Pāpa’ihia nā ’outou

Tō’u mahana bāpetizora’a

Nā Megan S., 10 matahiti, Michoacán, Mehiko

Hōho’a upo’o nō te hō’ē tamāhine mata ’ata’ata

E ’utuāfare ’e e toru tamāhine e haere nei i te purera’a

’Ia ora na ! ’O Megan tō’u i’oa, ’e tē ora nei au i Mehiko. Tē hina’aro nei au e fa’ati’a atu ia ’outou i te hō’ē taime ta’a ’ē roa i roto i tō’u orara’a—te mahana i bāpetizohia ai au.

’Ua bāpetizohia vau i te va’ura’a o tō’u mahana fānaura’a. E mahana faufa’a roa te reira nō te mea ’ua fa’ahanahana vau i tō’u mahana fānaura’a nā roto i tō’u bāpetizora’a.

’Ua riro tō’u bāpetizora’ahia ’ei ’ohipa nehenehe roa. ’Ua hāmani tō’u māmā i te hō’ē buka pāpa’i ’e te mau ’ohipa rau e rave ’ia fa’aineinehia. ’Ua tauturu te reira iā’u ’ia hāro’aro’a nō ni’a i te faufa’a o te bāpetizora’a ’e te mau fafaura’a ’o tā’u e rave ’e te Metua i te ao ra.

E tamāhine i roto te ’ahu tārona e tāpe’a ra i te buka pāpa’i

E rave rahi ta’ata tei here iā’u tei haere mai i tō’u bāpetizora’a. ’Ua ’oa’oa roa vau i tō rātou haerera’a mai. ’Ua ’ō’omo mai au i te hō’ē ’ahu ’uo’uo, ’e e mea māhanahana te pape.

I muri a’e i tō tō’u pāpā bāpetizora’a iā’u, ’ua tāmarō vau iā’u ’e ’ua taui i te ’ahu. I muri iho, ’ua fāri’i au i te hōro’a o te Vārua Maita’i ? ’Ua ha’amauhia vau ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e te mau taea’e tei mau i te autahu’ara’a. ’Ua fāri’i au i te hau rahi, te here ’e te ’oa’oa.

E tamāhine e bāpetizohia ra, ’a māta’ita’i noa ai te tahi atu mau tamari’i

E ha’amana’o tāmau noa vau i taua mahana ra. E mea ta’a ’ē mau nō te mea ’ua rave au i tā’u fafaura’a mātāmua ’e te Atua. ’Ua fafau vau ’ia pe’e ia Iesu ’e ’ia ha’apa’o i tāna mau fa’auera’a.

Tamāhine e tauahi ra ia pāpā

Mai te mea tē taiā ra ’outou nō te huru o tō ’outou mahana bāpetizora’a, ’eiaha e ha’ape’ape’a. E ’oa’oa te Metua i te ao ra nō te mā’itira’a tā ’outou i rave !

PDF o te ’ā’amu

Fa’ahōho’ara’a nā Olga Lee