“Dili Kini Patas!” Higala, Hunyo 2023, 20–21.
Dili Kini Patas!
Nganong si Ephraim ra man ang mitabang?
Kini nga istorya nahitabo didto sa Nigeria.
Si Ephraim midagan og kusog kutob sa iyang mahimo. Mikulba ang iyang dughan. Matag lakang nagdala og abog sa kahanginan. Gituyhad niya ang iyang bukton. Duol na lang kaayo siya!
“Ikaw ang hago!” Si Ephraim miingon samtang iyang gikuptan ang iyang igsoong lalaki, si Uchenna, sa bukton.
“Ephraim! Uchenna!” Si Mama mitawag gikan sa balay. “Sulod na mo. Daghan pa kita og buhaton.”
“Oo, Mama,” si Ephraim miingon. Siya ug si Uchenna misulod.
Karon mao ang adlawng natawhan sa ilang manghod nga babaye nga si Johanna. Sila adunay mga bisita nga moabot alang sa panihapon sa iyang adlawng natawhan. Daghan kaayo og buhatonon.
Si Ephraim mitabang ni Mama sa paghimo sa birthday cake ni Johanna. Ganahan siya nga motabang ni Mama sa pagluto. Labi na kon maghimo sila og cake.
Si Ephraim mitan-aw sa iyang igsoong lalaki ug igsoong babaye. Si Uchenna nagtrabaho og maayo sa pagpanglimpyo sa balay. Apan si Johanna wala gyod motabang. Nagbasa ra siya og libro.
“Nganong wala man motabang si Johanna?” Si Ephraim nangutana samtang nagkutaw siya sa cake batter.
“Adlawng natawhan niya karon,” si Mama miingon. “Kita ang mohimo sa iyang tanang trabaho alang niya.”
“Apan dili kana patas! Si Johanna dili motabang nako kon akong adlawng natawhan.” Si Ephraim medyo nasuko. Gipaspas niya og kutaw ang panaksan, ug gagmayng batter mipisik sa iyang nawong.
Dayon si Ephraim mingisi. Aduna na siyay ideya. Siya mopasaad ni Johanna nga motabang niya sa iyang adlawng natawhan. Kon dili siya mosaad, si Ephraim dili motabang karon! Dayon patas na.
Gisultihan niya ang iyang Mama mahitungod sa iyang plano. Apan morag wala gayod siya malipay mahitungod niini.
“Hinumdomi ang paghunahuna kon unsa kaha ang buhaton ni Jesus,” siya miingon.
Si Ephraim naghunahuna mahitungod ni Jesus. Si Jesus mitabang sa uban, apan wala Siya mangayo og balos. Si Ephraim nasayod nga gusto ni Jesus nga moserbisyo siya sa uban, sama sa Iyang gihimo.
“Naghunahuna ko nga gusto ni Jesus nga motabang ko ni Johanna nga dili mopasaad niya kanako og bisan unsa,” miingon si Ephraim.
“Mao usab kana ang akong gihunahuna,” miingon si Mama. Siya mitabang ni Ephraim sa pagbubo sa cake batter ngadto sa lutoanan.
Gibutang ni Mama ang cake ngadto sa oven. Dayon si Ephraim mitabang ni Mama sa paghimo og meat pie alang sa panihapon. Naghinamhinam siya nga makaangkon niini.
Si Ephraim nakakita nga si Uchenna wala na manglimpyo. Nakigdula siya ni Johanna.
Si Ephraim nasuko na usab. Nganong siya ra man ang mitabang? Tingali mokuha siya og duha ka piraso nga meat pie. Ug si Johanna ug si Uchenna walay makuha! Patas lang kini.
Apan si Ephraim naghunahuna na usab mahitungod ni Jesus. Si Jesus gusto nga kaming tanan makaangkon og usa ka piraso, naghunahuna siya.
Si Ephraim mitabang ni Mama nga makompleto ang panihapon. Gani mitabang siya sa pagpahimutang sa lamesa bisan wala sugoa. Siya mibati nga mas malipayon. Siya nasayod nga ang Espiritu Santo misulti niya nga siya mihimo sa saktong pagpili.
Sa dihang nanglingkod na silang tanan aron mangaon, nanganta sila og awit alang sa adlawng natawhan ni Johanna. Si Ephraim mikanta og kusog kutob sa iyang mahimo.
Gihiwa ni Mama ang meat pie, ug si Ephraim paspas nga mikab-ot aron makakuha niini. Apan mihunong siya.
“Mahimo nimong kuhaon ang unang piraso,” miingon siya ni Johanna. “Happy birthday!”
Mga paghulagway pinaagi ni Corey Egbert