« ’O Lillian ana’e », Hoa, Māti 2023, 40–41.
’O Lillian ana’e
’Aita Lillian i hina’aro ’ia riro ’oia ana’e i roto i te feiā ’āpī tamāhine.
I teie mahana ’o te mahana hope’a ïa nō Lillian i roto i te Paraimere. E mihi Lillian i te tahi atu mau tamari’i o te Paraimere. E toru noa rātou—e piti tamāhine ’āpī a’e ’e tōna taea’e teina,’o Michael.
« E aha tō ’oe mana’o nō te haerera’a i roto i te Feiā ’Āpī Tamāhine ? ui atu ra tōna ’orometua Paraimere.
« Tē ’oa’oa nei au ’ia haere atu i roto i te piha ha’api’ira’a ’e te mau tamāhine pa’ari a’e ! ’Ua parau Lillian.
« Tē māuruuru nei ē tē ’oa’oa nei ’oe », ’ua parau tōna ’orometua. « ’O vai atu ā tei roto i te Feiā ’Āpī Tamāhine ’e ’o ’oe ? »
’Ua feruri Lillian i te mau tamāhine pa’ari a’e i roto i te pāroita. Nō fa’aoti noa mai nei te ha’api’ira’a tuarua a Summer ’e Cova. ’E ’ua taui te ’utuāfare o Melvina i te fa’aeara’a. E aha ? Nā te reira i vaiiho… ’o Lillian ana’e.
E aha te huru o tāna piha Feiā ’Āpī Tamāhine ? Te ’orometua ana’e ’e ’o ’ōna ? E mea huru ’ē roa—’e tē mo’emo’e. Nō te ferurira’a i te reira, ’ua tupu te au ’ore i roto ia Lillian. ’Ua fa’atu’atu’a ’oia i te mata. ’Aita ’oia i hina’aro ’ia vai ’ōna ana’e i roto i te Feiā ’Āpī Tamāhine.
Nō te toe’a o te mahana, ’ua feruri noa Lillian ē ’o ’ōna ana’e te feiā ’āpī tamāhine. I te tāmā’ara’a i te ahiahi, ’ua fa’anu’unu’u noa ’oia i te mā’a i roto i tāna mereti, ma te ’ore e ’amu i te reira. ’Ua mutamuta noa ’oia ’ia tae ana’e te taime nōna ’ia tai’o, i te taime tai’ora’a pāpa’ira’a mo’a a te ’utuāfare.
’Ua tu’u atu māmā i tāna mau pāpa’ira’a mo’a i raro. « E aha te fifi ? », tāna ïa uira’a.
’Ua māpu Lillian i te aho. « E riro ’o vau ana’e i roto i te Feiā ’Āpī Tamāhine ! »
’Ua haere atu māmā e pārahi i pīha’i iho ia Lillian. ’Ua tauahi atu iāna. « E ’ere i te mea ’ōhie », ’ua parau atu ’oia. « E aha tā mātou e nehenehe e rave nō te tauturu ia ’oe ? »
’Ua feruri Lilliana ma’a taime ’iti. « Penei a’e e nehenehe tātou e pure ’ia haere mai te tahi atu tamāhine i roto i te pāroita. E penei a’e e nehenehe pāpā e hōro’a mai iā’u i te hō’ē ha’amaita’ira’a »
’Ua ’ata’ata pāpā. « E mau mana’o maita’i ana’e te reira ».
’Ua tūturi te ’utuāfare nō te pure. « E te Metua i te ao ra », ’ua ha’amata Lillian, « tē ’oa’oa nei au ’ia tomo i roto i te Feiā ’Āpī Tamāhine. ’Aita vau e hina’aro ’ia vai ’o vau ana’e, mai te mea rā o te reira tō ’oe hina’aro, ’ua ti’a ïa te reira. ’A tauturu mai na iā’u ’ia ’ite e aha tā’u e nehenehe e rave ’ia maita’i a’e au. ’E mai te mea e hina’aro ’oe ’a fa’auru i te hō’ē ’utuāfare e tamāhine tō roto e hō’ē ā matahiti ’e tō’u, ’ia haere mai i roto i tā mātou pāroita, ’e mea maita’i ato’a ïa ».
I muri a’e i te pure, ’ua tu’u pāpā i tōna nā rima i ni’a i tōna upo’o. « Tē ha’amaita’i nei au ia ’oe ’ia fāri’i ’oe i te hau nō te haerera’a atu i roto i te Feiā ’Āpī Tamāhine », tāna ïa i parau. « E ha’amaita’i mai te Metua i te ao ra ia ’oe ’ia ani ’oe i tāna tauturu ».
’Ua fāri’i Lillian te hau. ’Aita ’oia i pāpū atu ra e aha tāna e nehenehe e rave nō te tomo ’ōhie atu i roto i te Feiā ’Apī Tamāhine. ’Ua ’ite ato’a rā ’oia ē, e tauturu mai te Metua i te ao ra iāna.
I te sābati, ’ua ri’ari’a ri’i noa ā Lillian. ’Ua ha’amana’o rā ’oia i te hau tāna i fāri’i i muri a’e i te ha’amaita’ira’a a pāpā. ’Ua ’ite ’oia ē, ’aita e fifi fa’ahou.
I roto i te purera’a ’ōro’a, ’ua fa’aara te ’episekōpo ē, e riro mai te tuahine Barns ’ei peresideni ’āpī nō te Feiā ’Āpī Tamāhine. ’Ua ti’a mai te tuahine Barns i te taime ’a pi’ihia ai tōna i’oa. ’Aita o Lillian i mātau maita’i iāna, e hi’ora’a hoa rā tōna.
’Ua parau Māmā ē, i te ti’ara’ahia tōna fāito matahiti mai tō Lillian, ’ua riro mai tōna ti’a fa’atere nō te Feiā ’Āpī Tamāhine ’ei hō’ē o tōna mau hoa maita’i roa a’e. Penei a’e e riro Lillian ’e te tuahine Barns ’ei mau hoa ! « ’O te hō’ē te reira ’o te pāhonora’a i tāna pure.
I muri a’e i te purera’a ’ōro’a, ’ua haere atu Lillian i roto i tāna piha ha’api’ira’a ’āpī. Tē ti’a ra te hō’ē tamāhine pa’ari a’e i roto i te aroā.
« ’Ia ora na », ’ua parau Lillian. « Tē haere mai nei ’oe nō te hi’o i tā mātou pāroita ? »
’Ua tā’iri’iri te tamāhine i tōna upo’o. « ’Aita. Nō tae noa mai nei tō mātou ’utuāfare i’ō nei ».
’Ua ’ata’ata Lillian. « Mānava i te haerera’a mai i tā mātou pāroita. Teie tō’u mahana mātāmua i roto i te Feiā ’Āpī Tamāhine ». ’Ua pārahi iho ra ’oia ’e te tamāhine i roto i te piha ha’api’ira’a. « ’O Lillian tō’u i’oa ».
« E aha ïa ! » te parau ïa a te tamāhine ’āpī. ’O Lillian ato’a tō’u i’oa ! »
’Ua ’ata Lillian. ’Ua pāhono fa’ahou te Metua i te ao ra i tāna pure ! Penei a’e e’ita paha te rirora’a ’ei Feiā ’Āpī Tamāhine ’ei ’ohipa mo’emo’e.
’Ua tupu teie ’ā’amu i Auteraria.
Fa’ahōho’ara’a nā Sue Teodoro