« Te pure o te ’āueuera’a fenua », Hoa, Māti 2022, 4–5.

Te pure o te ’āueuera’a fenua

Nā Noelle Barrus

(Nō roto mai i te hōʼē ʼāʼamu mau)

I tō Violette arara’a mai, tē ’āueue ra te mau mea ato’a !

’Ua tupu teie ’ā’amu i Peru.

E tamāhine iti tei ara mai ma te hitimahuta nā ni’a mai i tōna ro’i, e tāpe’a ra i te hō’ē ’ahu ta’oto.

Tē ta’oto ra Violette, ’a fa’aarahia ai ’oia e te hō’ē haruru. Nā mua, ’ua mana’o ’oia e pātiri.

’Ua haere pūai roa mai rā te haruru. ’Ua fa’a’āueue te reirra i te mau māramarama o tōna piha.

’Ua ti’a ’oi’oi mai Violette i ni’a. E ’āueuera’a fenua teie !

’Aita i maoro a’e nei, ’ua fa’anu’u mai ’oia ’e tōna ’utuāfare i Peru. ’Ua ’ite ’oia e mea pinepine te mau ’āueuera’a fenua i te tupu i teie vāhi. ’E ’ua fa’aineine ’oia ’e tōna ’utuāfare ia rātou iho nō te reira, ’e ’ua ha’api’ipi’i mai i te ’ohipa e rave. E mea ri’ari’a roa atu rā teie, hau atu i tāna i feruri na. ’Ua nehenehe iāna ’ia ’ite i tōna tino ’ia ’āueue !

’Ua horo atu Violette i te piha tunura’a mā’a ’e ’ua ne’e atu i raro a’e i te ’amura’a mā’a. Tau tetoni i muri mai, ’ua ’āmui mai tōna taea’e ’e tōna tuahine iāna. Nā reira ato’a ’o māmā ’e ’o pāpā.

« Maita’i roa i te ha’amana’ora’a i te mau mea tā tātou i ha’api’ipi’i mai », te parau ïa a pāpā. « E mea maita’i ānei te mau ta’ata ato’a ? »

’Ua tā’iri’iri te taea’e ’e te tuahine o Violette i tō rāua upo’o.

’O Violette rā, ’ua ri’ari’a roa ïa. ’Ua tāpiri ’oia i tōna nā mata. E mea fifi roa ’ia ’ore e tāu’a i te ’āueuera’a ’ati a’e iāna.

I muri iho, ’ua ha’amana’o Violette e pure. ’Ua tūfene ’oia i tōna nā rima ’e ’ua pi’o i tōna upo’o. « E te Metua here i te ao ra », ’ua muhumuhu ’oia, « ’a aupuru mai nā i tō’u ’utuāfare ».

E ’utuāfare e pure ra i raro a’e i te ’aira’amā’a i te taime o te hō’ē ’āueuera’a fenua

’Ua tāmau noa Violette i te pure. E au ra iāna tē tauahi mai ra te hō’ē ta’ata iāna. I tōna fa’aotira’a, ’ua hi’o a’era ’oia i ni’a. Tē tūfene noa ra māmā ’e ’o pāpā i tō rāua rima. Nā reira ato’a tōna taea’e ’e tōna tuahine. Tē pure ra rātou pauroa ! Tē ’āueue noa ra te fenua. ’Ua fāri’i rā Violette i te hau i roto i tōna ’ā’au ’e tōna ferurira’a.

I te pae hope’a, ’ua fa’aea te ’āueuera’a. ’Ua fa’aea ri’i noa ā Violette ’e tōna ’utuāfare i raro a’e i te ’amura’a mā’a, nō te pāruru noa ā ia rātou.

« E aha tō ’oe huru ? » Te anira’a ïa a māmā ia Violette.

« Maita’i », ’ua pāhono Violette. « I te ha’amatara’a, ’ua ri’ari’a mau vau. ’Ua tauturu mai rā te pure iā’u ’ia maita’i a’e ». ’Ua tauahi atu ra ’oia ia māmā. ’Ua ’oa’oa ’oia i te tauturura’a te Metua i te ao ra iāna ’ia fāri’i i te hau.