Tē fa’aineine nei Akoni nō te hiero

Fārerei ia Akoni ’e ha’api’i mai e mea nāhea ’oia i te fa’aineinera’a iāna nō te haere i te hiero.

12 matahiti tō Akoni. Tē ora nei ’oia i New Mexico (Niu Mehiko), i Marite, i roto i te nūna’a Navajo. E tuha’a fenua teie nō te fenua Marite e fa’aterehia nei e te nūna’a Navajo. Hau atu i te 250 000 ta’ata e ora nei i reira.

I tō Akoni na’ina’ira’a, e hi’o noa ’oia i tōna mau taea’e ’e mau tuahine pa’ari a’e ’ia haere i te Feiā ’Āpī Tamāhine ’e te Feiā ’Āpī Tamāroa.

’Ua ’ite ato’a ’oia i tō rātou ’oa’oa ’ia haere ana’e rātou i te hiero. E ’oa’oa ato’a Akoni ’ia haere e māta’ita’i i te hiero.

’Ua fa’aineine Akoni iāna nō te Feiā ’Āpī Tamāroa ma te haerera’a i te purera’a ’e te paraparaura’a e tōna ’utuāfare.

’Ua uiui ’oia i te mau uira’a nō ni’a i te hiero ’ia ineine ’oia nō te tomo atu i roto.

Tē parau nei Akoni ē « tē hitahita ri’i nei au ’ia haere i te hiero nō te taime mātāmua ». « ’Ia tae rā vau i roto i te hiero, e fāri’i au i te pārurura’a. »

Te hiero fātata roa a’e nō Akoni, ’o te hiero ïa nō Albuquerque Niu Mēhiko. E maha hora ’ia tere nā ni’a i te pereo’o. Tē ’oa’oa nei Akoni nō te mea fātata roa te hō’ē hiero ’āpī i te patuhia piri ri’i mai.

Tē ti’aturi nei Akoni e tāvini i te hō’ē misiōni ’ia tae i te hō’ē mahana, mai tōna mau taea’e ’e mau tuahine pa’ari.

’Ua ha’amata ’oia i te fa’a’ite i te ’evanelia ma te anira’a i tōna hoa ’ia haere mai i te purera’a. ’Ua hina’aro ’oia ’ia riro ’ei hi’ora’a nō tōna teina ’e nō vetahi ’ē ato’a !

’Ua parauhia teie mau ’ōfa’i rahi i ni’a i teie hōho’a te « mau pererau o te mau ’ōfa’i. » E vāhi faufa’a roa teie nō te nuna’a Navajo.