“Usa ka Gamayng Piraso sa Pan,” Higala, Hunyo 2023, 4–5.
Usa ka Gamayng Piraso sa Pan
Ang tray sa sakramento wala nay sulod!
Kini nga istorya nahitabo sa Guatemala.
“Naghinam-hinam ko nga makaadto sa simbahan didto sa chapel!” Si Anahí miingon atol sa pamahaw.
Tungod sa COVID-19 nga pandemya, si Anahí ug ang iyang pamilya wala na makaadto sa simbahan hapit sa duha ka tuig. Apan karon makaadto na gayod sila! Si Anahí nalipay nga makita na niya ang iyang mga higala ug aduna nay sakramento sa ilang ward pag-usab.
Si Anahí ug ang iyang pamilya nanglingkod sa chapel. Si Anahí mikaway ngadto sa iyang mga higala.
Sa wala madugay oras na alang sa sakramento. Human sa himno, gikyugpos ni Anahí ang iyang mga bukton ug giduko ang iyang ulo. Naminaw siya sa pag-ampo sa sakramento. Dayon mitan-aw siya sa usa ka gamay nga hulagway ni Jesus. Kini nakatabang niya nga mahinumdom sa pagbaton og balaan nga pagtahod.
Usa ka batan-ong lalaki midala sa tray paingon sa ilang laray. Apan sa dihang ang tray miabot kang Anahí, wala na kini sulod!
Dayon si Anahí mitan-aw og maayo. Sa kilid sa tray, adunay gamay kaayo nga nahabilin. Gipunit niya kini ug gikaon.
Sa tibuok adlaw, si Anahí nabalaka. Nagsige siya og hunahuna sa gamayng piraso sa pan. Hangtod sa panihapon nabalaka gihapon siya. Siya wala gani mokaon sa iyang postre [dessert] nga ice cream. Naglingkod lang siya sa lamesa samtang si Mami nanghugas sa mga plato.
Maapil ba sa sakramento kon gamay ra kaayo nga pan ang akong nakaon? naghunahuna siya.
Gipauga ni Mami ang iyang mga kamot sa tualya. “Aduna bay problema, palangga?”
Si Anahí milingo-lingo.
“Ang imong natunaw na nga ice cream ang nakapahunahuna nako nga adunay nakapahasol nimo.” Si Mami mipahiyom ug mitupad ni Anahí. “Unsa man na?”
Milugmaw ang mga luha ni Anahí. “Naghinam-hinam ko nga makaambit sa sakramento karon. Apan pag-abot sa tray nako, gamay na lang kaayo nga pan ang nahabilin.” Miginhawa siya og lawom. “Sayop ba ang akong pag-ambit sa sakramento?”
“Dili,” miingon si Mami. Gigakos niya si Anahi. “Nakakita ko nimo nga nagtan-aw sa gamay nga hulagway ni Jesus nga imong gidala diha sa imong mga kasulatan. Unsay imong gihunahuna?”
“Naghunahuna ko mahitungod kon unsa ko ka mahal ni Jesus. Ug mahitungod sa mga agi sa nilansangan sa Iyang mga kamot ug mga tiil. Ug sa tanan nga Iyang gihimo alang nato.”
“Nakita nimo?” Si Mami nangutana. “Kana ang hinungdan kon nganong moambit kita sa pan ug tubig. Aron sa paghinumdom sa sakripisyo nga gihimo ni Jesus alang nato.”
“Buot ipasabot ang gidak-on sa pan dili mahinungdanon?”
“Dili. Unsay mahinungdanon mao ang imong gibati samtang naghinumdom ka sa Manluluwas,” miingon si Mami. “Ug bisan kon ikaw adunay usa ka gamayng piraso lang sa pan, ang gugma ni Jesus alang nimo dili gamay. Siya nahigugma nimo sa hilabihan gayod.”
Si Anahí mipahiyom. Siya nasayod nga sakto si Mami. Ang sakramento sa kanunay mahimong usa ka espesyal nga panahon sa paghinumdom ni Jesus—bisan adunay usa lamang ka gamayng piraso sa pan.
Mga paghulagway ni Jennifer Bricking