“Lolovaia i le Alofa,” Uo, Me 2023, 26–27.
Lolovaia i le Alofa
“E mafai ona tatou fesoasoani foi i le aiga o Iose?” O le fesili lea a Marius.
O lenei tala sa tupu i Filipaina.
A o savali atu Marius i lona fale, sa mafai ona ia logona atu ni tagata o talanoa mai totonu. Sa ia autilo atu i le faamalama.
Po o ai o loo ii, o ona mafaufauga ia. Sa nofo lona tina i se isi atunuu mo galuega, e masani lava la e na o ia ma Lola (Tinamatua) i le fale.
Sa ia tatalaina le faitotoa. Sa i ai uma ana uo iina!
“Faateia!” sa latou fai mai ai.
“Sa matou mananao e patipatia oe ma le pine na e maua i lau tauvaga Taekwondo,” o le tala lea a Iose, le uo mamae a Marius.
“E ese lo’u mimita ia te oe.” Sa oomi e Lola ia Marius i se opo lapoa. “O lou tina o loo i luga o le telefoni! Ou te mautinoa na te fia faalogo i mea uma e uiga i lau pine.”
Ina ua uma ona talanoa Marius ia Tina, sa fiafia o ia ma ana uo i le patī. Sa latou fiafia e talanoa ma aai i meaai mananaia a Lola.
“E te manao ta te o ta te faataavale polo taeao?” Sa fesili atu ai Iose a o lei aluese atu o ia.
“Ioe!” Sa fai atu ai Marius.
I lena po a o lei moe, sa fai se tatalo a Marius. “Le Tama Faalelagi, faafetai i Lau Afio mo le aumaia ia te a’u o ni uo ma se aiga maoae. Faamolemole faamanuia lo’u tina a o mamao ese o ia. Ma faamolemole faamanuia ia te a’u ia ou maua le fiafia e faataavale polo ma Jose taeao.
Ae o le aso na sosoo ai, sa lei alu ai Marius e faataavale polo. Na tetele timugaafā, ma sa tatau i tagata uma ona nonofo i totonu. Sa nofo Marius i le fale, ma faalogologo i le timu o pa’o i luga o le taualuga. Sa moomoo o ia maimau pe ana mafai ona vaai ia Iose.
Mo aso e tolu, sa timuga pea. Sa lolovaia auala i le vai. Sa lolovaia foi nisi o fale i le pitonuu o Marius.
Mulimuli ane sa maua e Marius ia Lola i le umukuka. Sa ia kukaina se mea na manogi manaia.
“O le a lau kuka o fai?” o lana fesili lea.
“O loo ou faia ni meaai mo nisi o aiga o le tatou uarota,” o lana tala lea. “Sa lolovaia o latou fale, o lea na fai mai ai le epikopo ia te au e fesoasoani atu.”
Sa mafaufau Marius ia Iose. “E mafai ona ta faia se meaai mo le aiga o Iose? Atonu latou te manaomia foi se fesoasoani.”
O se manatu lelei tele lena!” na fai atu ai Lola.
Sa kuka e Marius ni araisa ma falai fuamoa mo Iose ma lona aiga. Ona ia fesoasoani lea ia Lola e teu meaai.
Mulimuli ane, na uma le timu. Sa o atu Marius ma Lola i magaala e tiliva meaai. Na oo le vai i tulivae o Marius!
Sa laua maua atu Iose ma lona aiga o tutu i fafo o lo latou fale. Sa tagi Iose.
Sa fusi e Marius lana uo. “Talofa e, ua lolovaia lou fale,” o lana tala lea. “E alofa Iesu ia te oe. Ma te alolofa foi ia te oe.”
Sa fesoasoani faatasi Marius ma Iose e faamama mea palapalā i le fale o Iose. Sa usuina e Marius le “O Au o se Atalii o le Atua” a o latou galulue. Ina ua latou malolo, sa avatu e Marius ia Iose meaai sa ia faia mo ia.
“Faafetai mo le fesoasoani i lo’u aiga,” o le tala lea a Iose. “Ma faafetai mo meaai! E ese le manaia.”
“E le afaina,” o le tala lea a Marius.
“E te manatu e mafai ona e faamatala atili mai ia te au e uiga ia Iesu? Ma le pese sa e usuina?” na fesili atu ai Iose.
“Ioe!” Sa fai atu ai Marius. “E te manao ta te o i le lotu i le Aso Sa? O iina ou te aoao ai e uiga ia Iesu. Ma e mafai foi ona ta pepese faatasi ai.”
“Ua lelei la,” na fai atu ai Iose.
Sa lagona e Marius le mafanafana i lona loto. Sa fiafia o ia ona sa mafai ona ia fesoasoani ia Iose ma lona aiga. Ma sa fiafia o ia sa mafai foi ona ia faasoa atu le talalelei.
Ata na tusia e Jamie Bauza