Ang Problema sa Paghatag

Ni Don Hyun

(Gibase sa usa ka tinuod nga istorya)

“Ang paghatag mao ang usa ka paagi sa pagpakita sa usa ka tawo nga ikaw nagpakabana kanila.”

Crunch, crunch, crunch. Gitulon ni Andrew ang iyang popcorn ug mihakop og lain pa.

Ang iyang mas magulang nga igsoong lalaki, si Caleb, milingkod sa sopa tupad niya. “Oy, pwede ba nga mangayo ko?”

Si Andrew wala molingiw sa pagtan-aw sa TV. “Dili.”

“Ay, sige na. Panghatag sad.”

Mikab-ot si Caleb sa panaksan, apan si Andrew mipalayo ani.

“Dili! Giingnan na tika kaniadto. Ayaw na pangutana pag-usab!”

“Sige.” Mitindog si Caleb ug mibiya sa kwarto.

Pagkasunod adlaw, si Andrew miadto sa kusina. Si Caleb naghimo og sushi nga gisagol sa humay, seaweed, ug linata nga karne sa baboy.

Naglaway si Andrew. “Pwede ba nga mangayo ko?”

“Dili,” miingon si Caleb.

Kana nakapasuko pag-ayo ni Andrew. Midagan siya sa silong aron sultihan si Papa.

“Nganong si Caleb dalo man kaayo?” siya nangutana.

Nagmug-ot si Papa. “Nakita nako kagahapon nga ikaw wala manghatag sa imong popcorn. Nganong mohatag man si Caleb nimo human nga ikaw wala mohatag kaniya?”

“Tungod kay siya akong igsoong lalaki!” Miingon si Andrew.

“Nan nganong wala man ka mohatag niya?”

“Siya dili man usab mohatag nako! Gawas pa, gihimo kini nako alang sa akong kaugalingon, dili para niya,” miingon si Andrew. Apan medyo mibati siya og dili maayo. Tingali dili gayod maayo nga siya dili manghatag.

“Nakahibalo ka ba nga sa Korea, ang paghatag importante kaayo?” Nangutana si Papa. Ang pamilya ni Andrew gikan sa Korea. “Ang paghatag mao ang usa ka paagi sa pagpakita sa usa ka tawo nga ikaw nagpakabana kanila. Mao nga kon ikaw dili mohatag, ingon og ikaw nagsulti nga ikaw wala magpakabana nila.”

“Apan ako tinuod nga nagpakabana ni Caleb.”

Si Andrew naghunahuna mahitungod sa unsay buhaton ni Jesus. Siya nahinumdom kon giunsa paghigugma ni Jesus ang tanan—bisan kadtong kinsa dili mabination kaniya.

“Siguro mohatag ko ni Caleb ugma ug tan-awon unsay mahitabo,” giingnan niya si Papa.

Mipahiyom si Papa. “Morag nindot na nga ideya.”

Sa dihang si Andrew padulong na matulog nianang gabhiona, siya naghunahuna og laing nindot nga mga butang nga iyang mahimo alang ni Caleb. Ganahan siya nga makasugod sa paghatag!

Pagkasunod buntag, si Andrew nahigmata nga nasurprisa. Si Caleb nagluto og pamahaw alang ra gayod kaniya!

“Si Papa nakigsulti nako mahitungod sa paghatag,” miingon si Caleb. “Gusto ko nga mohimo og mas maayo. Mao nga gihimo ni nako alang nimo.”

“Salamat!” Miingon si Andrew. “Gusto usab nako nga mohimo og mas maayo.”

Sa ulahing bahin nianang adlawa, si Andrew ug Caleb nanan-aw og salida. Si Andrew nitugot ni Caleb nga maoy mopili. Dayon nagluto siya og popcorn alang ra gayod ni Caleb! Mitan-aw siya sa sulod sa panaksan. Ingon og ang popcorn nagsulti, “KAN-A KO!” Apan si Andrew wala mokuha bisan usa. Gihatag niya ni Caleb ang panaksan ug miingon, “Imoha na ning tanan. Pasayloa ko nga wala ko mohatag sa una.”

Si Andrew mihatag ni Caleb sa tibuok semana. Mitugot siya ni Caleb nga mobasa sa iyang mga libro. Mitugot siya ni Caleb nga mogamit sa iyang mga igtitimaan [markers]. Mitugot siya ni Caleb nga modula sa iyang paborito nga dulaan. Mihatag gani siya ni Caleb og dugang higayon kon sila magdula.

Kon magsige og panghatag si Andrew ni Caleb, magsige sad og panghatag si Caleb kaniya! Sa wala madugay naghimo sila og maayong mga butang alang sa usag usa sa tanang higayon. Si Andrew nasayod nga ang Langitnong Amahan nagtabang niya nga mohatag sa iyang igsoong lalaki. Si Andrew dili hingpit sama ni Jesus, apan siya naningkamot nga mahimong mas sama Kaniya matag adlaw.

Kini nga istorya nahitabo sa USA.

Paghulagway pinaagi ni Adam Howling