“Gaoioiga o leSau, Mulimuli Mai ia te A’u ,” Uo, Me 2023, 10–11.
Gaoioiga o le Sau, Mulimuli Mai ia te A’u
Mo afiafi faaleaiga, suesuega o tusitusiga paia, pe tau lava o se mea malie!
Faaalia o le Lotofaafetai
Ata na tusia e Katy Dockrill
Mo le Luka 12–17; Ioane 11
Tala: Faitau le tala “Tasi le tagata Faafetai” i le itulau 46. E mafai faapefea ona e faaalia le loto faafetai?
Pese: “Faafetai i lo Tatou Tama” (Tusipese a Tamaiti, 12)
Gaoioiga: Oti ese fasipepa e 10. I luga o fasipepa taitasi, tusi ai se mea se tasi e te lotofaafetai ai. Faalapotopoto fasipepa o loo siomia ai e le tasi le isi ma faapipii faatasi ia pito e fai ai se filifili. Faatautau lau filifili o le lotofaafetai i se mea o le a e vaai soo i ai.
Toa Sili o Auaunaga
Mo le Mataio 19–20; Mareko 10; Luka 18
Tala: Na aoao mai Iesu Keriso e tatau ona tatou fesoasoani i tagata e le tagolima (tagai Mareko 10:17–22). Faitau le “O le Lulu ma le Tafola” i le itulau e 8 e aoao ai pe na faapefea ona mulimuli atu se tamaitiiti e igoa ia Dieter ia Iesu.
Pese: “Tausi Poloaiga” (Tusipese a Tamaiti, 68–69)
Gaoioiga: Alu i le itulau e 12 ma avea ma se toa sili o auaunaga!
Laau o le Faalogo
Mo le Mataio 21–23; Mareko 11; Luka 19–20; Ioane 12
Tala: Sa manao Sakaio e vaai ia Iesu, ae sa poloka e se motu o tagata toatele lana vaaiga. Sa a’e Sakaio i se laau ina ia mafai ona ia vaai ma faalogo atili ia Iesu. (Tagai Luka 19:2–8.)
Pese: “A Ou Faalogo ma Lo’u Loto” (Musika mo Tamaiti, ChurchofJesusChrist.org)
Gaoioiga: Fai se laau o le lima! I luga o se fasipepa, lolomi ai lou lima. O lou lima o le a avea ma ogalaau ma o ou tamailima o lala ia. Faataamilo i lala taitasi, tusi pe tusi se ata o auala e mafai ona e faalogo ai ia Iesu.
O Se Faifeautalai i le Taimi Nei
Mo le Iosefa Samita—Mataio 1; Mataio 24–25; Mareko 12–13; Luka 21
Tala: Na fetalai Iesu Keriso a o lei toe afio mai o Ia, o le a talai atu le talalelei i le lalolagi uma (tagai Iosefa Samita—Mataio 1:31). E mafai ona tatou fesoasoani e saunia mo le Afio Mai Faalua e ala i le faasoa atu o le talalelei i isi.
Pese: “Faamoemoe Latou Te Valaau A’u i le Misiona,” (Tusipese a Tamaiti, 91)
Gaoioiga: Fai lau oe lava pine o le igoa o le faifeautalai! Tusi lou igoa i luga o se fasi pepa ona oti ese lea. I le pito i tua, tusi ai se mea se tasi e mafai ona e faia e faasoa atu ai le talalelei i le taimi nei. Faapine pe faapipii lau pine o lou igoa i lou ofutino.
Vae o Auaunaga
Mo le Mataio 26; Mareko 14; Ioane 13
Tala: Sa mulumuluina e Iesu Keriso vae o Ana aposetolo (tagai Ioane 13:4–16). Sa Ia alofa ia i latou ma manao e auauna atu ia i latou. Sa ta’u atu e Iesu ia i latou e mulimuli i Lana faataitaiga ma auauna atu le tasi i le isi.
Pese: “‘Foai,’ O si Auvai Lea” (Tusipese a Tamaiti, 116)
Gaoioiga: Taaalo i lenei taaloga auauna atu. E nonofo tagata uma ma o latou vae i se lio. E piki e se tagata taalo se toatasi se numera. Amata i o latou lava vae, e faasino le tagata taalo i vae taitasi i le li’o ma faitau mai lena fuainumera seia oo ina latou oo i le “tasi.” O le vae ua faanumerainaina o le “tasi” e pe. Ona piki lea e lena tagata taalo se numera ma faitau i lalo. O le tagata mulimuli e i ai se vae i le li’o e pikiina se gaoioiga auauna atu mo le vaega e fai.