« Te mau tīti’ara’a tū’aro », Hoa, Novema 2023, 30–31.
Te mau tīti’ara’a tū’aro
’Ua ’ite Iareda ē, tei tōna pae ’o Iesu Mesia.
’Ua tupu teie ’ā’amu i te fenua Farāni.
’Ua fa’ahoro Iareda i te pōpō nā ni’a i te tahua. Horo hā’ati iho ra te mau ta’ata ha’uti iāna, tē ’ui’ui ra tō rātou tīa’a i ni’a i te tahua.
« Teie au ! » Pi’i mai ra Gabriela.
Tāora atu ra Iareda i te pōpō ia Gabriela ra ’e ’a tāmau noa ai i te horo. I muri iho fa’aho’i fa’ahou mai ra Gabriela i te pōpō iāna ra. Tāora atu ra Iareda i te pōpō i roto i te ’ete.
Pum!
Tei roto roa !
« Maita’i roa, e Iareda », ’ua parau tōna ta’ata fa’aineine i muri a’e i te ha’utira’a. « ’Ua ’ite ’oe ē, i roto e piti hepetoma e tupu te mau tīti’ara’a nō te pupu retioni. »
’Ata’ata a’era Iareda. ’O te tahi noa mau ta’ata hā’uti tei anihia ’ia tāmata i te fa’aō i roto i taua pupu ra.
« E tupu te tīti’ara’a i te sābati », parau a’era te ta’ata fa’aineine. « I tō ’oe mana’o, e tae mai ’oe ? »
’Ore ’oi’oi noa atu ra te ’ana’anatae o Iareda.
« I te sābati ? » ’Ui iho ra Iareda.
« ’Ē. E mea fifi ānei ? »
Feruri iho ra Iareda. E fāna’ora’a nōna nō te ha’uti i roto i te hō’ē pūpū maita’i roa ! Terā rā, i te sābati ’o te taime ïa ’oia e haere ai i te purera’a ’e ’ia rōtahi i ni’a i te Fa’aora.
Nā ’ō atu ra Iareda, « e mahana ta’a ’ē mau nō’u te mau sābati ». « Terā rā, e paraparau vau i tō’u nā metua nō te reira. »
I taua pō ra, ’ua pārahi Iareda i ni’a i tōna ro’i ’e tōna nā metua. Tē tāoraora noa ra ’oia i tāna pōpō i roto i te aore, ’a feruri noa ai. « Hina’aro mau vau e tāmata e fa’aō i roto i te pupu », ’ua parau ’oia ia māmā ’e ia pāpā. « ’Aita rā vau e hina’aro e rave i te reira i te mahana sābati. ’Ua ’ite au e mea faufa’a a’e te Atua i te tāorara’a pōpō i roto i te ’ete. »
« E aha tā māua e nehenehe e rave nō te tauturu ? » Ui mai ra māmā.
Tāviriviri iho ra Iareda i te pōpō nā roto i tōna nā rima. « E nehenehe ānei tātou e pure ’āmui ? »
Vaiiho atu rā ’oia i tāna pōpō ’e tūturi i iho ra i pīha’i iho ia māmā ’e ia pāpā. Nā ’ō atu ra, « E te Metua here i te ao ra, tē hina’aro mau nei au e tāmata e fa’aō atu i roto i teie pupu tāora pōpō i roto i te ’ete. Terā rā, e tupu te tīti’ara’a i te hō’ē sābati ! ’Ua ’ite au i te sābati ’o te mahana ïa ’o tā’u e hōro’a nō ’oe. E aha te mea e ti’a iā’u ’ia rave ? »
I muri a’e i te pure, ’ua fāri’i Iareda i te hō’ē mana’o tāmāhanahana.
« E aha tō ’oe huru ? » ’Ua ui atu māmā.
« E’ita vau e haere i te tīti’ara’a mai te mea e tupu i te sābati », ’ua parau ’oia. « Terā rā, tē mana’o nei au e tupu maita’i te mau mea ato’a ».
Piti mahana i muri mai, ’ua fāri’i te māmā ’o Iareda i te hō’ē rata uira. Tē parau ra te reira e tupu te mau tīti’ara’a i te mahana mā’a i teienei !
E nehenehe ïa Iareda e tāta’u ’e e ha’amo’a i te mahana sābati ! ’Ua ’ite ’oia ’ua fa’aro’o mai te Metua i te ao ra i tāna pure.
I roto i nā hepetoma e piti i muri mai, ’ua ha’api’ipi’i maita’i Iareda i te tāorara’a pōpō i roto i te ’ete ma tōna pūai ato’a. I te taera’a mai te mahana rahi, ’ua hōro’a Iareda ma tōna pūai hope. ’Ua horo vitiviti ’oia nā roto i te mau hā’uti, ’ua manuia i te rahira’a o tāna mau ’ete, ’e ’ua fa’aitoito ato’a i tōna mau hoa o te pupu.
Fa’aara mai nei te ta’ata fa’aineine i muri iho te tuha’a mātāmua « e tāmau noa te feiā ha’uti, tei fa’ahitihia te i’oa, i te tīti’ara’a ». « ’A fa’aro’o mai i tō ’outou i’oa ».
Tūpa’ipa’i pūai ra te māfatu ’o Iareda. ’Ua pi’i te ta’ata fa’aineine i te i’oa mātāmua. Tō muri iho. ’E te tahi fa’ahou. ’Iti roa mai te ti’aturira’a ’o Iareda nō te ō atu i roto i te pupu.
’Aita i maoro roa ’ua oti te mau i’oa i te pi’ihia e te ta’ata fa’aineine. ’Aita ’oia i pi’i i te i’oa ’o Iareda. E’ita Iareda e nu’u i te mau tuha’a nō muri iho nō te tīti’ara’a.
Pārahi atu ra Iareda i ni’a i te pārahira’a i rāpae i te tahua hā’utira’a ’e hi’o ihora i tōna nau tīa’a. ’Ua hōro’a hope ’oia i tōna ’aravihi. Mai te huru rā ē, ’ua māu’a noa tāna ’ohipa.
I te haerera’a mai māmā e ti’i iāna, tā’iri’iri a’era Iareda i tōna upo’o. « ’Aita vau i ō i roto i te pupu ».
Tāhopu ihora māmā iāna. Nā ’ō mai ra iāna, « tē ’oto nei au ē ’aita te mau mea i tupu mai tā tātou i hina’aro ».
Huti a’era Iareda i te aho. I muri iho, tae mai nei te hō’ē mana’o tāmārū i roto iāna ra.
« E’ita te mau mea e tupu noa mai tā’u i hina’aro », ’ua parau ’oia. « Terā rā, ’ua ’ite maita’i Iesu Mesia i te hōhonura’a o tō’u māfatu. Tei tō’u pae ’oia ».
’Ua ʼataʼata māmā. « ’Ua tano ’oe ! ’Ua ’ite ’oia i te mea tā ’oe e fāri’i ra ».
’Ata’ata mai ra Iareda. Tē ’oto noa ra ’oia, tē ’oa’oa nei rā ’oia ma te ’ite ē ’ua māramarama te Fa’aora i te mea tāna e fāri’i ra. ’Ua pāpū ia Iareda ē, ’ua here ’e e pāturu noa Iesu iāna.
Fa’ahōho’ara’a nā Britain Morris