Ang Libro sa Dinosaur

Ni Katie Morrell

(Gibase sa usa ka tinuod nga istorya)

Mikulismaot si Sophia. Nganong dili man siya mahimong ganahan usab og mga dinosaur?

Si Sophia ug Allie managkaluha, ug pinakasuod sila nga managhigala. Lahi-lahi sila og ganahan, apan mas nakapalingaw kini! Ganahan sila nga mag-uban sa pagdula.

Usa ka adlaw didto sa eskwelahan, si Sophia naghulam og usa ka libro kabahin sa mga dinosaur gikan sa library. Naghinamhinam siya nga ipakita kini ni Allie.

“Dili ka mahimong mobasa niana,” miingon si Timmy, usa ka batang lalaki sa iyang klase.

“Nganong dili man?” Nangutana si Sophia.

“Panglalaki man kana nga libro,” miingon siya. “Ang mga dinosaur para sa mga batang lalaki.”

Mikulismaot si Sophia. Nganong dili man siya mahimong ganahan usab og mga dinosaur? Iyang gisulod ang libro sa iyang backpack. Basta iya gihapon kining basahon.

Sa tibuok adlaw, naghunahuna si Sophia sa gisulti ni Timmy. Naglagot gihapon siya dihang miabot siya sa balay gikan sa eskwelahan.

“Unsay problema?” Nangutana si Mama.

“Miingon si Timmy nga dili ko mahimong mobasa og libro bahin sa mga dinosaur,” miingon si Sophia. “Miingon siya nga ang mga dinosaur para lang sa mga lalaki. Dili kana tinuod, di ba?”

“Siyempre dili,” miingon si Mama.

Miduko si Sophia. “Unya nganong misulti man si Timmy niana?”

“Basin wala siyay nailhang laing batang babaye nga ganahan og mga dinosaur,” miingon si Mama. “Apan ang Langitnong Amahan wala mohimo natong tanan nga parehas. “Ug gusto Siya nga magmabination kita sa usag usa.”

Gigakos ni Mama si Sophia. “Naguol ko nga ingon niadto ang pagtratar ni Timmy nimo. Apan ang Langitnong Amahan nahigugma kanimo. Ug ako pud.”

“Salamat, Ma,” miingon si Sophia. Mas arang-arang na ang iyang gibati karon.

“Makig-istorya ko sa inyong titser mahitungod niini, OK?” Miingon si Mama.

Mitando si Sophia. “OK.”

Miadto Siya aron makigdula ni Allie. Naghimo sila og dula nga gitawag og Super Princess Racer, diin ang mga munyeka ni Allie maoy mga drayber sa panglumba nga sakyanan. Hapita oy, pero si Princess Lightning Cheetah maoy mananaog! Miabiba si Sophia ug si Allie.

“Gusto kang motan-aw sa libro sa dinosaur nga akong gidala karon?” Nangutana si Sophia.

“Sige ba!” Miingon si Allie.

Mipahiyom si Sophia. Nalipay siya nga permi siyang malingaw uban ni Allie.

Sa pagkasunod nga adlaw, ang titser ni Sophia adunay pahibalo. “Class,” miingon siya, “duna koy gustong isulti ninyo. OK ra nga lain-lain ta og mga butang nga ganahan. Ang tanan natong mga libro ug mga duwaan para sa tanan.”

Nadasig kaayo si Sophia! Sa panahon sa tingbasa, iyang gikuha ang libro sa dinosaur gikan sa iyang backpack.

Si Timmy miduol sa iyang lamesa. “Pasayloa ko nga ningsulti ko nga dili ka mahimong mobasa niana nga libro,” miingon siya. “Ganahan pud ko og mga dinosaur.”

“Walay kaso,” miingon si Sophia. “Ganahan kang modungan og basa nako?”

“Sige ba!” Mitupad niya si Timmy. “Salamat.”

Giablihan ni Sophia ang libro. Siya ug si Timmy managlahi, apan nindot kadto nga makig-ambit sa usa ka bag-ong higala.

Kini nga istorya nahitabo sa USA.

Ang Langitnong Amahan mihimo sa matag usa kanato nga adunay atong kaugalingong mga talento ug mga gana. Unsaon ninyo pagpakigbahin sa inyoha, sama sa gibuhat ni Spophia?

Paghulagway pinaagi ni Mark Robison