Pagserbisyo pinaagi sa Art

Ni Sister Kristin M. Yee

Ikaduhang Magtatambag sa Kinatibuk-ang Kapangulohan sa Relief Society

Gikan sa usa ka interbiyo ni Gretchen Picklesimer Kinney.

Nagdrowing ko og mga hulagway sa tibuok nakong kinabuhi. Sa bata pa ko, nagsige na ko og drowing. Ang akong mama mihangyo nako sa pagsulti niya sa istorya sa matag hulagway nga akong gidrowing. Gisultihan nako siya sa mga istorya, ug gisulat niya kini alang nako.

Art pinaagi ni Kristin M. Yee niadtong bata pa siya

Sukad pagkabata, gusto na ko nga mahimong artist. Ganahan ko nga motan-aw og animated nga mga salida. Gusto ko nga mahimong kabahin sa paghimo og butang nga sama niana. Ang akong mama kanunayng misalig nako, ug siya mitabang nako nga mosalig nga makahimo ko niini.

Aron mahimong mas maayo sa art, nagsige ko og praktis. Miboluntaryo ko alang sa mga butang. Nagdrowing ko og mga poster alang sa mga kalihokan sa komunidad. Nag-paint ko og mga bintana sa tindahan. Nag-paint ko og mga bandera. Usa ka higayon mitabang ko sa pag-paint og mga set sa usa ka opera house.

Kini nga mga kasinatian nagtudlo nako nga ang art usa ka paagi nga ako makaserbisyo. Nalingaw ko sa paggamit sa akong mga talento sa pagtabang sa uban. Mibati ko og dugang nga kadasig tungod kay nakahimo ko og butang nga maanindot alang sa laing tawo.

Sa dihang midako na ko, nahimo kong artist alang sa Disney. Gisulayan nako ang bag-ong mga butang ug gipalambo ang akong mga talento nga wala ko kahibalo nga anaa diay nako. Ang Langitnong Amahan miagak ug migiya nako ngadto sa dapit nga kinahanglan nga ako maanaa.

Ayaw kahadlok nga mosulay og bag-ong mga butang! Dili kinahanglan nga maayo kaayo ka sa usa ka butang aron malingaw niini. Hunahunaa ang mga talento nga mahimo nimong gamiton karon sa pagserbisyo. Kon kita mogamit sa atong mga talento sa paagi sa atong Langitnong Amahan, Siya motabang nato sa pagpatubo ug pagpalambo niini.

Molihok nga mga Hulagway

Paghimo og imong kaugalingong animation! Sa higayon nga makahibalo ka kon unsaon, makatudlo usab ikaw sa laing tawo.

Paggunting og gamayng piraso gikan sa papel ug pil-a kini og katunga.
Abliha ang gipilo nga papel. Pagdrowing og hulagway sa tunga sa kinaubsan. Pwede nga usa ka hayop, usa ka tawo, o bisan unsa nga gusto nimo!
Pil-a og balik ang papel. Subaya ang imong unang drowing, apan paghimo og gagmayng mga kausaban aron makahimo og bag-ong bersiyon.
Ihugot og likit ang kinababwan sa papel libot sa bolpen. Dayon paspasa sa pagpataas ug pagpaubos ang bolpen aron magbalhin-balhin ang duha ka drowing. Kon tan-awon kini morag naglihok ang imong hulagway!