« Te fifi nō te ’ōperera’a », Hoa, Māti 2023, 36–37.
Te fifi nō te ’ōperera’a
« Te ’ōperera’a e rāve’a ïa nō te fa’a’ite i te tahi atu ta’ata ē, tē ha’ape’ape’a nei ’oe nōna ».
Crunch, crunch, crunch. ’Ua horomi’i Andrew i tāna popcorn ’e ’ua rave fa’ahou mai hō’ē ’apu rima.
’Ua pārahi mai ra tōna tua’ana ’o Caleb i ni’a i te pārahira’a marū i pīha’i iho iāna. « Hey, e nehenehe ānei tā’u e fāri’i i te tahi ? »
’Ua mau noa te mata ’o Andrew i ni’a i te ’āfata teata. « ’Aita ».
« E, ’a hani na. E nehenehe ’oe e ’ōpere ».
’Ua rave mai Caleb i te ’āu’a, ’ua haru mai rā Andrew i te reira.
« ’Aita ! ’Ua parau a’ena vau ia ’oe. ’Eiaha e ani fa’ahou mai ! »
« Maita’i roa ! » ’Ua ti’a a’era Caleb i ni’a ’e ’ua haere i rāpae i te piha.
I te mahana i muri iho, ’ua haere atu Andrew i roto i te piha tunura’a mā’a. Tē hāmani ra Caleb i te tahi sushi ’e te raiti, te remu ’e te pua’a punu.
’Ua tahe te hā’ae ’o Andrew. « E nehenehe ānei tā’u e fāri’i i te tahi ? »
« ’Aita », ’ua parau Caleb.
’Ua fa’a’ino’ino roa te reira ia Andrew. ’Ua horo atu ’oia i raro nō te fa’a’ite ia pāpā.
« Nō te aha Caleb mai terā ai te piro mā’a ? » tāna ïa uira’a.
’Ua tu’atu’a te mata ’o pāpā. « ’Ua ’ite atu vau i nanahi ra ē, ’aita ’oe i ’ōpere i tā ’oe popcorn. Nō te aha e ti’a ia Caleb e ’ōpere nā ’oe, inaha ho’i ’aita ’oe i ’ōpere tā ’oe nāna ? »
« Nō te mea e taea’e ’oia nō’u ! » ’Ua parau Andrew.
« Nō te aha ïa ’aita ’oe i ’ōpere i tā ’oe nāna ? »
« ’Aita ato’a ’oia e ’ōpere i tāna nā’u ! Hau atu, ’ua hāmani au te reira nā’u, ’eiaha ra nāna », ’ua parau Andrew. ’Ua māuiui ri’i rā ’oia. E mea ’ino mau paha nōna i te ’orera’a e ’ōpere.
« ’Ua ’ite ānei ’oe i Korea, e mea faufa’a roa te ’ōperera’a ? » ’Ua ui atu pāpā. Nō Korea mai te ’utuāfare o Andrew. « Te ’ōperera’a e rāve’a ïa nō te fa’a’ite i te tahi atu ta’ata ē, tē ha’ape’ape’a nei ’oe nōna. Nō reira, mai te mea ’aita ’oe e ’ōpere e au ra ïa ē, tē parau ra ’oe ’aita ’oe e ha’ape’ape’a ra nō rātou ».
« Tē ha’ape’ape’a nei au nō Caleb ».
’Ua feruri Andrew e aha tā Iesu e rave. ’Ua ha’amana’o ’oia i tō Iesu herera’a i te mau ta’ata ato’a—tae noa atu ia rātou tei hāmani ’ino iāna.
« Tē mana’o nei au ’ananahi, e ’ōpere au nā Caleb ’e e hi’o vau e aha te ’ohipa e tupu mai », tāna ïa i parau ia pāpā.
’Ua ’ata’ata pāpā. « Tē mana’o nei au e mana’o maita’i roa te reira ».
I te haerera’a Andrew e ta’oto i taua pō ra, ’ua feruri ’oia i te tahi atu mau mea maita’i tāna e nehenehe e rave nō Caleb. ’Ua ’oa’oa roa ’oia ’ia ha’amata i te ’ōpere !
I te po’ipo’i a’e, ’ua ara mai Andrew ma te māere. ’Ua fa’aineine Caleb i te mā’a nāna ana’e ! (nā Andrew)
« ’Ua paraparau mai pāpā iā’u nō ni’a i te ’ōperera’a », ’ua parau Caleb. « ’Ua hina’aro vau ’ia rave maita’i atu. Nō reira ’ua fa’aineine au i teie nā ’oe ».
« Māuruuru ! ». ’Ua parau Andrew. ’Ua hina’aro ato’a vau e rave maita’i atu ā ».
I muri a’e i taua mahana ra, ’ua māta’ita’i Andrew ’e ’o Caleb i te hōho’a teata. ’Ua vaiiho Andrew ia Caleb ’ia mā’iti i te hōho’a. I muri iho, ’ua tunu ’oia i te tahi popcorn nā Caleb ana’e ! ’Ua hi’o atu ’oia i roto i te ’āu’a. Mai te huru ra ē, tē nā ’ō mai ra te popcorn ē : « ’A ’amu iā’u ! » ’Aita rā Andrew i rave hō’ē noa a’e. ’Ua hōro’a atu ’oia ia Caleb i te ’āu’a ’e nā ’ō atu, « nā ’oe ana’e terā. ’Eiaha e ’ino’ino mai i te mea ē, ’aita vau i ’ōpere nā ’oe nā mua atu ».
’Ua ’ōpere Andrew nā Caleb i te roara’a o te hepetoma. ’Ua vaiiho ’oia ia Caleb ’ia tai’o i tāna mau buka. ’Ua vaiiho ’oia ia Caleb ’ia fa’a’ohipa i tāna mau peni tara. ’Ua vaiiho ’oia ia Caleb ’ia ha’uti i tāna mau tao’a ha’uti au roa a’e. ’Ua hōro’a ato’a ’oia ia Caleb i te tahi taime hau ’a ha’uti ai rāua i te hō’ē ha’uti.
Rahi noa atu tō Andrew ’ōperera’a nā Caleb, rahi noa ato’a atu tā Caleb ’ōperera’a nā Andrew ! ’Aita i maoro, ’ua rave rāua i te mau ’ohipa maita’i nō te tahi ’e te tahi i te mau taime ato’a. ’Ua ’ite Andrew ē, tē tauturu ra te Metua i te ao ra iāna ’ia ’ōpere nā tōna taea’e. ’Aita Andrew i te mea maita’i roa mai ia Iesu, tē tāmata nei rā ’oia ’ia riro hau atu mai iāna te huru i te mau mahana ato’a.
’Ua tupu teie ’ā’amu i te Fenua Marite.
Fa’ahōho’ara’a nā Adam Howling