“Ang Pag-ampo alang sa Linog,” Higala, Mar. 2022, 4–5.
Ang Pag-ampo alang sa Linog
Sa dihang si Violet nahigmata, ang tanang butang nag-uyog!
Kini nga istorya nahitabo sa Peru.
Si Violet natulog sa dihang ang nagdahunog nga tingog nakapahigmata niya. Sa sinugdanan, nagtuo siya nga dalogdog kini.
Apan ang dahunog nagkakusog ug nagkakusog. Miuyog kini sa mga bintana sa iyang kwarto.
Si Violet dali nga nakalingkod. Kini usa ka linog!
Siya ug ang iyang pamilya mibalhin ngadto sa Peru dili pa lang dugay. Siya nasayod nga ang mga linog mahitabo dinhi kanunay. Ug siya ug ang iyang pamilya nakaandam alang niini ug nagpraktis unsay buhaton. Apan kini mas makahahadlok kay sa iyang gituohan. Siya makabati nga nagkurog ang iyang lawas!
Si Violet midagan ngadto sa kusina ug mikamang ilawom sa lamesa. Paglabay sa pipila ka gutlo, ang iyang mga igsoon miapil niya. Mao usab si Mama ug Papa.
“Maayo kay nahinumdoman ang unsay atong gipraktis,” miingon si Papa. “OK ra ba ang tanan?”
Miyango ang mga igsoon ni Violet.
Apan si Violet nahadlok. Siya mipiyong sa iyang mga mata. Lisod ang pagbaliwala sa pag-uyog libot kaniya.
Dayon si Violet nakahinumdom sa pag-ampo. Gikyugpos niya ang iyang mga bukton ug giduko ang iyang ulo. “Minahal nga Langitnong Amahan,” siya naghunghong, “palihog atimana ang akong pamilya.”
Si Violet nagpadayon sa pag-ampo. Gibati niya nga ingon og dunay migakos niya. Sa dihang nahuman siya, mitan-aw siya. Si Mama ug Papa mikyugpos sa ilang mga bukton. Ang iyang mga igsoon mao usab ang gibuhat. Silang tanan nag-ampo! Ang yuta nag-uyog gihapon. Apan si Violet mibati og kalinaw sa iyang kasingkasing ug hunahuna.
Sa kataposan, ang pag-uyog mihunong. Si Violet ug ang iyang pamilya nagpabilin ilawom sa lamesa og dugay-dugay, aron makasigurong luwas.
“Unsay imong gibati?” Si Mama nangutana ni Violet.
“OK,” miingon si Violet. “Sa sinugdanan nahadlok gyod ko. Apan ang pag-ampo nakatabang nako nga mobati og mas maayo.” Gigakos niya si Mama. Nalipay siya nga ang Langitnong Amahan mitabang kaniya nga mobati og kalinaw.
Mga paghulagway pinaagi ni Toby Newsome