“Ang Sensilyo sa Pagkamabination,” Higala, Hunyo 2023, 36–37.
Ang Sensilyo sa Pagkamabination
Gitagoan ni Nina ang sensilyo sa balkon ni Máté.
Kini nga istorya nahitabo sa USA.
Mipahiyom si Nina human niya gipapitlan og ngalan ang iyang butanganan sa lemonada. Mabasa kini nga “Lemonada! 25 sentabos”. Gipahimutang niya ang plastik nga mga baso tupad sa pitsil nga may lemonada.
Mainit kadto nga adlaw sa ting-init. Nanghinaot si Nina nga daghan sa iyang silingan ang ganahan og lami, bugnaw nga mainom.
Si Mr. Burleigh naglakaw nga nagbira sa iyang gamayng bata sulod sa kariton. “Papalita ko.” Gisulod niya ang sensilyo sa garapon ni Nina. Gitaksan siya ni Nina og usa ka baso nga lemonada.
Sunod ang higala ni Nina nga si Bethany ug Livvy miagi sakay sa ilang mga bisikleta. Nanghunong sila ug mipalit og pipila usab ka lemonada. “Salamat!” Miingon si Bethany.
Giuyog ni Nina ang iyang garapon, mitagingting ang mga sensilyo sa sulod. Nakakuwarta na siya og gamay!
Dayon ang paboritong silingan ni Nina migawas aron sa paglabay sa mga basura. “Hi, Nina,” miingon si Máté. “Ganahan ko og pipila ka lemonada.”
Si Máté ug ang iyang asawa, si Tanya, daghan kaayo og natabang sa pamilya ni Nina. Human namatay ang papa ni Nina, si Máté mitabang nila sa mga buhatonon sa tibuok balay. Usa ka higayon iyang giayo ang busloton nga hose. Gipamung-olan niya ang tag-as nga kahoy sa ilang likod nga nataran. Ug mitabang siya sa pag-ayo sa sakyanan ni Mama dihang wala mogana ang bateriya.
“Dia ra.” Si Nina mitunol ngadto niya og usa ka baso.
Si Máté misugod sa pagbutang og sensilyo sa iyang garapon, apan gipugngan siya ni Nina.
“Ayaw na pagbayad!” miingon siya. “Kini nga lemonada usa ka pasalamat alang sa tanan nga imong nabuhat sa pagtabang namo.”
“Apan ang nakasulat nag-ingon og 25 sentabos!” Miingon si Máté. “Ug kini nga lemonada lami kaayo aron dili nako bayaran.”
Gibira ni Nina ang garapon ug mikatawa. “Ayaw. Libre kini para nimo!”
Pagkasunod adlaw, dihang migawas si Nina aron mokuha sa miabot nga sulat, mihunong siya. Usa ka pilak nga sensilyo migilak sa silaw sa adlaw dapit sa tikanganan sa balkon. Mitan-aw siya sa balay ni Máté. Sigurado nga iyang gibutang ang bayente singko sentimos didto! Gipaningkamotan gihapon niyang bayaran ang iyang lemonada.
Mipahiyom si Nina. Dili lang kay si Máté ra ang igmat, naghunahuna siya. Midagan siya sa pikas pultahan ug gibutang ang sensilyo dapit sa trapohan sa may pultahan ni Máté.
Sa adlaw human niana, si Nina migawas aron mopadagan sa iyang scooter. Ug didto ang sensilyo ni Máté, anaa sa kaang sa bulak dapit sa atubangang pultahan.
Gipadagan na usab ni Nina ang iyang scooter ngadto sa balay ni Máté’. Niining higayona gibutang niya ang sensilyo ibabaw sa bato dapit sa pultahan.
Milabay ang pipila ka semana. Ang sensilyo nagbalik-balik. Matag adlaw makit-an ni Nina ang sensilyo dapit sa ilang balkon sa bag-ong lugar. Ug matag adlaw, itago niya kini ngadto sa bag-ong lugar sa may balkon ni Máté.
Dayon usa ka adlaw, migawas si Nina nga nakakita og usa ka sorpresa. Kadto ang sensilyo—nga gihimong usa ka matahom nga kuwintas. Iya ning gipunit ug mipahiyom. Naigo sa init sa adlaw ang sensilyo ug midan-ag kini.
Sa pikas pultahan naa si Máté nagtrabaho sa iyang pandayanan sa kahoy.
“Salamat!” Misinggit si Nina nga milabaw sa tingog sa gabas.
Miyahat si Máté. Giisa ni Nina ang kuwintas.
“Si Tanya mitabang nako sa paghimo niana,” matod ni Máté. “Gasa kana gikan namong duha sa imong kabuotan.”
“Sa akong tag-an ikaw ang nidaog.” Mikatawa si Nina ug misul-ob sa kuwintas. “Ganahan ko niini sa hilabihan ug kini akong tipigan hangtod sa hangtod.”
Mapasalamaton kaayo siya nga adunay ingon ana kamabination, mapinanggaon nga mga silingan.
Mga paghulagway pinaagi ni Mitch Miller