Pāpa’ihia e ’outou

Te mau ha’ari ’e te tuha’a ’ahuru

Nā Avehei M., 11 matahiti, Tahiti, Pōrīnetia Farāni

’Ia ora na ! ’O Avehei tō’u i’oa. Tē ora nei au i Tahiti ! I ni’a i tō’u motu, e mea au nā’u ’ia haere nā rāpae. E haere au e ori haere ’e e ’au i roto i te ’ānāvai ’e ’aore rā i roto i te moana. E mea au ato’a nā’u ’ia rave i te mau ’ohipa ’e tō’u ’utuāfare. E mea au nā’u ’ia tunu i te mā’a, ’ia ha’uti i te mau perē, ’e ’ia haere nā ni’a i te ’āivi. E mea au nā’u ’ia ha’uti i te pōpō ’e ’ia ta’uma i ni’a i te mau tumu rā’au ’e tō’u taea’e ’e tō’u mau taea’e fēti’i.

I te tau fa’afa’aeara’a nō Tiurai, e ’ohipa vau ’e tō’u taea’e i roto i te uru ha’ari. E ha’aputu mātou i te mau ha’ari ’e e ’āpapa atu ai i te hō’ē vāhi ruru. E ha’aputu ato’a mātou i te mau rau’ere marō ’ia vai mā noa te uru ha’ari.

E ’aufau to mātou tupuna ia mātou ’ia ’ohipa ana’e mātou i roto i te uru ha’ari. E ’aufau iho ā vau i tā’u tuha’a ’ahuru ’e te moni tā’u e fāri’i. ’Ua ha’api’i au, mai roto mai i tō’u ’utuāfare ’e te mau ’orometua Paraimere, e nāhea i te ’aufau i te tuha’a ’ahuru.

Tē ’aufau nei au i te tuha’a ’ahuru no te mea ’ua ’ite au ē, e ha’amaita’ihia mātou tō’u ’utuafare ’ia ha’apa’o ana’e au i te reira. ’Ua ha’amaita’ihia vau, e ’utuāfare tō’u, e fare, ’e te hō’ē ao he’euri ’ati a’e iā’u.

Tē fa’a’ite pāpū nei au ē, tē ora nei te Atua ’e ’ua here ’oia iā’u. Tē ha’amāuruuru nei au i te Metua i te ao ra nō te ’utuāfare tāna i hōro’a mai nō’u.

E aha te tuha’a ’ahuru ?

Tē hōro’a nei te mau melo o te ’Ēkālesia i te hō’ē i ni’a i te ’ahuru o tā rātou ’āpī, i te ’Ēkālesia a te Atua. E tauturu tā tātou tuha’a ’ahuru i te patu i te mau hiero ’e te mau fare purera’a, ’e e tauturu ato’a i te feiā tei hina’aro i te tauturu. Te tuha’a ’ahuru ’o te tahi ïa rāve’a nō te ’ōpere i tā tātou mau ha’amaita’ira’a ia vetahi ’ē. ’Ua hōro’a mai te Atua i teie fa’auera’a ia tātou mai te tau āu’iu’i mai ā, i te tau o te Faufa’a Tahito (hi’o Genese 14:18–20). Te ’aufaura’a i te tuha’a ’ahuru ’o te hō’ē ïa rāve’a nō te fa’a’ite i tō tātou hina’aro i te Metua i te ao ra.