Ko e Kau Paionia ʻi he Fonua Kotoa Pē
Ko Mōsese mo e Paʻangá
“ʻE lava ke u totongi mo ʻeku vahehongofulú?”
Naʻe fakaava hake ʻe Mōsese ʻa e matapaá pea hū atu ki he falekoloa kongokonga meʻalelé. Kuo tuku ʻa e akó, pea kuo taimi ke tokoni kia Papa ʻi he ngāué. Naʻe toʻo mai ʻe Mōsese ha taufale pea kamata ke tafi. Naʻá ne saiʻia ke tokoni kia Papa. Naʻá ne maʻu foki mo ha paʻanga.
Kuo ofi e taimi ke mavahe ai ʻa Mōsesé. Naʻá ne taʻataʻalo kia Papa pea kamata leva ke lue ki ʻapi. Naʻá ne ongoʻi loto mamahi ʻi heʻene luelué. Naʻe ongo faikehe maʻu pē ʻa e ʻikai ke ne foki mo Papa ki ʻapí. Naʻe māvae e ongomātuʻa ʻa Mōsesé. Naʻá ne nofo mo hono ngaahi tokoua mo e tuofāfine ʻe toko fitú mo Mama. Naʻe nofo ʻa Papa ʻi ha feituʻu kehe. Naʻe ngāue ʻa Mama ʻi ha ngāue ʻe tolu koeʻuhí naʻe ʻikai ke ʻi ai haʻanau paʻanga feʻunga. Ko ha taimi faingataʻa ia kiate kinautolu kotoa.
Ne ʻi ai e ʻaho ʻe taha ne fai mai ai ha tukituki ʻi he matapaá. Ko ha ongo faifekau. Naʻá na vahevahe ha pōpoaki fekauʻaki mo Sīsū Kalaisi. Naʻá na akoʻi foki fekauʻaki mo ha palōfita ko hono hingoá ko Siosefa Sāmita. Naʻe ongoʻi ʻe Mōsese ha meʻa makehe ʻi heʻene fanongó.
Naʻe toutou foki mai ʻa e ongo faifekaú ke akoʻi ʻa Mōsese, Mama, mo ha niʻihi ʻo hono ngaahi tokouá/tuofāfiné. Naʻe kamata ʻalu ʻa Mōsese mo hono fāmilí ki he lotú. Naʻa nau lau ʻa e Tohi ʻa Molomoná. Naʻe tuku ʻenau inu kofí. Naʻe aʻu foki ʻo nau fili ke papitaiso.
Naʻe ʻilo ʻe Mōsese naʻe ʻofa ʻa e Tamai Hēvaní ʻiate ia. Pea neongo naʻe kei faingataʻa pē ki hono fāmilí ha ngaahi meʻa, ka naʻá ne ongoʻi ha fiemālie mo ha nonga lahi ange.
ʻI ha pō ʻe taha ne foki tōmui mai ai ʻa Mōsese mei he falekoloa ʻo Papá. Naʻe tangutu ʻa Mama ʻi he tēpilé. Naʻe hangē ʻoku hohaʻá.
Naʻe fehuʻi ange ʻe Mōsese, “ʻOku lelei pē e meʻa kotoa?”
Na‘e māpuhoi ʻa Mama. “ʻIo, te tau sai pē.” Naʻá ne malimali kia Mōsese. “ʻOku ʻikai feʻunga e paʻangá he māhiná ni. ʻOku ou hohaʻa naʻa ʻikai ke tau lava ʻo totongi vahehongofulu.”
Naʻe manatuʻi ʻe Mōsese ʻa e meʻa naʻe akoʻi ange ʻe he ongo faifekaú fekauʻaki mo e vahehongofulú. Naʻá na pehē ko hono ʻave e peseti ʻe 10 hoʻomou paʻangá ki he ʻOtuá, ke tokoni ki hono fai ʻo ʻEne ngāué.
Naʻe faʻo ʻe Mama ha paʻanga ʻi ha sila pea tāpuniʻi ia. Naʻá ne pehē ange, “Ko ha paʻanga toputapu ʻeni.” “ʻOku fiemaʻu ke totongi ʻetau vahehongofulú.
Naʻe fakakaukau ʻa Mōsese ki he paʻanga naʻá ne maʻu ʻi he falekoloa kaá. Naʻá ne toʻo hake ia mei hono kató. “ʻE lava ke u totongi mo ʻeku vahehongofulú?”
Ne malimali pē ʻa Mama. “ʻIo, te ke lava.”
Hili iá, ne totongi maʻu pē ʻe Mōsese ʻene vahehongofulú. Naʻe faingataʻa he taimi ʻe niʻihi. Ka naʻe maʻu ʻe Mōsese ʻa e tuí. Naʻá ne hoko ko ha paionia! Naʻá ne kei totongi pē ʻene vahehongofulú, pea naʻe feʻunga maʻu pē ʻa e paʻanga naʻe maʻu ʻe hono fāmilí. Naʻe fakamālō ʻa Mōsese koeʻuhí ko e ngaahi founga naʻe tāpuekina ai ia ʻe he Tamai Hēvaní ʻi heʻene talangofuá.
ʻOku tokolahi ange ʻa e kau lea faka-Sipeini ʻi Mekisikoú ʻi ha toe fonua kehe.
Naʻe fuofua haʻu ʻa e kiʻi kulī siʻisiʻi taha ʻi māmaní, ʻa e siuāuaá, mei Mekisikoú.
Naʻe langa e fuofua temipale ʻi Mekisikoú ʻi he 1983, ʻi he kei taʻu hongofulu tupu ʻa Mōsesé.
ʻI heʻene kei tamasiʻí, naʻe saiʻia ʻa Mōsese he vaʻinga volipoló.
ʻOku ʻi ai ha fānau ʻe toko tolu ʻa ʻEletā Vilanueva mo hono uaifi ko Letisiá.
ʻI he ʻahó ni, ʻoku hoko ʻa ʻEletā Mōsese Vilanueva ko ha Fitungofulu Taki Māʻolunga.
Ngaahi tā fakatātā ʻa Kelly Smith