Tamari’i ’e te feiā ’āpī

Tā’u fā nō te Buka a Moromona

Nā Vebika H., 8 matahiti, Utaha, fenua Marite

Hōho’a upo’o o te hō’ē tamāhine mata ’ata’ata ’e hō’ē huruhuru manu ’uo’uo i roto i te rouru

E tamāhine e tai’o ra i te mau pāpa’ira’a mo’a ’e fa’aro’o tari’a

Fa’ahōho’ara’a nā Rachel Hoffman-Bayles

’Ua ha’amau vau i te hō’ē fā e tai’o i te Buka a Moromona hou tō’u bāpetizora’a, mai tā tō’u tua’ana ’e tā tō’u tuahine i rave. I te tupura’a mai rā te COVID, ’ua ma’iri au e rave rahi taime i te ha’api’ira’a, ’e ’ua riro te tai’ora’a ’ei ’ohipa fifi roa nō’u. E rave rahi parau rarahi i roto i te Buka a Moromona, ’e ’ua hina’aro vau i te tauturu.

I muri iho, ’ua tupu mai te hō’ē mana’o i roto i iā’u ’e tō’u nā metua. ’Ua fa’a’ohipa vau i te fa’anahora’a vaira’a buka ’evanelia ’āfa’ifa’i i ni’a i te niuniu a tō’u māmā, nō te fa’aro’o i te Buka a Moromona. ’Ua fa’ataere mātou i te mau reo ’ia nehenehe iā’u ’ia tai’o ’e ’ia pe’e ’ōhie a’e. ’Ua tāpe’a ato’a vau i te roara’a o te tai’ora’a i te tahi taime, nō te māta’ita’i i te mau video tei ’āpitihia i roto i te fa’anahora’a. I te mau taime ato’a e tai’o vau, e tāpa’o vau i ni’a i te hō’ē tāpura. ’Ua paraparau vau i tō’u māmā i te mea tā’u e tai’o ra. E mea ’ārearea roa !

’Ua maita’i mai tā’u tai’ora’a, ’aita rā vau i mana’o e oti te reira nā mua a’e i tō’u bāpetizora’a. Nō reira ’ua parau vau ē, mai te mea ’aita e oti nā mua a’e i tō’u bāpetizora’a, e fa’aoti ïa vau nā mua a’e i te hope’a o te matahiti, (’oia ho’i, hō’ē ’āva’e i muri a’e). ’Ua tāmau noa vau i te tai’o. I te tahi taime, e tai’o ato’a tō’u māmā ’aore rā tō’u tuahine nā muri iā’u.

I te 31 nō Tītema, ’ua fa’aoti au i te tai’o i te Buka a Moromona ! ’Ua pōpō tō’u ’utuāfare tā’āto’a. I muri iho, ’ua haere au i roto i tō’u piha nō te fa’aoti i te hō’ē pure. ’Ua ani au e parau mau ānei te Buka a Moromona, ’e ’ua fāri’i au te au maita’i i roto iā’u.

’Ua ’ite au ē, e fa’aro’o mai te Metua i te ao ra ’ia pure ana’e au. ’Ua ’ite au ē, ’ua here tō’u nā metua i te ao ra iā’u. ’Ua ’ite au ē, e parau nā te Atua te Buka a Moromona, ’e ’ua here Iesu ia tātou.