi nounou. Naʻe kiʻi melemele ʻa Mama. Naʻá ne pehē ange, “Kapau ʻokú ke fie ʻalu, ʻoku sai pē ia.” “Ka he ʻikai ke u ʻalu mo Papa.”
Naʻe hoholo hifo ʻa ʻEtisoni ʻi hono seá. Naʻe ʻikai ke ne fie ʻalu toko taha ki he lotú. Mahalo ʻoku totonu ke nofo pē ʻi ʻapi mo hono fāmilí.
Naʻe manatuʻi leva ʻe ʻEtisoni ʻa e ongo māfana mei he houalotu fakamoʻoní. Neongo naʻe ʻikai fie ʻalu hono fāmilí ki he lotú, ka naʻe fie ʻalu ʻa ʻEtisoni ia.
ʻIkai ngata aí, he ʻikai ke ne tuēnoa. Naʻe malimali ʻa ʻEtisoni ʻi heʻene maʻu meʻatokoni efiafí. Naʻá ne toʻo hake leva e telefoní. Naʻá ne ʻiloʻi ha ngaahi kaungāmeʻa ʻe niʻihi te ne lava ʻo ʻalu mo ia ki he lotú!
Tā fakatātā ʻa Hollie Hibbert