“O Le Faletatala o le Malumalu,” Uo, Me 2023, 16–17.
O Le Faletatala o le Malumalu
Na matua fiafia lava Svetan e alu i totonu o le malumalu!
O lenei tala sa tupu i le ISA.
Sa lagona e Svetan le fiafia. Sa siitia atu lona aiga mai Atenitina i le Iunaite Setete. Ma o lenei ua oo i le taimi e oso ai i luga o le vaalele telē!
Sa tilotilo atu Svetan i fafo o le faamalama a o alu ese le vaalele. Sa ia mafaufau pe mata o le a faape’i lona fale fou. O le a ese mea uma. O se fale fou. O se potumoe fou. O se tuaoi fou. Ma uo fou e feiloai i ai! Sa fiafia Svetan.
Sa iloa foi e Svetan o lona fale fou e latalata i se malumalu lea faatoa uma ona fausia. I Atenitina, sa mamao ese le malumalu. Sa na ona ia vaai i ai i ata.
Sa liliu atu Svetan ia Mama. “E te manatu o le a mafai ona tatou vaai i le malumalu mai le vanimonimo?”
Sa ataata Mama. “Pei lava e leai. Ae o le a tatou vaai i ai i se taimi e le o toe mamao.”
Sa toe ataata Svetan. Fai mai Mama ma Papa e lei tatalaina le malumalu. Ae e le o toe umi ona i ai lea o se faletatala. O lona uiga e mafai e tagata ona o i totonu e vaai i ai a o lei faapaiaina. Ma o le a o atu le aiga o Svetan i le faletatala! Sa le mafai ona ia faatali e vaai i le malumalu i le tulaga moni.
I ni nai itula mulimuli ane, sa i ai Svetan ma lona aiga i lo latou fale fou. Sa itele mea e fai. Sa fesoasoani Svetan e tatala a latou atigipusa ma fai ia foliga manaia lo latou fale.
I le aso a o lumanai le faletatala, sa latou saofafai ai i lalo i le potu malolo e talanoa.
“O le malumalu o le maota o le Alii,” o le tala lea a Mama. “Pe a tatou i ai i totonu, e tatau ona tatou migao. E te iloa le uiga o lena mea?”
“Ia talanoa filemu ina ia mafai ona tatou lagona atili le Agaga Paia?” Sa fesili atu ai Svetan.
“Sa’o lelei,” na fai mai ai Mama. “E tele mea e mafai ona tatou aoaoina pe a tatou i ai i totonu o le malumalu.”
Sa lue atu le ulu o Svetan. Sa manao o ia ia migao ina ia mafai ona ia lagonaina le Agaga Paia i totonu o le malumalu.
O le taeao na sosoo ai, na alapo ai Svetan. Sa ia ofuina ona ofu o le Aso Sa. E le’i umi ae oo i le taimi e o ai.
Sa taunuu le aiga o Svetan i le malumalu. Sa fesoasoani tagata ia i latou e tuu ni tamai ufiufi palasitika i luga o o latou seevae.
“Aisea na latou tuu ai nei taga laiti i o’u vae, Mama?” Sa fesili atu ai Svetan.
“Aua o totonu o le malumalu e fou ma mama mea uma. Tatou te mananao ia tausia lelei.”
Sa faafeiloaia i latou e se tamaitai. Sa ia faitauina upu o i le faitotoa o le malumalu: “E Paia i le Alii—o le Maota o le Alii.”
Sa uu e Svetan le lima o Mama. Sa la savavali atu i totonu. Sa matuā matagofie tele mea uma! Atonu o le lagona lea o le i ai i le lagi.
“Vaai!” Sa musumusu atu ai Svetan. Sa ia tusi atu i se atavali. “O Iesu le la!”
Ina ua uma, sa lagona e Svetan le fiafia. Sa faafetai o ia ona sa mafai ona alu i totonu o le malumalu. Sa manao o ia e toe alu i totonu pe a matua.
Ata na tusia e Mark Robison