Taimi Hiva Fakataha
Naʻe lea ʻa Sisitā ʻIongi. “Ko e taimi hiva ʻeni!” “Tau kamata ʻaki e ʻNgaahi Talanoa ʻo e Tohi ʻa Molomoná.’”
Naʻe tangutu hangatonu hake ʻa Sela. Naʻá ne mateuteu ke hiva! Ko e taha ʻeni ʻo ʻene ngaahi hiva manakó.
Naʻá ne sio atu ki ha kiʻi taʻahine ʻoku tangutu toko taha pē. Naʻe teʻeki sio ʻa Sela ki ai ʻi he Palaimelí.
Naʻe tā ʻa e ngaahi fuofua notá ʻi he pianó. Ne kamata ke hiva ʻa Sela. “Ngaahi Talanoa ʻi he Tohi Molomoná.”
Naʻá ne toe sio atu ki he ʻotú. Naʻe ʻikai ke hiva ʻa e kiʻi taʻahiné. Mahalo pē naʻe ʻikai ke ne ʻilo e ngaahi leá.
Naʻe fie vahevahe ʻe Sela mo e kiʻi taʻahiné ʻa e foʻi hiva naʻá ne saiʻia taha aí. Naʻe hiki ʻa Sela ʻo tangutu ʻi hono tafaʻakí. Naʻe sio hake ʻa e kiʻi taʻahiné pea malimali.
Naʻe fanafana ange ʻe Sela ʻa e ngaahi foʻi lea hokó. Naʻá na hiva fakataha. Naʻe ʻikai fuoloa kuo lava ʻe he kiʻi taʻahiné ʻo hivaʻi kotoa e ngaahi foʻi leá!
Kuo ʻosi leva ʻa e taimi hivá. Naʻe fehuʻi ange ʻe Sela. “Ko hai ho hingoá?”
“Ko ʻAlekisā.” Na‘e malimali ʻa e ki‘i taʻahiné. “Mālō siʻo tokoniʻi aú! Ko e fuofua taimi ʻeni ke u ʻi he Palaimelí.”
Naʻe toe malimali ange ʻa Sela. “ʻOku ou fiefia ʻi hoʻo ʻi hení!” Naʻá ne fakapapauʻi ʻe ako ʻe ʻAlekisā ha ngaahi meʻa lelei lahi—mo ha ngaahi hiva lelei lahi!
Ngaahi tā fakatātā ʻa Cherie Zamazing