Mateʻi mai pe Ko Hai ʻOku ʻOfa ʻIate Koé, Mrs. Pangikē!
Naʻe kamata kotoa ia ʻaki ha matalaʻiʻakau pē ʻe taha …
Naʻe saiʻia ʻa Lokisī he sio ki he ngaahi fale kotoa ʻi hono tukuikoló ʻi heʻene lue ki ʻapi mei he akó. Naʻe ʻi ai ha fale ʻe taha naʻe ʻi ai ha kulī naʻe kālou mo punopuna ʻi he matapā sioʻatá. Naʻe ʻi ai ha fale ʻe taha naʻe longoaʻa e fanga manupuná ʻi he ʻuluʻakaú.
Pea naʻe ʻi ai leva e fale ʻo Mrs. Pangikeé. Naʻe hoko ʻa Mrs. Pangikē ko ʻene faiako ʻi he kalasi tolú, pea naʻe saiʻia taha ai ʻa Lokisī. Naʻe taʻataʻalo maʻu pē ʻa Lokisī kia Mrs. Pangikē ʻi heʻene sio atu ʻoku tangutu he sea ʻi hono fakafaletolo ʻi muʻá. Naʻe anga fakakaumeʻa mo fiefia maʻu pē ʻa Mrs. Pangikē.
Ka ʻi he ʻahó ni naʻe ʻikai ha taha ʻi he sea he fakafaletoló. Naʻe hangē ʻoku lōngonoa e falé. Naʻe pulia foki mo e pusi ʻa Mrs. Pangikē ko Sesitaá.
Naʻe manatuʻi ʻe Lokisī ʻa e pehē ʻe heʻene faʻeé, ʻoku puke ʻa Mrs. Pangikē. Naʻá ne ʻalu ki falemahaki he ʻaho kotoa pē ke faitoʻo. Naʻe ongoʻi lotomamahi ʻa Lokisī. Naʻá ne fie fai ha meʻa lelei maʻa Mrs. Pangikē. Ka ko e hā te ne faí?
Naʻe sio takai holo ʻa Lokisī ki he puna ʻa e fanga honé mei he matalaʻiʻakau ki he matalaʻiʻakau. Fakafokifā kuó ne maʻu ha foʻi fakakaukau!
Naʻe lele ʻa Lokisī ki ʻapi ʻo paki ha matalaʻi lose mei heʻene ngoué. Naʻá ne foki ki he fale ʻo Mrs. Pangikeé ʻo tuku ia ʻi he fakafaletolo ʻi muʻá.
ʻI he ʻaho hono hokó naʻe hili ʻe Lokisī ha matalaʻisiolaʻā ʻi he sea ʻo Mrs. Pangikeé. Pea ʻi he ʻaho hono hokó, naʻá ne tuku ha matalaʻihone ʻi hono matapā ʻi muʻá. Naʻe tuku ʻe Lokisī ha matalaʻiʻakau maʻa Mrs. Pangikē ʻi he ʻaho kotoa pē ʻi ha uike ʻe ua. Naʻá ne tokanga ke ʻoua naʻa sio mai ki ai ha taha.
ʻI haʻane foki ki ʻapi ʻi ha ʻaho ʻe taha, naʻe sio atu ʻa Lokisī ʻoku tangutu mai ʻa Mrs. Pangikē ʻi he fakafaletolo ʻi muʻá. Naʻá ne pukepuke ha ngaahi matalaʻiʻakau ʻi hono nimá.
Naʻe pehē ange ʻe Mrs. Pangikē, “Lokisī, sio mai ki heʻeku ngaahi matalaʻiʻakau fakaʻofoʻofá. Ne tuku mai ia ʻe ha taha maʻaku. ʻI heʻeku foki mai he ʻaho kotoa pē mei falemahakí, ne ʻi ai ha matalaʻiʻakau foʻou ne talitali ange kiate au.”
Naʻe malimali ʻa Lokisī. “ʻOkú ke ʻiloʻi pe ko hai?”
Naʻe malimali mai ʻa Mrs. Pangikē. “Neongo pe ko hai, ʻoku ou fie fakamālō kiate kinautolu.”
“Mahalo ko ha taha ʻoku ʻofa ʻiate koe!” Ko e lea ange ia ʻa Lokisií.
Naʻe pehē ʻe Mrs. Pangikē, “ʻIo, naʻá ku hanganaki atu ke maʻu ha matalaʻiʻakau foʻou he ʻaho kotoa pē. Naʻe tuku e matalaʻiʻakau ʻuluakí ʻi hoku fakafaletoló.
ʻOkú ke pehē naʻe tuku ia ʻe hoʻo pusí?” Ko e fehuʻi ange ia ʻa Lokisií.
“ʻOku saiʻia ʻa Sesitā ke ne fakaʻohovaleʻi au, ka kuo teʻeki ke ne tuku mai ha matalaʻiʻakau.” Naʻe kata ʻa Mrs. Pangikē. “Fēfē ʻa e matalaʻiʻakau ʻi hoku seá?”
“Ko e kulī nai ʻa e kaungāʻapí?” Naʻe toe lahi ange ʻa e malimali ʻa Lokisií.
“Fēfē hoku veʻe matapā ʻi muʻá?”
“Ko ha kiʻi sikueli nai?”
Naʻe kata pē ʻa Mrs. Pangikē mo pehē , “ʻOiauē.” “Naʻe ʻikai ke u ʻiloʻi naʻe tokolahi fau e fanga kiʻi manu ʻoku nau ʻofa ʻiate aú! Ka naʻe tokoni ʻa e matalaʻiʻakaú ke u ongoʻi ʻoku ou makehe.”
Naʻe fuʻu fiefia ʻa Lokisī. Naʻá ne fiefia ʻi heʻene tokoni ke toe malimali ʻa Mrs. Pangikeé.
Tā fakatātā ʻa e Adobe Stock