E rave ’āmui tātou i te reira

Nā Jane McBride

(Nō roto mai i te hōʼē ʼāʼamu mau)

’Ua mata’u Annie i te ha’amata i te Feiā ’Āpī Tamāhine.

’Ua tupu teie ’ā’amu i te fenua Mārite.

Tē ’ui’ui noa ra Annie i tōna ahu. ’Ua tāmata ’oia i te fa’aro’o i te mau ta’ata a’o. Tē vai nei rā tōna mana’o taiā ’e te pe’ape’a i roto i tōna ’ōuma.

Teie te mahana e ha’amata ai Annie i te haere i te Feiā ’Āpī Tamāhine. E haere ’oia i te piha ha’api’ira’a i muri noa mai i te purera’a ’ōro’a. ’Ua parau te mau ta’ata ia Annie e ti’a iāna ’ia vai te ’ana’anatae, ’aita rā ho’i, tē mata’u nei ’oia.

’Ua hi’o atu ra ’oia ia Tami, tōna tuahine pa’ari a’e. ’A toru matahiti tō Tami tomora’a atu i roto i te Feiā ’Āpī Tamāhine, ’e ’ua au roa ’oia i te reira. Pinepine ’oia i te parau ia Annie e mea fa’ahiahia roa te reira. « E rahi roa atu tā ’oe mau hoa », ’ua parau atu ’oia. « E mea ta’a ’ē roa te reira i te Paraimere. Fātata roa mai te mea ra e ta’ata pa’ari ’oe. »

Terā rā, e ’ere ’o Annie mai tōna tuahine te huru. E mea au nā Tami e fārerei i te mau ta’ata ’āpī, ’e e mea ’ōhie roa nōna ’ia fa’ahoa atu. E mea hau roa Annie ’e e mea au a’e nāna e tai’o ’aore rā e pāpa’i hōho’a, ’eiaha ra e paraparau ia vetahi ’ē.

E ma’i pu’upu’u taure’are’a ato’a tō Annie, ’e ’ua ha’amā ’oia i tōna hōho’a mata. E fa’a’ohipa ’oia i te hō’ē hinu ta’a ’ē, ’o tei fa’a’ohie i te reira. ’Aita rā te mau pu’upu’u ’ute’ute i ni’a i tōna ’iri i ’ore ’ē atu.

I muri mai i te purera’a ’ōro’a, tē fa’ataere noa ra Annie i te haere atu nā roto i te ārea iti. « E’ita tā’u e nehenehe e haere i te piha a te Feiā ’Āpī Tamāhine i teie mahana », ’ua parau ’oia i tōna māmā ’e ia Tami.

E mata pe’ape’a tō māmā. « ’Ua mana’o ho’i au ē, ’ua ’ana’anatae roa ’oe i te haere i te Feiā ’Āpī Tamāhine. E aha tei tupu ? »

« ’Aita vau i mātau i te hō’ē noa a’e o te mau tamāhine pa’ari. » Tāpe’a a’e ra Annie i tōna hōho’a mata. « ’E e ’ata mai paha rātou ’ia ’ite ana’e mai rātou iā’u. »

Tauahi atu ra māmā ia Annie. « ’A ha’amana’o ē, tei reira ato’a ’o Tami. »

« E ’ere au mai ia Tami » parau a’era Annie. Ma te hi’o i ni’a i tōna tuahine. « E mea maita’i roa ’oe i te paraparau i te ta’ata ».

Nā ’ō a’era Tami, « ’ua ’ite au e mea fifi ’ia haere i roto i te hō’ē piha ha’api’ira’a ’āpī ». « Terā rā e rave ’āmui tāua i te reira. ’Ua mata’u ato’a vau i te ha’amatara’a vau te Feiā ’Āpī Tamāhine ».

Hi’o a’era Annie ia Tami ma te mata rahi. Mea itoito roa iho ā ’o Tami ! ’Ua tāmata ato’a na ’oia i te hōho’a hīmene nō tāna fare ha’apai’ira’a ’e ’ua roa’a iāna i te ti’ara’a mātāmua. ’Aita ’o Annie i rave na i te mau mea mai teie te huru. ’Ua tāmata noa ’oia ’eiaha ’oia ’ia ’itehia mai.

« ’Aita roa rā ’oe i mata’u noa a’e », ’ua parau Annie.

’Ua ’ata’ata Tami. « ’Oia ïa, ’ua ri’ari’a vau ! ’Ua mata’u vau i te tāmatara’a i te hōho’a hīmene. ’Ua ’ite ’oe i te mea tā’u i rave ? »

’Ua tā’iri’iri Annie i tōna upo’o.

« ’Ua pure au ’e ’ua rave mai tā’u i nehenehe. ’E ’ua tauturu ato’a vau i te tahi atu mau tamari’i. Mai te huru ra ē, e rave rahi o rātou tei ri’ari’a mai iā’u ato’a. Te tauturura’a ia vetahi ’ia itoito, ’ua tauturu ïa iā’u ’ia itoito ato’a ».

Feruri a’era Annie i te reira. E nehenehe ānei tāna e rave mai tā Tami i rave, ’e e tauturu i te tahi atu mau tamāhine nō tāna piha ha’api’ira’a ’eiaha ’ia mata’u ?

« ’Ia mana’o ’oe, e nehenehe ’oe e haere i te piha Feiā ’āpī Tamāhine i teie mahana ? » Ui a’era māmā.

Huti a’era Annie i tōna aho. I muri iho, tā’iri’iri a’era i te upo’o. E nehenehe tāna e nā reira.

Haere atu ra Annie ’e ’o Tami i te piha a te Feiā ’Āpī Tamāhine. Hi’o atu ra Annie i te tahi atu mau tamāhine. Vētahi o rātou e huru taiā ri’i mai iāna te huru. Julie e tāviriviri rā i tōna rouru i ni’a i tōna manimani rima, tē ’amu’amu ra ïa Erica i tōna mai’u’u rima.

’Ua feruri Annie e nāhea ra ’oia i te tauturu ia rāua. ’Ua haere atu ra ’oia e pārahi i pīha’i iho ia Julie. « Te taiā ato’a ra ’oe ? » ’Ua muhumuhu atu Annie. « ’Aita e fifi ».

’Ua ’ata’ata Julie, ’e ’ua ’ata’ata ato’a mai Annie. ’Ua maha ri’i te ri’ari’a ’o Annie i teienei. Penei a’e e mea au roa iho ā te piha Feiā ’Āpī tamāhine.

Fa’ahōho’ara’a nā Toby Newsome