’Ā’amu nō roto mai i te mau pāpa’ira’a mo’a

Tē tāmarū nei Iesu i te vero

Iesu Mesia e ta’oto ra i ni’a i te hō’ē pahī ’a hi’o noa ai tāna mau pipi i te miti

Fa’ahōho’araʼa nā Apryl Stott

I te hō’ē pō ’ua rātere Iesu Mesia ’e tāna mau pipi nā ni’a i te miti i roto i te hō’ē pahī. ’Ua rohirohi roa Iesu ’e ’ua ta’oto a’e ra.

’Ua fa’aha’uti’uti te vero i te pahī tei roto Iesu ’e tāna mau pipi

’Ua tae mai te vero. ’Ua rarahi mai te mau ’are ’e ’ua rarahi roa mai ! ’Ua mata’u te mau pipi. ’Ua fa’aara iho ra rātou ia Iesu ’e ’ua ani iāna ’ia fa’aora ia rātou.

Tē tāmarūra’a Iesu i te vero

’Ua ti’a mai ra Iesu i ni’a ’e nā ’ō atu ra, « ’ei hau, ’a fa’aea ». ’Ua fa’aea te vero. ’Ua marū te pape.

E tamaiti e tūfetu ra i tōna nā rima ma te tāpiri i te mata

E nehenehe tō’u fa’aro’o ia Iesu Mesia e hōpoi mai i te hau iā’u. ’Ia ri’ari’a ana’e au, e nehenehe Iesu e tauturu mai iā’u ’ia fāri’i te hau.

E nehenehe ’oe e tai’o i teie ’ā’amu i roto i te Mareko 4:35–41 ’e Luka 8:22–25.