“O le Lulu ma le Tafola,” Uo, Me 2023, 8–9.
O le Lulu ma le Tafola
E mafai faapefea ona fesoasoani atavali a Dieter i isi?
O lenei tala sa tupu i Kanata.
Sa manao Dieter e faalogologo i le konafesi aoao. Sa ia taumafai e nofo filemu. Sa ia taumafai e faalogo i lauga. Ae o le i ai o lefaafitauli i le tuputupu ae o le mafaufau [autism] na faigata ai ia te ia ona taulai atu. Sa ia faamimigi i luga o le nofoa. Sa ia taalo i ana meataalo. Sa ia tamoe solo.
Ona ia tilotilo atu lea ia Tama. Sa nofo filemu Tama ma faalogologo i failauga. Sa manao Dieter e avea e pei o ia. O lea na ia aumai ai i fafo ana sapalai o vali ata. Atonu o le valivaliina o se ata o le a fesoasoani ia te ia e nofo filemu ai.
A o valivali o ia, sa faalogologo Dieter a o saunoa Elder Jeffrey R. Holland. Sa faamatala e Elder Holland se tala e uiga ia Iesu. Sa talosagaina e Iesu se taulealea mauoa e avatu ana tupe uma i e matitiva.*
Sa manao Dieter e fesoasoani i tagata e lei lava foi ni tupe. Ma sa i ai sona manatu.
“Tina, ou te fia valiina se lulu,” o le tala lea a Dieter. “E mafai ona e tusia se ata mo au?”
“Ioe,” o le tali lea a Tina. Sa ia tusia se lulu.
Sa fufui e Dieter lana pulumu vali i totonu o ni vali. Sa ia valiina muamua apaau o le lulu. Sa ia valiina ni fulu enaena ma ni fulu lanumoli. A o ia valiina, sa ia faalogologo i isi lauga. E ui lava ina ua uma uma lauga, sa faaauau pea ona galue Dieter. Sa manao o ia ia lelei atoatoa le lulu.
Mulimuli ane sa uma ona faia e Dieter. Sa ia faaali atu le lulu ia Tina.
“Manaia tele!” Na fai atu ai Tina. “Pe tatau ona tatou tautaua i luga?”
Sa lūlū le ulu o Dieter e leai. “Ou te manao e faatau atu ma tuuina atu le tupe e fesoasoani ai i tagata e le lava ni tupe. E pei ona latou talanoa e uiga i ai i le konafesi.”
Na ataata Tina. Se’i ta vaai po o a mea e mafai ona ta faia.”
Sa ia tuuina i luga se ata o le atavali a Dieter e faatau atu i luga o le initoneti. Na tusia e Tina e faapea, o le a tuuina atu e Dieter le tupe i se malutaga mo tagata e leai ni fale.
O le aso na sosoo ai, na siaki ai e Dieter ma Tina le faasalalauga. Sa le talitonu Dieter! E toatele tagata na mananao e faatau lana ata. Sa fiafia o ia i le toatele o tagata sa mananao e fesoasoani.
Sa talosagaina e se faleaiga i le nuu o Dieter e faatau le atavali. Sa latou fai mai o le a latou totogia faa-10 e sili atu nai lo le mea na talosagaina e Dieter ma Tina! Sa fesili atu foi isi faleoloa ia te ia mo ni atavali. Sa tele atu galuega a Dieter e fai!
Sa tusilolomi e Tina nisi manu, ma sa aumai i fafo e Dieter ana vali. Sa ia valiina se luko, se leona, ma se tafola. Sa sili atu ona fiafia o ia i le tafola. Sa ia faaigoaina “O Otis le Tafola.” O se faleoloa i talaane o lona fale na faatauina. O le isi taimi na alu ai Dieter i le faleoloa, sa ia vaaia ai o tautau i luga o le puipui!
“Tina, vaai!” Sa tusi atu Dieter i le atavali.
“Oka!” Na fai atu ai Tina. “Soo se taimi lava tatou te o mai ai iinei, e mafai ona tatou manatua le auala na fesoasoani ai au taleni i tagata.”
Sa mitamita Dieter i le fiafia o tagata i ana atavali. Ae sa sili atu lona fiafia i le mafai ona ia fesoasoani atu i isi. Sa fiafia o ia sa ia faalogologo i le taimi o le konafesi aoao.
Ata na tusia e Natalie Campbell