“Pagdrowing uban ni Christian,” Higala, Hunyo 2023, 30–31.
Pagdrowing uban ni Christian
Tingali si Gabriel makatabang ni Christian niining higayona.
Kini nga istorya nahitabo sa Brazil.
“Karon maminaw kita sa pakigpulong ni Sister Almeida,” ang bishop miingon.
Si Gabriel mikuha og usa ka piraso nga papel ug pipila ka lapis. Ganahan siya nga magdrowing samtang maminaw sa mga pakigpulong. Mao usab ang iyang igsoong babaye, si Alice.
Niining higayona si Alice nagdrowing og liyon. Si Gabriel nagdrowing og dinosaur. Gihimoan niya kini og taas nga liog ug ikog.
Dayon mihangad si Gabriel. Usa ka gamayng bata nga lalaki ang naglakaw padulong nila.
“Hala!” siya mihunghong ni Alice. “Padulong diri si Christian.”
Si Christian kuwatro anyos. Siya dili makaistorya, ug dili magpuyo. Maglakaw-lakaw siya libot sa chapel atol sa mga miting. Usahay kuris-kurisan niya ang mga drowing ni Gabriel.
Gitagoan ni Gabriel ang iyang mga lapis sa iyang luyo. Dili siya gusto nga kuhaon kini ni Christian.
Si Christian mikab-ot sa mga lapis.
“Dili! Akoa kini!” Si Gabriel mihunghong, mitudlo ngadto sa pamilya ni Christian. “Adto didto lingkod.”
Apan si Christian morag wala makasabot. Nagsige siya og panglabni sa mga lapis ni Gabriel.
Sa dihang nahuman na ang miting, si Gabriel milakaw uban ni Mama ug ni Alice ngadto sa Primary.
“Nganong si Christian makalakaw-lakaw man libot sa chapel apan ako kinahanglang maghilom?” Si Gabriel nangutana ni Mama.
“Si Christian adunay lahi nga panghunahuna,” miingon si Mama. “Ang paglakaw-lakaw makatabang niya nga mobati og kakalma ug kakomportable.”
“Apan kanunay siya nga magsamok-samok namo,” miingon si Gabriel.
Mikunot ang agtang ni Alice. “Ganahan lang siya nga magdrowing.”
“Apan dili siya kahibalo unsaon!”
“Tingali makatabang kita kaniya,” miingon si Alice.
Pagkasunod Dominggo, si Gabriel mitapad ni Alice atol sa panagtigom alang sa sakramento. Pagkahuman sa pagpasa sa pan ug tubig, gikuha niya ang iyang mga lapis ug papel aron magdrowing. Dayon nakita niya si Christian nga naglakaw padulong nila.
Si Gabriel misugod sa pagtago sa iyang mga lapis, apan mihunong siya og kadali. Si Christian dako kaayo og pahiyom. Si Gabriel nahinumdom sa gisulti ni Alice. Tingali makatabang siya ni Christian sa pagdrowing niining higayona!
Si Gabriel mipahiyom usab ni Christian. Misibog siya aron si Christian makalingkod sa tunga niya ug ni Alice. Si Gabriel mihatag ni Christian og lapis ug papel. Si Alice mitabang ni Christian sa paggunit sa lapis. Silang duha nagdrowing og stick figure.
Mikatawa si Christian ug mipakpak sa iyang mga kamot. Malipayon siya tan-awon. Malipayon usab si Gabriel. Niining higayona si Gabriel mitabang ni Christian sa paggunit sa lapis. Silang duha nagdrowing og iro. Si Gabriel mingisi. Ang pgdrowing uban ni Christian makalingaw.
Sa dihang nahuman na ang miting, si Christian adunay daghang nadrowing. Iyang gigakos og hugot ang mga drowing ug mitudlo ngadto sa gilingkoran sa iyang pamilya. Si Gabriel ug Alice miagak ni Christian balik ngadto sa iyang pamilya. Gipakita ni Christian ang mga drowing ngadto sa iyang mama uban sa dakong pahiyom.
Si Gabriel nalipay nga siya nakadrowing uban ni Christian. Ug nalipay siya nga siya adunay igsoong babaye nga usa ka maayong ehemplo.
Mga paghulagway pinaagi ni Josh Talbot