“O Cameron le Ta Piano,” Uo, Me 2023, 40–41.
OCameron le Ta Piano
Sa le iloa e Cameron tātā, ae sa ia manao e fesoasoani.
O lenei tala sa tupu i le ISA.
“O au o se atalii o le Atua,” sa pepese ai Cameron ma isi tamaiti Peraimeri. Sa le lelei le faalogo a Cameron, ae sa fiafia o ia e pese. Ma e le o toe mamao ona latou pepese lea i le polokalama a le Peraimeri. Sa na o se masina le mamao ese atu!
Ina ua uma le taimi o pesepesega, sa faia se faasilasilaga a Sister Jones. “E le o toe mamao ona masii ese lea o le tatou ta piano o le Peraimeri. Matou te fiafia e taina e nisi o outou le piano mo le polokalama o le Peraimeri. E i ai se tasi o outou e fia taina se pese se tasi pe lua?”
Na sii le lima o Cameron. Sa manao o ia e fesoasoani i le polokalama.
Sa tusi i lalo e Sister Jones igoa o tamaiti o e sa mananao e fesoasoani. “Ema. Ben. Ma Cameron! “Ou te leiloaina e mafai ona e tata.” Sa ataata o ia.
E lei faia muamua ni lesona a Cameron, ae sa ia fiafia e fatu ni pese i luga o le piano i le fale o lona tinamatua.
“Ou te le lelei tele lava,” o lana tala lea. “Ae ou te manatu e mafai ona ou faia pe a ou faataitai!”
“Faafetai mo le naunau e auauna atu,” o le tala lea a Sister Jones. Sa ia tuuina atu i tamaiti taitasi ni pese se lua e tata ai.
Sa lagona e Cameron le pei o loo tamoe i lalo o le potu tele. Sa manao lava o ia e aoao, ma o lea la o le a ia aoaoina!
“Ua e foliga fiafia lava! Na i ai se mea na tupu i le Peraimeri?” Sa fesili atu ai Tina ina ua latou feosofai i totonu o le taavale ina ua tuua le lotu.
Sa ataata Cameron. “O le a ou taina le piano mo le polokalama a le Peraimeri!”
“Ou te fiafia e te manao e fesoasoani,” o le tala lea a Tina. “Ae e te le lelei tele i le taina o le piano e fai ai lena mea.”
Sa nofo sa‘o i luga Cameron. “E mafai ona ou aoao. O le a ou faataitai malosi! E mafai ona ou faaaogaina le piano a Tinamatua.”
“E tatau la ona tatou amata loa!” Na fai atu ai Tina.
Sa fesoasoani Tina ia Cameron e sue se faiaoga ta piano. Sa faaali atu e le faiaoga ia te ia ni auala faigofie e ta ai le “Ou Te Fia Vaai i le Malumalu” ma le “O Le Ekalesia a Iesu Keriso.”
Sa faataitai Cameron i le fale o Tinamatua i le tele o taimi na te mafaia ai. Sa ia faataitaia pea lava pea laina taitasi o pese. Sa ia faia le tele o mea sese, ae sa ia taumafai pea ma faaauau pea ona taina [le piano]. Na iu lava ina mafai ona ia taina pese uma e lua.
E le’i umi ae oo mai le taimi mo le polokalama a le Peraimeri. “O le a sou faalogona?” O le fesili lea a Tina.
Sa fusi faalatalata mai e Cameron lana tusi piano i lona fatafata. “Popole. Ae sa fiafia foi.”
Ina ua oo i lona taimi e ta ai, sa tetete teisi lima o Cameron. Tama Faalelagi, faamolemole fesoasoani mai ia te au, sa ia tatalo ai i lona mafaufau. Sa manava loloa o ia. Ona ia taina lea [o le piano] i le mea sili na te mafaia. Sa usuina e isi tamaiti le pese.
I le faaiuga o le pese, sa ataata o ia. E manaia si mea! Sa ia iloa sa fesoasoani le Agaga Paia ia te ia.
O lea la ua uma ona ia taina se pese se tasi, sa lagona e Cameron le lototele atili. Ona ia amataina lea o le pese lona lua. Sa fesiitai ona tamatamai i ki e pei lava ona sa ia faataitaia.
O le pese lenei e sili ona fiafia i ai Cameron. Sa ia mafaufau i upu a o ia taina. “Ou te talitonu i le Faaola, o Iesu Keriso. O le a ou faamamalu i lona suafa.” Sa galue malosi Cameron e aoao pese mo le polokalama.
Atonu o le taina o le piano o se tasi lea o auala e faasoa atu ai la’u molimau, sa mafaufau ai Cameron.
Ina ua maea le polokalama, sa tuuina atu e Tina ia Cameron se opo lapoa.
“Na a mai?” na ia fesili ai.
“Sa ou popole i le taimi muamua, ae sa manaia!” Na fai atu ai Cameron. Sa manao o ia e faataitai pea ma aoao nisi pese.
Ata na tusia e Adam Koford