“Ang Pagpili bahin sa Pagsayaw,” Higala, Hunyo 2023, 10–11.
Ang Pagpili bahin sa Pagsayaw
Mas nindot ang gibati ni Maddie samtang nagtan-aw siya sa iyang mga klasmeyt nga nanayaw.
Kini nga istorya nahitabo sa USA.
Si Maddie mibutang sa iyang pangsayaw nga sapatos sulod sa iyang bag. Ang klase sa sayaw nahuman na, ug tingpaniudto na. Nag-abot siya sa iyang higala nga si Ashlynn sa may pultahan.
“Unsay imong hunahuna sa bag-ong kanta?” Si Maddie nangutana samtang naglakaw sila paingon sa kan-anan. Ang ilang klase mosayaw og bag-ong kanta alang sa ilang kataposang pasundayag sa tuig, atubangan sa tanan nilang mga pamilya.
“OK ra man, tingali,” si Ashlynn miingon.
“Ang ubang mga pulong morag lahi ra,” miingon si Maddie. “Dili kaayo ko ganahan niini.”
Si Maddie naghunahuna nga maulaw siya kon ang iyang mga ginikanan ug manghod nga babaye motan-aw niya nga mosayaw sa musika nga sama niana.
Gikibo ni Ashlynn ang iyang abaga. “Ang akong igsoong lalaki ganahan kaayo niini. Sige siya og patukar niini.”
“Mao ba.” Miduko si Maddie.
Sa tibuok adlaw ang kanta anaa sa hunahuna ni Maddie. Dili siya ganahan sa iyang gibati tungod niini. Apan si Ashlynn wala maghunahuna nga dili kini maayo. Tingali OK ra kini.
Si Maddie nahinumdom sa usa ka leksiyon sa home evening sa iyang pamilya mahitungod sa musika. Si Mama miingon nga ang maayo nga musika makatabang sa mga tawo nga mobati sa Espiritu Santo. Ug ang musika nga adunay dili maayo nga mga pulong mas makapalisod nila nga mobati sa Espiritu. Tingali ang Espiritu Santo nagsulti niya nga ang kanta dili maayo.
Nagmug-ot siya. Ang kanta walay bisan unsa nga mga pulong sa pagpamalikas. Dili ba gihapon kini maayo?
Pag-uli ni Maddie sa balay, gisultihan niya ang iyang Mama mahitungod sa kanta.
“Mahimo ba nimong tan-awon ang mga pulong ug tan-awa kon unsay imong hunahuna?” Si Maddie mihangyo.
Silang duha nangita sa mga pulong sa kanta diha sa internet. Gitan-aw ni Maddie ang nawong sa iyang Mama samtang nagbasa siya.
Nagmug-ot ang nawong ni Mama. “Nakasabot na ko kon nganong dili ka ganahan niini,” miingon siya. “Wala kini mga pulong sa pagpamalikas, apan sa akong hunahuna dili kini maayo nga kanta nga sayawon sa mga grade four. Mangutana ko sa imong magtutudlo sa sayaw mahitungod niini ugma.”
Pagkasunod adlaw, si Mama nakigsulti sa iyang magtutudlo, si Mrs. Slater, sa eskwelahan. Si Maddie nabalaka nga si Mrs. Slater masagmuyo, apan wala! Siya miingon nga nakasabot siya kon nganong si Mama dili ganahan sa kanta. Apan miingon siya nga ulahi na kaayo aron usbon ang musika.
“Si Maddie dili lang mosayaw sa kanta,” si Mrs. Slater miingon. “Mahimong molingkod na lang siya alang niana nga sayaw.”
Ang maglingkod nga siya ra morag hadlok kaayo. Si Maddie nakahukom nga hangyoon si Ashylnn nga molingkod uban niya. Si Ashlynn mitando!
Sa dihang ang adlaw sa pagpasundayag sa sayaw miabot, si Maddie nakakita ni Ashlynn sa sayawanan.
“Nalipay ko nga molingkod ka uban nako!” Miingon si Maddie nga nagpahiyom.
Apan si Ashlynn wala mopahiyom. “Dili man ko molingkod,” siya miingon, nga nagtarong sa iyang sayal. “Moapil ko og sayaw sa uban.”
Si Maddie mibati og kaluya. Dili siya ganahan nga molingkod nga mag-inusara . Apan dili gihapon maayo ang iyang gibati mahitungod sa kanta.
Si Maddie milinya kuyog sa uban ug misayaw sa unang kanta. Dayon panahon na alang sa sunod nga kanta.
Ang iyang kasingkasing mikulba og maayo. Nag-ampo siya og mubo sulod sa iyang kasingkasing. Dayon miginhawa siya og lawom, milakaw sa kilid sa stage, ug milingkod.
Sa dihang nakakanaog na siya sa stage, mas nindot ang gibati ni Maddie. Nagtan-aw siya sa iyang mga klasmeyt nga nanayaw. Pagkahuman nila, mipakpak siya. Mibati siya og kalipay ug kainit.
Mipahiyom si Maddie. Hadlok kaayo kadto nga maglingkod nga siya ra, apan nindot ang iyang gibati nga naminaw siya sa Espiritu Santo.
Paghulagway pinaagi ni Susana Gurrea