Tohi ʻe Koe
ʻOku Fakahoko ʻe he Fanga Kiʻi Meʻa Īkí ha Meʻa Makehe!
Jed L., taʻu 9, ʻIlōkosi Noate, ʻOtu Motu Filipainí
Ko au ʻoku nounou taha ʻi heʻeku kalasí. ʻOku ou faʻa fakaʻamu he taimi ʻe niʻihi naʻá ku māʻolunga ʻo hangē ko hoku kaungāakó. Ka ʻoku talamai ʻe heʻeku faʻeé ʻoku mahuʻinga ange ʻeku ngaahi tuʻunga ʻulungaanga mahuʻingá ʻi hoku māʻolungá, pea te u lava ʻo fai ha ngaahi meʻa lahi neongo ʻoku ou siʻisiʻi ange ʻi hoku kaungāakó.
ʻI he taimi ʻoku mole ai ha meʻá pe taimi ʻoku ou ilifia aí, ʻoku taʻofi leva e meʻa ʻoku ou faí kae lotu. ʻOku tali mai ʻe he Tamai Hēvaní ʻeku ngaahi lotú.
ʻOku ou tokoni ki he niʻihi ʻoku ou tokoua/tuofefine ʻakí mo e fānau kehé ke ako fika, lea faka-Pilitānia, mo tohi. ʻOku ou tokoni ke fai ha ngaahi ngāue fakaʻapi. ʻOku ou tokangaʻi ʻeku fanga kiʻi manu ʻoku tauhí. ʻOku ou tā ha ngaahi fakatātā pea faitohi maʻá e kau faifekaú. ʻI he taimi ʻoku ou fakatau pe maʻu ai ha meʻa foʻoú, ʻoku ou vahevahe ia mo e niʻihi kehé. ʻI he taimi ʻoku ou sio ai ki he kakai faingataʻaʻia he halá, ʻoku ou foaki e meʻa te u lavá, pea ʻoku ou lotua fakaʻaho kinautolu.
ʻI heʻeku kei siʻí, naʻe kamata ke laukonga mai ʻeku fineʻeikí kiate au. Naʻa mau lau e ngaahi talanoa ʻo e Tohi ʻa Molomoná, ngaahi talanoa mei he Tohi Tapú, mo e makasini Kaumeʻá . Neongo ʻoku ou taʻu hiva he taimí ni, ka ʻokú ne kei laukonga pē kiate au. He ʻikai ke u lava ʻo mohe kae ʻoua kuo laukonga ʻeku faʻeé mo au. Ka ʻoku ou laukonga he pō ʻe niʻihi ki he Fineʻeikí kae ʻoua kuó ne mohe.
ʻOku ou fai ʻa e fanga kiʻi meʻa faingofua ko ʻení neongo ʻeku siʻisiʻí. ʻOku ou ʻilo ʻoku ʻofa ʻa e Tamai Hēvaní mo Sīsū Kalaisi ʻi he fānau īkí. ʻOku ou ʻiloʻi ʻokú Na ʻofa ʻiate au. ʻOku ou ʻofa foki ʻiate Kinaua. Ko ʻeku fakaʻānauá ke u hoko ko ha faifekau koeʻuhí ke u lava ʻo fai ha fanga kiʻi meʻa iiki lahi ange ke fakahoko ha liliu lahi.
Ngaahi tā fakatātā ʻa Adam Koford