« Te ha’apa’ora’a i tāna parau fafau », Hoa, Māti 2023, 10–11.
Te ha’apa’ora’a i tāna parau fafau
Nō ha’avare noa mai nei au ia pāpā. E aha ïa i teienei ?
’Ua tupu teie ’ā’amu i Ghana.
« E ono noa mahana e toe ra hou tō’u bāpetizora’a ! » ’Ua parau Happiness. ’Ua fātata roa mai te mahana !
« ’Ua ineine ’oe ? » ui atu ra pāpā.
« I tō’u mana’o, ’ē », ’ua pāhono Happiness.
« ’Ia bāpetizo-ana’e-hia ’oe, e rave ’oe i te hō’ē fafaura’a », ’ua parau pāpā. « Tē ha’amana’o ra ’oe e aha te aura’a nō te reira ? »
« E parau fafau, e ’ere ānei ? »
Tā’iri’iri ihora pāpā te upo’o. « ’Ē ! E fafau ’oe ’ia pe’e ia Iesu Mesia ’e ’ia ha’apa’o i te mau fa’auera’a. E fafau mai te Metua i te ao ra ’ia ha’amaita’i ’e ’ia tauturu ia ’oe ».
’Ua ’ata’ata Happiness. ’Ua ’ite ’oia ē, e parau fafau faufa’a mau te reira. ’Ua ’oa’oa roa ’oia ’ia rave i te reira !
Teie te mahana nō tōna bāpetizora’a. ’Ua taui Happiness iāna nō te ’ahu ’uo’uo. E piti nā tamari’i e bāpetizo-ato’a-hia. ’Ua hi’o pā’āto’a rātou i te fa’a’īra’ahia te vāhi bāpetizora’a i te pape.
I te taera’a mai tōna taime, ’ua pou Happiness ’e ’o pāpā i roto i te pape. ’Ua fa’ahiti pāpā i te pure bāpetizora’a. I muri iho, ’ua tāpe’a Happiness i tōna ihu, ’e ’ua taumi pāpā iāna i raro i te pape.
I tōna ti’ara’a mai, ’ua fāri’i Happiness i te au maite i roto iāna ! ’Ua hina’aro ’oia e tāpe’a i tāna parau fafau ’ia pe’e ia Iesu. ’Ua hina’aro ’oia ’ia fāri’i i teie mā ’e teie ’oa’oa e a muri noa atu. ’Aita roa atu ’oia e hina’aro fa’ahou e rave i te hō’ē mā’itira’a hape.
Tau mahana i muri mai, ’ua ara mai Happiness ’e ’ua fa’a’ama i te mātini ha’ave’ave’a pape nō te hapu i te pape. E taime roa roa e ve’ave’a ai te pape. Nō reira, ’ua fa’a’ama Happiness i te ’āfata teata. ’Ua hina’aro ’oia e māta’ita’i i te mau hōho’a nā te tamari’i, ’a tīa’i noa ai.
’Ua ’ata’ata noa Happiness ’a māta’ita’i ai ’oia i te mau ’ānimara e paraparau i ni’a i te paruai. E mea ’ārearea roa teie hōho’a ! ’Aita i maoro, ’ua mo’ehia iāna te mātini ha’ave’ave’a pape.
Hō’ē hora i muri mai, ’ua haere mai pāpā i roto i te piha. « E aha te maorora’a i fa’a’amahia ai te mātini ha’ave’ave’a pape ? » ui a’e ra pāpā.
Hi’o atu ra Happiness. ’Ua māta’ita’i ’oia i te ’āfata teata hau atu te maoro i tāna i mana’o !
« ’Aita i maoro roa », ’ua parau Happiness. « Te tahi noa tau minuti ». Tūpohe a’e ra ’oia i te ’āfata teata ’e horo atu ra e hopu i te pape.
Terā rā i te toe’a o te mahana, ’ua vai noa te au ’ore i roto ia Happiness. I muri a’e i tōna bāpetizora’a, ’ua hina’aro ’oia ’eiaha roa atu e rave i te mā’itira’a ti’a ’ore. Nō ha’avare noa mai rā ’oia ia pāpā !
’Ua māpu Happiness i te aho. ’Ua ’ite ’oia e aha te mea tāna i rave.
« E pāpā », ’ua parau Happiness « ’Ua ha’avare au. E mea maoro tō’u fa’a’amara’a i te mātini ha’ave’ave’a pape, ’aita ho’i au i hina’aro. ’Ua hape au ».
« Nā reira. Māuruuru nō te fa’a’itera’a mai », ’ua parau pāpā.
« ’Ua au ’ore roa vau nō te mea ’ua ’ōfati au i tā’u parau fafau nō te bāpetizora’a », ’ua parau Happiness.
Pārahi ihora pāpā i pīha’i iho ia Happiness i ni’a i te pārahira’a marū. « I te bāpetizora’ahia ’oe, ’aita ’oe i fafau ’ia riro ’ei ta’ata maita’i roa. ’Ua fafau ’oe ’ia tāmata itoito noa i te pe’e ia Iesu ».
’Ua tā’iri’iri Happiness te upo’o. ’Ua ’ana’anatae ri’i mai ’oia i terā parau.
« ’E ’ua ’ite ānei ’oe e aha tā ’oe e rave ’ia rave ana’e ’oe i te hō’ē mā’itira’a hape ? » Ui atu ra pāpā.
« Tātarahapa ? » ’ua parau Happiness.
« Te reira mau ! ’Ia tātarahapa ana’e tātou, e fa’a’ore mai te Metua i te ao ra i tā tātou hara. I muri iho, e nehenehe tātou e vai mā noa mai te mahana ’a bāpetizohia ai tātou. Te tātarahapara’a e tuha’a ïa nō te ha’apa’ora’a i tā ’oe parau fafau nō te bāpetizora’a ».
’Ua ’ata’ata Happiness. « E pure au ’e e ani au i te Metua i te ao ra ’ia fa’a’ore mai i tā’u hapa ». ’Ua māuruuru roa ’oia e ti’a fa’ahou iāna ’ia ha’apa’o i tāna parau fafau nō te bāpetizora’a.
Fa’ahōho’ara’a nā Macky Pamintuan