Ngaahi ʻEkitivitī ki he Haʻu, ʻo Muimui ʻIate Aú
Ako e folofolá pe fakahoko ha meʻa fakafiefia ʻi he efiafi ʻi ʻapí!
Ngaahi Loto ʻOfa
Maʻá e Lea Fakatātā 1–4; 15–16; 22; 31; ; Tangata Malanga 1–3; 11–12
Talanoá: Ko e Lea Fakatātaá ko ha tohi ia ʻo ha ngaahi lea fakapotopoto. ʻOku pehē ʻe he lea fakatātaá ke “falala [ki he ʻEikí] ʻaki ho lotó kotoa” (Lea Fakatātā 3:5). ʻOku pehē ʻe ha lea fakatātā ʻe taha, “ʻoku tekeʻi atu ʻa e houhaú ʻe he tali fakavaivaí” (Lea Fakatātā 15:1).
Hivá: “Ko e Angaʻofá ʻe Kamata ʻIate Au” (Tohi Hiva ʻa e Fānaú, 83)
ʻEkitivitií: Lau ʻi he peesi 40 fekauʻaki mo hono fakaʻaongaʻi ʻo e ngaahi lea ʻofá. Kosi leva ha ngaahi foʻi haati pepa pea hiki ha fanga kiʻi tohi ʻofa pe ngaahi lea tokoni ai ke nau fai ki he niʻihi kehé. Te ke lava foki ʻo fūfuuʻi e ngaahi foʻi hātí ke kumi ʻe he niʻihi kehé!
Moʻunga ʻo e ʻEikí
Maʻá e ʻĪsaia 1–12
Talanoá: Ko ʻĪsaiá ko ha palōfita. Naʻá ne ui ʻa e temipalé ko e “moʻunga ʻo e ʻEikí” (ʻĪsaia 2:3). Naʻá ne pehē te tau lava ʻo ako fekauʻaki mo Sīsū Kalaisi ʻi he temipalé.
Hivá: “Fie Siofia Ha Temipale” (Tohi Hiva ʻa e Fānaú, 99)
ʻEkitivitií: Te ke lava ʻo mateʻi pe ko e temipale ʻe fiha ʻi he māmaní? ʻAlu ki he temples.ChurchofJesusChrist.org ke maʻu ʻa e talí. Ko hai naʻe ofi taha ʻene mateʻí? Tā pe valivali ha fakatātā ʻo ha taha ʻo e ngaahi temipalé.
Ngaahi Tāpuaki meia Sīsuú
Maʻá e ʻĪsaia 13–14; 24–30; 35
Talanoá: Naʻe akoʻi ʻe ʻĪsaia ʻoku tāpuakiʻi ʻe Sīsū Kalaisi ʻa kinautolu ʻoku muimui kiate Iá. Te ke lava ʻo lau ke lahi ange ʻa e meʻa naʻe akoʻi ʻe ʻĪsaiá ʻi he peesi 8.
Hivá: “I Will Walk with Jesus” (Fēpueli 2020 Kaumeʻá mo e Liahona)
ʻEkitivitī: Taufetongi ʻi hono kumi ʻo e ngaahi folofolá ke fai ʻa e vaʻinga fakatauhoa ʻi he peesi 12. Kuo tokoniʻi fēfē nai koe ʻe Sīsū?
Ngaahi Peau ʻo e Tahí
Maʻá e ʻĪsaia 40–49
Talanoá: Naʻe akoʻi ʻe ʻĪsaia kapau te tau tauhi e ngaahi fekaú, te tau maʻu ʻa e melinó ʻo hangē ha vaitafé pea “tatau hoʻo māʻoniʻoní mo e ngaahi peau ʻo e tahí” (ʻĪsaia 48:18).
Hivá: “Tauhi ʻa e Ngaahi Fekau” (Tohi Hiva ʻa e Fānaú, 68–69)
ʻEkitivitī: Ngaohi haʻo “ngaahi peau ʻo e tahí”! Fakafonu vaeua ha ngeʻesi hina pe hina sioʻata ʻaki e vaí pea huʻi ʻaki ia ha fakalanu meʻakai lanu pulū. Fakafonu ʻaki leva ʻa e lolo. Tāpuni ke maʻu. Hili ia peá ke leʻei māmālie ʻa e foʻi hiná ke sio ki heʻene ngaue hangē ha ngaahi peaú! ʻOku tokoniʻi fēfē koe ʻe hono tauhi e ngaahi fekaú ke ke ongoʻi ʻa e melinó?
Langatoi
Maʻá e ʻĪsaia 50–57
Talanoá: Naʻe akoʻi ʻe ʻĪsaia, “Mou kumi [ki he ʻEikí]” (ʻĪsaia 55:6). ʻOku ʻuhinga ia ʻoku totonu ke tau lotu, tauhi e ngaahi fekaú, pea ako ki he ongoongoleleí. ʻE tokoni ʻeni ke tau ongoʻi ofi ange ai kia Sīsū Kalaisi.
Hivá: “Fekumi Kei Siʻi Ki he ʻEikí” (Tohi Hiva ʻa e Fānaú, 67).
ʻEkitivitií: Fili ha toko taha ke hoko ko e tokotaha fekumí. Lolotonga e kuikui honau matá, fūfuuʻi ha fakatātā ʻo Sīsū. Hivaʻi leʻo siʻi ha foʻi hiva Palaimeli kae kumi ʻe he tokotaha fekumí ʻa e fakatātaá. ʻI he taimi ʻoku nau fakaofi ai ki he fakatātaá, hiva ke toe leʻo lahi ange kae ʻoua kuo nau maʻu ia. Fetongitongi e tokotaha fekumí. ʻE lava fēfē ke ke fekumi kia Sīsū Kalaisi?
Ngaahi tā fakatātā ʻa Katy Dockrill