“Pagtuman sa Iyang Saad,” Higala, Mar. 2023, 10–11.
Pagtuman sa Iyang Saad
Namakak ko ni Papa. Karon unsa man?
Kini nga istorya nahitabo sa Ghana.
“Unom na lang ka adlaw hangtod sa akong bunyag!” Si Happiness miingon. Ang adlaw hapit na gyod moabot!
“Andam ka na ba?” pangutana ni Papa.
“Tingali,” miingon si Happiness.
“Kon ikaw mabunyagan na, ikaw mohimo og pakigsaad,” miingon si Papa. “Nakahinumdom ka ba unsay gipasabot niana?”
“Kini usa ka saad, sakto?”
Mitando si Papa. “Oo! Ikaw mosaad nga mosunod ni Jesukristo ug motuman sa mga sugo. Ang Langitnong Amahan misaad sa pagpanalangin ug pagtabang nimo.”
Mipahiyom si Happiness. Nasayod siya nga kini usa ka importante nga saad. Siya naghinam-hinam na nga mohimo niini!
Sa kataposan ang adlaw sa iyang bunyag miabot. Nag-ilis si Happiness og puti nga sinina. Laing duha ka bata ang bunyagan usab. Silang tanan nagtan-aw samtang ang tubig mipuno sa bunyaganan.
Sa dihang iya nang turno, si Happiness ug si Papa mikanaog ngadto sa bunyaganan. Gisulti ni Papa ang pag-ampo sa bunyag. Dayon gipislit ni Happiness ang iyang ilong, ug si Papa mituslob kaniya sa ilawom sa tubig.
Sa dihang mihaw-as siya, si Happiness mibati og nindot kaayo sa kahiladman! Siya gusto nga motuman sa iyang saad sa pagsunod ni Jesus. Siya gusto nga mobati niining kalimpyo ug kamalipayon sa kahangtoran. Siya dili na gusto nga mohimo og sayop nga pagpili pag-usab.
Paglabay sa pipila ka adlaw, si Happiness nahigmata ug miabli sa pangpainit sa tubig aron siya makaligo. Dugay-dugay pa moinit ang tubig. Maong gipaandar ni Happiness ang TV. Gusto siyang motan-aw og cartoons samtang siya maghulat.
Si Happiness mikatawa samtang siya nagtan-aw sa mga hayop nga mosulti diha sa screen. Kini nga salida kataw-anan kaayo! Sa wala madugay siya nakalimot mahitungod sa pangpainit sa tubig.
Paglabay sa usa ka oras, si Papa misulod sa kwarto. “Unsa na kadugay nag-andar ang pangpainit sa tubig?” siya nangutana.
Si Happiness mitan-aw. Nagtan-aw siya sa TV og dugay kay sa iyang plano!
“Dili pa lang dugay,” miingon si Happiness. “Pipila lang ka minuto.” Gipalong niya ang TV ug midagan aron maligo.
Apan sa nahibilin nianang adlawa, si Happiness mibati og dili maayo. Human sa iyang bunyag gusto siya nga dili na makahimo og sayop nga pagpili. Apan bag-o lang siya nga namakak ni Papa!
Nanghupaw si Happiness. Nasayod siya kon unsa ang kinahanglan niyang buhaton.
“Oy, papa,” miingon si Happiness. “Misulti ko og bakak. Akong gipasagdan ang pangpainit sa tubig og dugay, apan wala nako tuyoa. Pasayloa ko.”
“OK ra. Salamat sa pagsulti nako,” miingon si Papa.
“Gibati nako ang dili maayo tungod kay gisupak nako ang akong saad sa bunyag,” miingon si Happiness.
Si Papa milingkod uban ni Happiness sa sopa. “Sa dihang ikaw gibunyagan, ikaw wala mosaad nga maghingpit. Ikaw misaad nga maningkamot og maayo nga mosunod ni Jesus.”
Miyango si Happiness. Kana nakapaarang-arang og gamay sa iyang gibati.
“Ug ikaw nasayod ba unsay imong mabuhat kon ikaw makahimo og sayop nga pagpili?” Nangutana si Papa.
“Maghinulsol?” miingon si Happiness.
“Husto kana! Kon maghinulsol kita, ang Langitnong Amahan mopasaylo kanato. Dayon kita mahimong sama ka limpyo sa adlaw nga kita gibunyagan. Ang paghinulsol kabahin sa pagtuman sa imong saad sa bunyag.”
Mingisi si Happiness. “Mag-ampo ko ug mohangyo sa Langitnong Amahan sa pagpasaylo nako.” Nalipay siya nga siya makatuman sa iyang saad sa bunyag.
Mga paghulagway pinaagi ni Macky Pamintuan