Higala ngadto sa Higala

Dagan padulong sa Kahayag

Ni Elder Peter M. Johnson

Sa Seventy

Peter M. Johnson

Gipahiangay gikan sa “Running toward the Light” nga (video), ChurchofJesusChrist.org.

Batang lalaki nga nagdagan samtang nagdala og backpack

Paghulagway pinaagi ni Adam Nickel

Ako nagdako sa usa ka makuyaw nga bahin sa usa ka dako nga siyudad. Usa ka adlaw naglakaw ko padulong sa eskwelahan nga dunay kwarta sa akong bulsa. Ang mga sensilyo mitagingting samtang naglakaw ko.

Moagi ko sa pipila ka mas magulang nga mga lalaki kinsa apil sa usa ka gang. Naningkamot ko nga masaligon tan-awon. Naningkamot ko nga dili mahadlok. Apan nakadungog sila sa tagingting nga tingog. Gusto nila ang mga sensilyo ug misugod sa paggukod nako.

Midagan ko og kusog kutob sa akong mahimo aron makalingkawas. Miliko ko sa usa ka eskinita. Makita nako ang kahayag sa tumoy sa eskinita, maong midagan ko padulong sa kahayag. Sa wala madugay mihunong sila sa paggukod nako, ug luwas na ko.

Kini nahimong sundanan sa akong kinabuhi. Modagan ko gikan sa unsay dili maayo, ug nangita ko sa unsay maayo. Usahay mawad-an ko og paglaom, apan nagpadayon ko sa pagpaningkamot sa pagpangita sa kahayag.

Sa dihang misulod na ko sa kolehiyo, midula ko sa team sa basketball. Kadaghanan sa akong mga kauban sa team mga miyembro sa Ang Simbahan ni Jesukristo sa mga Santos sa Ulahing mga Adlaw. Nakat-on ko mahitungod sa ebanghelyo gikan kanila. Nakat-on ko nga ako usa ka anak sa Dios. Kana nagpasabot nga ako makabuntog sa akong mga pakigbisog ug mahimong mas maayo. Mipasakop ko sa Simbahan. Sukad niadto, naningkamot ko matag adlaw nga mahimong mas sama sa akong Langitnong Amahan ug sa Iyang Anak, nga si Jesukristo. Ug kamo makahimo usab niana!

Kon kamo modagan padulong sa kahayag, adunay paglaom. Nasayod mo nga kamo nagdagan ngadto sa kalig-on, kalinaw, ug kalipay. Kita tanan kinahanglan nga modagan padulong sa kahayag.

Makalingaw sama sa Basketball

kalihokan sa paggunting-gunting og mga basketball

Si Elder Johnson nakat-on mahitungod sa ebanghelyo samtang nagdula og basketball. Karon inyoha nang turno!

1. Guntinga ang mga eskwala sa ubos ug kumota aron mahimong mga bola.

2. Pagpuli-puli sa pag-itsa sa mga bola ngadto sa panaksan.

3. Kon ang bola masulod sa panaksan, ablihi ang papel ug tubaga ang pangutana!

• Unsa ang usa ka paagi nga ikaw makasunod sa Langitnong Amahan?

• Kanus-a ka mipili sa matarong?

• Sa unsa nga paagi nimo makita ang kahayag sa Langitnong Amahan sa imong kinabuhi?

• Unsa ang nakatabang nimo nga mobati sa gugma sa Langitnong Amahan?

• Unsaon nimo sa pagpaambit ang kahayag sa Langitnong Amahan ngadto sa uban?

• Isulat ang imong kaugalingong pangutana!