« Tauturu i te taea’e tamāroa ’aru’aru », Hoa, Novema 2023, 16–17.
Tauturu i te taea’e tamāroa ’aru’aru
’Aita e taime nō te ta’ata ’ia ha’apa’o ia Lashia i teienei.
’Ua tupu teie ’ā’amu i te fenua ’Āfirita Apato’a.
E taea’e tamāroa ’aru’aru ’āpī tō Lashia. Tōna i’oa ’o Liam. E rouru ’ere’ere pa’o tōna ’e tōna nā rima ’e te avae iti na’ina’i. E mea au roa ’oia !
Terā rā, i te tahi mau taime, e taime fifi te fāri’ira’a i te hō’ē ’aiū ’āpī i roto i te ’utuāfare. ’Aita e fa’afa’aeara’a nō Māmā ’e nō Pāpā i teienei. ’E e mea ta’i roa ’o Liam.
« E Māmā, e nehenehe ānei ’oe e tai’o mai i te tahi ’ā’amu ? » ’Ua ani ’o Lashia.
« E horoi vau ia Liam », ’ua parau ’o Māmā. « Pēnei a’e e nehenehe ’ōrua ’o Ariana e tai’o i te tahi ’ā’amu. »
’Ua pārahi ’o Lashia i ni’a i te tahua ’e tōna tuahine iti. ’Ua fefeu rāua i te mau ’api o te hō’ē buka. E ’ere hō’ē ā huru ’e ’o Māmā.
« E pāpā, e nehenehe ānei ia ’oe i te ha’uti nā muri iho iā’u ? » ’Ua ani ’o Lashia.
« E tauturu vau ia Māmā ’e Pēpe hou ’a haere ai au i te ’ohipa », i parau ai ’o pāpā.
’Ua tu’atu’a roa te tu’e mata ’o Lashia. ’Aita roa atu e taime fa’ahou tō Māmā ’e tō Pāpā nōna i teienei ! Tei ni’a noa ia Liam.
Reva atu ra Pāpā i te ’ohipa. ’Ua tu’u atu ’o Māmā ia Liam i raro, tē ta’oto’oto ra. ’Ua pārahi ’oia i pīha’i iho ia Lashia ’e ia Ariana i ni’a i te ro’i pārahira’a. E au ē, ’ua rohirohi roa ’oia.
« ’Ua ha’apa’o rahi māua ia Liam », te parau ïa a Māmā. « ’Ua mo’emo’e ri’i ’oe ? »
’Ua ueue te upo’o ’o Lashia. Mai te huru ra ē, ’ua hina’aro ’oia i te ta’i.
’Ua tauahi ’o Māmā ia Lashia ’e ia Ariana. « E hina’aro ’o Liam e rave rahi tauturu i teienei nō te mea e ’aiū ’aru’aru ’oia. E’ita ’oia e nehenehe e rave i te hō’ē noa a’e mea, mai ia ’oe. »
« ’Ua ta’a iā’u ! », te parau ïa a Lashia.
« Mai te mea rā e hina’aro ’oe, e nehenehe ’oe e tauturu mai iā’u ’ia ha’apa’o ia Liam. » ’Ua ’ata’ata ’o Māmā.
« Parau mau ? » ’Ua ani ’o Lashia. ’Ua au roa ’oia i taua mana’o ra.
« ’O vau ato’a ? » te parau ïa a Ariana.
« ’O ’oe ato’a », te parau ïa a Māmā.
’Aita ho’i i maoro tē ha’amata nei ’o Liam i te ta’i. I tō Māmā tauira’a i tōna pāhi’i, ’ua ’āfa’i mai ’o Lashia iāna i te fāiru.
« Māuruuru ! », te parau ïa a Māmā.
Te mahana i muri mai, tē fa’ahapuhia ra ’o Liam, ’ua rave ’o Lashia e ’o Ariana i te hō’ē ’ahu mā ia ’ō’omo ’oia. E mau ’ānimara iti na’ina’i tō ni’a iho ! ’Ua ’āfa’i atu rāua i te reira ia Māmā ra ’ia nehenehe iāna ’ia fa’a’ahu ia Liam.
« Māuruuru, ! » te parau ïa a Māmā.
’Ua feruri ’o Lashia rāua ’o Ariana i te tahi atu ā mau rāve’a nō te tauturu. ’Ua fa’anahonaho rāua i tō rāua ro’i i te mau po’ipo’i ato’a ma te fa’aue-’ore-hia. I te tahi mau taime e fa’anahonaho ato’a rāua i te ro’i ’o Māmā ’e ’o Pāpā ! ’E i te taime nō te tāmā’ara’a i te pō, e tauturu rāua ia Pāpā i roto i te piha tūtura’a mā’a.
« Māuruuru », e parau mai ’o Māmā ’e ’o Pāpā.
’Ia ta’i ana’e ’o Liam, e tāmata ’o Lashia i te fa’anā iāna. E amoamo ’oia iāna ’e e paraparau iāna ma te reo iti mārū. ’E’ita e ti’a ia Liam i te parau atu māuruuru. I te hō’ē rā mahana, ’ua ’ata’ata ’oia ia Lashia !
’Ua ʼata’ata ato’a ho’i ’o Lashia. ’Ua ’oa’oa ’oia i te tauturura’a i tōna teina taea’e ’e tōna Māmā ’e tōna Pāpā !
Fa’ahōho’ara’a nā Shawna J. C. Tenney