“Tatalo a Rosi,” Uo, Me 2023, 14–15.
Tatalo a Rosi
Sa lelavā Rosi i le lagona e pei e le auai ma le taliaina o ia.
O lenei tala sa tupu i le ISA.
Sa faapau e Rosi lana atofaafafa i le foloa. Faatoa uma lona aso lona lua i lana vasega fou. Sa le o se aso lelei le aso lenei.
“O le a se mea ua tupu?” O le fesili lea a Tina.
Sa faapalasi ifo Rosi i luga o le nofoa. “Sa fai mai e nisi o tamaiti i lau vasega ni tala le manaia,” o lana tala lea. “E uiga i le enaena o lo’u pa’u.”
Sa le toatele ni tagata i le aoga sa tutusa lanu o pa’u ma Rosi, o lea sa ia lagona ai e le taliaina o ia. Ae o le taufaalili na faaselau ona ia lagonaina ai le tiga.
Sa foliga popole Tinā. “Talofa e,” sa ia fai atu ai. Sa ia fusi maia Rosi. “O le a ou talanoa i lou faiaoga e uiga i ai.”
Ae o le aso na sosoo ai i le aoga, na toe faaliliina foi ia Rosi. O se tasi o tamaitiiti i lana vasega sa agaleaga ia te ia i le aso atoa.
Sa lagona e Rosi le faanoanoa. Ae sa ia lagonaina foi le ita. O nisi taimi pe a le faaaloalo le tamaitiiti ia te ia, sa tali atu i ai Rosi. Peitai na te lei mauaina ai se lagona lelei.
I se tasi aso ina ua taunuu Rosi i le fale mai le aoga, sa tamoe sa’o atu o ia i lona potu. Sa lelavā o ia i le taufaalili. Sa lelavā o ia i le lagona e pei e le auai ma le taliaina o ia. Sa tuu ona foliga i lona aluga ma tagi.
O le a la’u mea o le a fai? sa ia mafaufau ai. Na te le’i manao ia lagona faapea mo le tausaga atoa o le aoga.
Sa solo e Rosi ona mata. Ona ia tilotilo lea i luga i le faatagata laitiiti o Iesu sa i luga o lana fatatusi. Na tuuina atu e Tina ia Rosi e fesoasoani ai ia te ia ia manatua Iesu.
Atonu e tatau ona ou tatalo, sa ia mafaufau ai. Sa ia tootuli ifo i ona tulivae ma piilima ona lima.
“Le Tama Faalelagi pele, o loo ou matua tiga lava i totonu. E ese le agaleaga o a’u uo ia te a’u ona e enaena lo’u pa’u, ma ou te lagona ai lava le tiga. Faamolemole, fesoasoani mai ia te au.”
Sa ia maua se lagona lelei i le ta’u atu i le Tama Faalelagi o ona lagona. Sa ia iloa o loo faafofoga mai o Ia. Sa ia lagonaina le mafanafana ma le alofaina, e pei o se palanikeke vaivai sa aui ai o ia. Sa ia lagona e matagofie le lanu o lona pa’u. O ia o se afafine o le Atua, ma e alofa o Ia ia te oe.
Ina ua uma le tatalo a Rosi, sa i ai sona manatu. Atonu sa tele atu mea e mafai ona ia faia e fesoasoani ai i lana aoga.
O le vaiaso na sosoo ai, sa talanoa ai Rosi ma lona tina i tagata e vaaia le aoga e uiga i le mea sa tupu i lona potuaoga. Sa vaavaaia e Rosi isi tamaiti i le aoga o e sa sauaina ma avea ma ni uo ia i latou. Sa taumafai o ia e aua le amanaiaina le tamaitiiti na taufaalili ia te ia. Ma i le lotu i le Aso Sa, sa ia faasoa atu ai lana molimau e alofa le Tama Faalelagi i tagata uma.
Sa lei lelei mea i le aoga i le taimi lava lena. Ae ina ua faigata, sa manatua e Rosi ona lagona i le taimi o lana tatalo. O ia o se afafine o le Atua, ma sa alofagia o ia. Ma ona sa ia iloaina lena mea, e mafai ona ia faia soo se mea.
Ata na tusia e Shawna J. C. Tenney