“Vavega i le Malumalu a Jimena,” Uo, Me 2023, 36–37.
Vavega i le Malumalu aJimena
Sa popole Jimena. Ae sa ia iloa o le a fesoasoani le Alii ia te ia.
O lenei tala sa tupu i Kuatemala.
Sa oso Jimena i totonu o le taavale ma fusi lona fusipau. Sa latou agai atu ma ona matua i le malumalu. O lona taimi muamua lea i le faia o papatisoga i le malumalu. O le a papatiso e Papa o ia mo nisi o o latou tuaa. Sa le mafai ona faatali Jimena!
Ona mafaufau lea o Jimena i se mea na ia lagona ai le gatete i totonu. “Papa,” sa ia fai atu ai, “ae a la’u pamu?”
Sa maua Jimena i le ma’i suka ituaiga 1. Ina ia ola maloloina, e masani lava ona ia faia se tamai masini e ta’ua o se pamu inisulini e fesoasoani e faafoea tulaga o le suka i lona toto. Afai e umi tele ae na te le faia, na te lagona le ma’i.
“Mata latou te faatagaina a’u e faia i totonu o le malumalu?” O le fesili lea a Jimena. Sa tatavale lona fatu. “Ae a pe a ou alu i totonu o le vai?”
“O le a le afaina,” o le tala lea a Papa. “E mafai ona e faaaogaina lau pamu seia e alu i totonu o le vai. Ona mafai lea ona fesoasoani atu Mama ia te oe e toe faamaulu i le taimi lava e te sau ai i luga.”
Sa luelue atu le ulu o Mama. “Ma afai e amata ona e lagona le ma’i a o e faia papatisoga, tau lava o le tau atu ia Papa ma e mafai ona e taofi.” Sa oomi e Mama lona lima. “O le a matou faatasi ma oe i le taimi atoa.”
“Ua lelei,” o le tala lea a Jimena. Sa ia lagonaina pea le popole. Ae sa fesoasoani Mama ma Papa ia te ia ia maua sina lagona lelei teisi atu.
Ina ua latou taunuu, sa uu e Jimena lima o Mama ma Papa a o latou savavali agai atu i faitotoa o le malumalu. O le taimi lava na ia laa atu ai i totonu, sa lagona e Jimena se lagona mafanafana ma le toafimalie. Sa ia iloa sa ta’u atu e le Agaga Paia ia te ia o le a fesoasoani le Tama Faalelagi ia te ia, e ui lava sa popole o ia. O le a lelei mea uma, e pei lava o le tala a Papa.
Na sui Jimena i ni ofu papae. Ona fesoasoani lea o Mama ia Jimena e aveese lana pamu. “O le a na o ni nai minute lava,” o le tala lea a Mama. Sa ia fusiina Jimena.
Sa laa atu Jimena i totonu o le vai. Sa faatalitali Papa mo ia. Sa aapa atu lona lima ma fesoasoani ia te ia i lalo o le faasitepu.
Sa fai e Papa le tatalo o le papatisoga ma faatofu Jimena i lalo o le vai. Ina ua ia ea a’e i luga, sa ataata Jimena. Ona latou faia lea o nisi papatisoga.
“O lelei ou faalogona?” Sa musumusu atu Papa i lona taliga.
“Ioe,” o le tala lea a Jimena.
Sa papatisoina o ia e Papa mo ni nai tagata. “E mafai ona e faia nisi [igoa]?” na ia toe fesili atu ai.
“Ioe,” o le tala lea a Jimena.
Ina ua uma le papatisoga mulimuli, sa fesoasoani Mama ia Jimena e faamaulu lana pamu ma siaki le suka o le toto o Jimena. Sa ataata Mama. Sa i ai i le tulaga masani! Sa peiseai e lei aveesea lava e Jimena lana pamu.
Ona sosoo ai lea ma lo latou o atu i se potu laitiiti. Sa tuu e Papa ona lima i luga o le ulu o Jimena. Sa ia faamauina o ia o se tagata o Le Ekalesia a Iesu Keriso o le Au Paia o Aso e Gata Ai mo o e na maliliu lea na manaomia ona ia papatisoina ai. O lea la ua mafai ona filifili ona tuaa e auai i le Ekalesia a Iesu Keriso!
I le afiafi faaleaiga i le vaiaso na sosoo ai, sa talanoa ai Jimena ma ona matua e uiga i la latou malaga i le malumalu. “O le malumalu o le maota o le Alii.” o le tala lea a Papa. “Pe a tatou o, e mafai ona tatou maua vavega i o tatou olaga.”
“O a ituaiga o vavega?” na fesili atu ai le tuagane laitiiti o Jimena, o Pablo.
“Sa ou popole e aveese la’u pamu inisulini ae alu i totonu o le vai,” o le tala lea a Jimena. “Ae a o ou faia papatisoga, ou te lei lagonaina foi se ma’i. O se vavega lava!” Sa ataata Jimena. “Ma e ui lava ina sa ou fefe, ae sa fesoasoani le Agaga Paia ia ou lagona le toafimalie. O se vavega foi lena mea.”
Ata na tusia e Alyssa Petersen