Vaó mo e Lea Koví
“Fēfē kapau te tau fai ha palōmesi fakafāmili?” Ko e fehuʻi ange ia ʻa Mamí.
Naʻe kole ange ʻe Sōnasi kia Mami, “ʻE lava nai ke ta talanoa?” Naʻá ne tangutu hifo ʻi he musié ʻo ofi ki he feituʻu naʻá ne taʻataʻaki ai e ngoue matalaʻiʻakaú.
Naʻe fehuʻi ange ʻe Mami, “ʻIo. Ko e hā e meʻa ʻoku hokó?” Naʻá ne vete hono kofunima taʻataʻaki ngoue ʻulí.
“ʻI he ʻahó ni naʻe lea ʻaki ʻe ha fānau ʻe niʻihi ha foʻi lea naʻe ʻikai ke u ʻiloʻi. Naʻa nau kata ʻi heʻenau lea ʻaki iá,” ko Sōnasi ange ia. “ʻOku ou tui ko ha foʻi lea kovi.”
Naʻe fehuʻi ange ʻe Mami, “Naʻá ke ongoʻi fēfē ʻi he taimi naʻá ke fanongo ai ki he foʻi leá?”
“Naʻe ʻikai ke u ongoʻi leleiʻia.”
Naʻe fanafana ange ʻe Sōnasi ʻa e foʻi leá ki he Fineʻeikí. Naʻá ne talaange hono ʻuhingá. Naʻe moʻoni pē ʻa Sōnasi. Naʻe ʻikai ko ha foʻi lea lelei ia.
Naʻá ne fehuʻi ange, “Ka ko e hā ʻoku kovi aí?”.
“ʻOku kovi he ʻoku taʻeʻofa pea ʻikai anga fakaʻapaʻapa. ʻI heʻetau fakaʻaongaʻi e ngaahi lea peheé, ʻokú ne ʻai ke faingataʻaʻia ʻa e Laumālie Māʻoniʻoní ke nofoʻia kitautolu. Naʻe talaatu ʻe he Laumālie Māʻoniʻoní naʻe kovi. Ko e ʻuhinga ia naʻe ʻikai ke ke ongoʻi leleiʻia aí.
Naʻe fakafulofula ʻa Sōnasi. “Ka naʻe hangē naʻe fiefia ʻa e fānau kehé. Ko e hā ne u ongoʻi taʻefiemālie aí?
Naʻe fehuʻi ange ʻe Mami, “ʻOkú ke ʻiloʻi fēfē naʻe ʻikai ongoʻi pehē ʻa e tamaiki kehé?”
“Koeʻuhí he naʻa nau kata kotoa pē mo malimali ʻi he taimi naʻe lea ʻaki ai ʻe ha taha ʻa e foʻi leá.” Naʻe ongoʻi puputuʻu ʻa Sōnasi.
Naʻe pehē ange ʻe Mami, “Ko e taimi ʻe niʻihi ʻoku kata pe malimali e kakaí ʻi he taimi ʻoku nau ongoʻi taʻefiemālie aí.” “Pea ko e taimi ʻe niʻihi ʻi heʻenau fanongo pe lea tuʻo lahi ʻaki e ngaahi lea koví, ʻoku ʻikai ke nau toe hohaʻa kinautolu ki ai. Ka ʻoku ʻikai pē totonu ke lea ʻaki e ngaahi lea ko iá. ʻOku hangē ia ko e ngaahi vaó ni. ʻOku ou taʻaki kinautolu ke tauhi e ngoué ke maʻa pea tuku ke tupu ʻa e ʻakau leleí.
Naʻe pehē ʻe Sōnasi, “ʻOku ou fiefia naʻe ʻikai ke u lea ʻaki e foʻi leá.”
Naʻe pehē ange ʻe Mami, “Mo au pē.” “ʻOku ou laukau ʻaki koe. Pea ʻoku ʻi ai haʻaku fakakaukau. Fēfē kapau te ta fai ha palōmesi fakafāmili?”
Naʻe ʻeke ange ʻe Sōnasi, “Palōmesi fēfē?”
“Ta palōmesi muʻa te ta fakaʻaongaʻi e ngaahi lea leleí kae ʻikai ko e lea koví. ʻE lava pē ke hoko ia ko ha palōmesi fakafāmili.”
Naʻe saiʻia ʻa Sōnasi ʻi he fakakaukau ko iá. Naʻá ne lulululu mo Mami. Naʻe ongoʻi fiemālie ʻa Sōnasi fekauʻaki mo e palōmesi naʻá ne fai mo Mamí.
Naʻe kole ange ʻe Mami, “Sai, fēfē ke ke palōmesi ke tokoni kiate au ke fakaʻosi ʻeku taʻataʻaki vaó?” “Te u palōmesi atu te u ʻave koe ki he paʻaké.”
Naʻe malimali ʻa Sōnasi peá ne toʻo hake ha huo. “ʻOku sai ia.”
ʻI he tokoni ʻa Sōnasi kia Mamí, naʻá ne ongoʻi fiemālie ange. Naʻá ne ʻiloʻi ko ha fili lelei ia ki honau fāmilí ʻa e palōmesi ko ia ke ʻoua naʻa nau fakaʻaongaʻi ʻa e ngaahi lea koví.
Tā fakatātaaʻi ʻe Dan Widdowson