Si Lillian ra

Ni Mikaela Wilkins

(Gibase sa usa ka tinuod nga istorya)

Si Lillian dili gusto nga siya rang usa sa Young Women.

Karong adlawa mao ang kataposan nga adlaw ni Lillian sa Primary. Mingawon si Lillian sa ubang mga bata sa Primary. Tulo ra sila—duha ka mas gagmay nga mga batang babaye ug ang iyang manghod nga lalaki, si Michael.

“Unsa ang imong gibati kabahin sa pag-adto sa Young Women?” nangutana ang iyang titser sa Primary.

Naghinamhinam na ko nga moadto sa klase kauban sa mas magulang nga mga babaye!” Miingon si Lillian.

“Nalipay ko nga ganahan na kaayo ka,” miingon ang iyang titser. “Kinsa pay laing kauban nimo sa Young Women?”

Naghunahuna si Lillian sa mas magulang nga mga babaye sa ward. Si Summer ug Cova bag-ohay lang nakahuman sa high school. Ug ang pamilya ni Melvina mibalhin og puyo. Kadiyot lang. Ang mahabilin. . . si Lillian ra.

Unsa man kaha ang mahitabo sa iyang klase sa Young Women? Ang mga titser ra ug siya? Morag kiwaw kaayo—ug mingaw. Ang paghunahuna niini nakapakulba ni Lillian. Nagkulismaot siya. Dili siya ganahan nga siya rang usa sa Young Women.

Sa nahabilin nga mga oras sa adlaw, si Lillian naghunahuna kabahin sa pag-inusara sa young women. Sa panihapon, iyang gibalhin-balhin ang pagkaon sa iyang plato nga wala kini kan-a. Iyang gihinay ang iyang tingog dihang iya nang turno sa pagbasa panahon sa pamilya nga pagtuon sa kasulatan.

Gibutang ni mama ang iyang kasulatan. “Unsay problema?” nangutana siya.

Nanghupaw si Lillian. “Mag-inusara ra unya ko sa Young Women!”

Mibalhin si Mama aron motupad og lingkod ni Lillian. Gigakos niya si Lillian. “Dili na sayon,” miingon siya. “Unsay among mahimo aron makatabang nimo?”

Naghunahuna si Lillian sa makadiyot. “Tingali mag-ampo ta nga adunay laing batang babaye nga mobalhin sa atong ward. Ug tingali si Papa makahatag nako og panalangin.”

Mipahiyom si Papa. “Nindot kaayo kana nga mga ideya.”

Miluhod ang pamilya aron mag-ampo. “Langitnong Amahan,” misugod si Lillian, “nalipay ko nga mobalhin na ko ngadto sa Young Women. Dili ko gusto nga mag-inusara, apan kon Imo kanang kabubut-on, sige lang. Palihog tabangi ko kon unsay akong mahimo aron mogaan ang akong pagbati. Ug kon gusto Nimo nga modasig og usa ka pamilya nga adunay batang babaye aron mobalhin sa among ward, nindot usab kaayo kana.”

Human sa pag-ampo, si Papa mipandong sa iyang mga kamot sa iyang ulo. “Mopanalangin ako nimo nga bation nimo ang kalinaw mahitungod sa pag-adto sa Young Women,” miingon siya. “Ang Langitnong Amahan mopanalangin kanimo samtang ikaw mangayo sa Iyang tabang.”

Si Lillian tuod mibati og kalinaw. Dili pa siya sigurado kon unsay iyang mabuhat aron mahimong mas sayon ang pagbalhin ngadto sa Young Women. Apan nasayod usab siya nga ang Langitnong Amahan motabang kaniya.

Pagka Dominggo, si Lillian gikulbaan gihapon og gamay. Apan nakahinumdom siya sa kalinaw nga iyang gibati human sa panalangin ni Papa. Nasayod siya nga OK ra ang tanan.

Sa sakrament miting, ang bishop mipahibalo nga si Sister Barns mao ang mahimong bag-o nga presidente sa Young Women. Si Sister Barns mibarog sa dihang gitawag ang iyang ngalan. Si Lillian wala gayod makaila kaniya, apan mahigalaon ang iyang panagway.

Miingon si mama nga dihang nag-edad siya parehas ni Lillian, ang iyang lider sa Young Women nahimong usa sa iyang pinakasuod nga mga higala. Basin si Lillian ug Sister Barns mahimong managhigala! Usa kadto ka tubag sa iyang pag-ampo.

Human sa sakrament miting, si Lillian miadto sa iyang bag-o nga klasrom. Adunay usa ka mas magulang nga babaye nga nagbarog sa hawanan.

“Hi,” miingon si Lillian. “Nagbisita ka ba sa among ward?”

Milingo-lingo ang batang babaye. “Dili. Ang among pamilya bag-o lang mibalhin dinhi.”

Mipahiyom si Lillian. “Welcome sa atong ward. Mao kini ang una nakong adlaw sa Young Women.” Siya og ang batang babaye milingkod sulod sa klasrom. “Lain pay ato, ako si Lillian.”

“Tinuod ka!” miingon ang bag-ong batang babaye. “Lillian sab ang akong ngalan!”

Mikatawa si Lillian. Ang Langitnong Amahan mitubag na usab sa iyang pag-ampo! Tingali ang pagbalhin sa Young Women dili na kaayo makaguol.

Kini nga istorya nahitabo sa Australia.

Mga paghulagway pinaagi ni Sue Teodoro