« Te buka nō te mo’o rarahi », Hoa, Māti 2023, 22–23.
Te buka nō te mo’o rarahi
’Ua tu’atu’a te mata o Sophia. Nō te aha ’aita ’oia e au ato’a i te mau mo’o rarahi ?
E maeha’a Sophia ’e o Allie, ’e e mau hoa maita’i roa rāua. E mea ta’a ’ē te mau mea tā rāua e au, nā te reira rā e fa’atupu i te ’ārearea rahi ! E mea au nā rāua ’ia ha’uti ’āmui.
I te hō’ē mahana i te fare ha’api’ira’a, ’ua tai’o Sophia i te hō’ē buka nō ni’a i te mau mo’o rarahi i roto i te piha vaira’a buka. ’Ua ’oa’oa roa ’oia i te fa’a’ite atu i te reira ia Allie.
« E’ita tā ’oe e nehenehe e tai’o i te reira », ’ua parau Timmy, hō’ē tamaiti i roto i tāna piha ha’api’ira’a.
« Nō te aha ’aita ? » Uira’a atu ra Sophia.
« Nā te tamāroa te reira buka », ’ua parau ’oia. « Nō te mau tamāroa te mau mo’o rarahi ».
’Ua tu’atu’a te mata o Sophia. Nō te aha ’aita ’oia e au ato’a i te mau mo’o rarahi ? ’Ua tu’u atu ’oia i te buka i roto i tāna pūtē tua. E tai’o iho ā ’oia i te reira.
I te mahana tā’āto’a, ’ua feruri noa Sophia i te mea tā Timmy i parau. Tē riri noa ra ’oia ’a ho’i ai ’oia i te fare nā te fare ha’api’ira’a mai.
« E aha te fifi ? » Uira’a atu ra māmā.
« ’Ua parau Timmy ē, e’ita tā’u e nehenehe e tai’o i te hō’ē buka nō ni’a i te mau mo’o rarahi », ’ua parau Sophia. « ’Ua parau ’oia, nā te mau tamāroa ana’e te mau mo’o rarahi. E ’ere te reira i te parau mau, e ’ere ānei ? »
E ’ere iho ā i te parau mau », ’ua parau māmā.
’Ua hi’o Sophia i raro. « Nō reira, nō te aha Timmy i parau ai i te reira ? »
« Penei a’e ’aita ’oia i ’ite i te tahi atu mau tamāhine e au nei i te mau mo’o rarahi », ’ua parau māmā. « Terā rā, ’aita te Metua i te ao ra i hāmani ia tātou pā’āto’a hō’ē ā huru. « ’E tē hina’aro nei ’oia ’ia hāmani maita’i tātou i te tahi ’e te tahi ».
’Ua tauahi atu māmā ia Sophia. « Tē tārahapa nei au i tō Timmy nā-reira-ra’a ia ’oe. ’Ua here rā tō tātou Metua i te ao ra ia ’oe. ’E o vau ato’a ».
« Māuruuru, māmā », te parau ïa a Sophia. Maita’i roa a’e ra ’oia i teienei.
« E haere au e paraparau i tō ’oe ’orometua ha’api’i nō ni’a i te reira, pāpū ? » ’Ua parau Māmā.
’Ua ta’iri’iri Sophia i te upo’o. « Pāpū ».
’Ua haere atu Sophia e ha’uti ’e ’o Allie. ’Ua hāmani rāua i te hō’ē ha’uti tei pi’ihia Super Princess Racer, e riro te mau pēpe ha’avare a Allie ’ei mau fa’ahoro pereo’o fa’atītīāu’a. E mea piri roa te terera’a, terā rā, tei te Princess Lightning Cheetah te rē ! ’Ua pōpō Sophia ’e ’o Allie.
« Hina’aro ānei ’oe e hi’o i te buka o te mo’o rarahi ’o tā’u i fāri’i i teie mahana ? » Ui a’era Sophia.
« ’Oia mau ! » ’Ua parau Allie.
’Ua ’ata’ata Sophia. ’Ua ’oa’oa roa ’oia ’ia ha’uti nā muri ia Allie.
I te mahana i muri iho, ’ua fa’aara atu te ’orometua ha’api’i a Sophia. « E te piha ha’api’ira’a ē », ’ua parau ’oia, « tē hina’aro nei au e parau atu ia ’outou i te hō’ē mea. ’Aita e fifi ’ia au i te mau mea ta’a ’ē. Nō te tā’āto’ara’a tā tātou mau buka ’e te mau ha’uti ato’a.
Ua ’oa’oa roa Sophia ! I te taime nō te tai’ora’a, ’ua tātara mai ’oia i te buka nō te mo’o rarahi i rāpae i tāna pūtē tua.
’Ua haere mai Timmy i tāna ’iri-’ohipa-ra’a. « Tē tārahapa nei au i te paraura’a ia ’oe, e’ita ’oe e nehenehe e tai’o i terā buka », ’ua parau ’oia. « E mea au ato’a nā’u te mau mo’o rarahi ».
« ’Aita e fifi », ’ua parau Sophia. « E hina’aro ānei ’oe e tai’o nā muri iā’u ? »
« ’Oia mau ! » ’Ua pārahi Timmy i pīha’i iho iāna. « Māuruuru ».
’Ua ’īrite Sophia i te buka. E mea ta’a ’ē ’oia ’e ’o Timmy, e mea au rā ’ia fa’a’ite atu ’e te hō’ē hoa ’āpī.
’Ua tupu teie ’ā’amu i te Fenua Marite.
Fa’ahōho’ara’a nā Mark Robison