Pagkamabination diha sa Carousel

Ni Hilary Watkins Lemon

(Gibase sa usa ka tinuod nga istorya)

Si Damien nangandoy nga wala lang unta niya singgiti ang iyang igsoong babaye.

Sa dihang si Damien naglakaw sa parke, nakadungog siya og malipayong musika nga gipatukar. Ang iyang lola midala niya ug sa iyang gamay nga igsoong babaye, si Adele, aron mosakay sa iyang paborito nga carousel. Kini adunay makalingaw nga dula sa mga ring. Si Damien naghinam-hinam nga mopakita ni Adele unsaon sa pagdula.

Sa wala madugay naglinya na sila. Ang carousel dako ug mabulokon, nga dunay daghang kinulit nga gagmayng kabayo. Nagpahiyom nga mga bata milingkod sa gagmayng kabayo ug nagwara-wara samtang sila nagsakay nga naglibot-libot.

“Kon ikaw mopili sa gamayng kabayo sa daplin, ikaw makadula sa dula sa ring!” Si Damien misulti ni Adele. “Nakakita ka sa mga tukog nga gigunitan sa mga bata? Ug tan-awa ang tawo nga dunay mga ring?”

Si Damien mitudlo ngadto sa trabahante. Nagtindog siya duol sa carousel naggunit og ring. Samtang sila nagsakay sa carousel, ang mga bata mosulay sa paggamit sa ilang tukog sa pagkuha sa ring. Matag higayon nga ilang makuha ang ring, ang trabahante mokuha og bag-o.

Si Adele mipakpak sa iyang mga kamot. “Gusto nakong kuhaon ang tanang ring!” miingon siya.

Sa kataposan miabot na sila sa atubangan sa linya. Apan usa na lang ka kabayo ang nahibilin sa carousel.

“Damien,” miingon si Grand-mère [Lola], “si Adele na lang kaha atong pasakyon niining kataposang lugar kay wala pa man siya makasakay niini sukad? Makasakay ka sa sunod nga pagbalik.”

“Sige,” si Damien nagbagutbot. Nagtan-aw siya sa trabahante nga mitabang ni Adele nga makalingkod sa sinaw nga tabonon nga gamayng kabayo. Dayon ang trabahante mitunol ni Adele og tukog aron makakuha sa mga ring.

Ang musika nagsugod, ug ang carousel nagsugod sa pagtuyok. Si Damien nagtan-aw ni Adele gikan sa kilid uban ni Grand-mère [Lola]. Apan nabali ang paggunit ni Adele sa tukog! Imbis maggunit sa tukog sa dako nga gunitanan, gigunitan niya ang taas, niwang nga tumoy nga maoy gamiton sa pagkuha sa mga ring.

“Adele, baliha ang tukog!” misinggit siya. Apan si Adele ingon og wala makadungog tungod sa kasaba. Sa dihang miagi siya sa ring, ang iyang tukog miigo niini. Apan ang gunitanan dako kaayo aron nga mohaom sa ring.

“Adele, ang imong tukog!” Si Damien misulay pag-usab. “Dili nimo makuha ang mga ring kon gunitan nimo nga ingon ana!”

Apan si Adele wala makadungog kaniya. Mipahiyom ug mikatawa lang siya samtang ang carousel mituyok. Ang iyang tukog nagsige lang og igo sa ring. Wala siya nakakuha bisan og usa.

Si Damien nagbagulbol. Si Adele nag-usik-usik lang sa iyang turno! Kon siya pa ang anaa sa carousel, makuha niya ang tanang ring.

Sa dihang nahuman na ang pagsakay, midagan siya ngadto ni Adele.

“Giingnan ka nako unsaon sa paggunit sa tukog!” misinggit siya. “Nganong wala man ka maminaw nako? Sayop ang imong gibuhat!”

Si Adele wala mobawos og singgit ni Damien. Wala siya mohilak. Nagbarog lang siya didto ug nagkagamay tan-awon.

Ang kasingkasing ni Damien kusog nga nagpitik, ug ang iyang nawong namula. Nakapasuko niya nga nagtan-aw ni Adele nga wala makakuha sa tanang ring! Apan unang higayon pa lang niya. Gawas pa, siya ingon og nalingaw man. Hangtod karon.

Lain ang gibati ni Damien. Nangandoy siya nga wala lang unta niya singgiti si Adele.

“Pasayloa ko,” hinay siyang miingon. “Bati kaayo ko.”

Mihangad si Adele.

“Unsa kaha kon mohatag ko nimo og mga paagi sa pagkuha sa mga ring?” Miingon si Damien. “Molingkod ko tupad nimo sa carousel ug motabang nimo.”

Miyango si Adele.

Dayon si Damien miatubang ngadto ni Grand-mère. “Makakuha ba mi og duha ka tiket aron si Adele makasulay pag-usab?”

Mipahiyom si Grand-mère. “Siyempre.”

Kini nga istorya nahitabo sa France.

Mga paghulagway pinaagi ni Violet Lemay